ޗައިނާގެ ސައިބާ ސްޕޭސް އެޑްމިނިސްޓްރޭޝަނުން ހުއްދަ ދީފައިވާ އޭއައި އެޕްލިކޭޝަންތައް ބޭނުންކުރާ މީހުންގެ އަދަދު 600 މިލިއަނަށް އަރައިފިއެވެ.
ތަފާސްހިސާބުތަކުން ދައްކާގޮތުގައި މި އަހަރުގެ ޖޫން މަހާ ހަމައަށް މި އަދަދު 230 މިލިއަނަށް އަރާފައިވާއިރު، އޮކްޓޯބަރު މަހާ ހަމައަށް މި އަދަދު ވަނީ ދެގުނައަށް ވުރެ އިތުރުވެފައެވެ.
ޗައިނާ އިންޓަނެޓް ނެޓްވޯކް އިންފޮމޭޝަން ސެންޓަރު (ސީއެންއެންއައިސީ)ގެ ރިޕޯޓެއްގައި ބުނެފައިވާ ގޮތުގައި، ޗައިނާގެ ސައިބާ ސްޕޭސް އެޑްމިނިސްޓްރޭޝަނުގައި ރަޖިސްޓްރީކޮށްފައިވާ 309 އޭއައި ކުންފުނީގެ ތެރެއިން 190 ކުންފުންޏަކަށް ވަނީ ހުއްދަ ދީފައެވެ.
ޗައިނާގައި އޭއައި އެޕްލިކޭޝަންތައް އާންމުންނަށް ފޯރުކޮށްދިނުމުގެ ކުރިން، އިންޓަނެޓް ރެގިއުލޭޓަރުގެ ހުއްދަ ހޯދަން ޖެހެއެވެ. ޗައިނާގެ އެންމެ މަޤުބޫލު އޭއައި އެޕްލިކޭޝަނަކީ ބައިޑޫގެ "އާނީ ބޮޓް"އެވެ. މި އެޕްލިކޭޝަނުގެ މާކެޓް ޝެއާއަކީ 11.5 އިންސައްތައެވެ.
އޯޕަން އޭއައިގެ ޗެޓްޖީޕީޓީއާއި ގޫގުލްގެ ޖެމިނައި މޮޑެލްތައް ރަސްމީކޮށް ޗައިނާގައި ބޭނުން ނުކުރެވުނު ނަމަވެސް، އެ އެޕްލިކޭޝަންތަކުގެ މާކެޓް ޝެއާއަކީ ހަތް އިންސައްތައާއި 3.8 އިންސައްތައެވެ.
ސީއެންއެންއައިސީގެ ރިޕޯޓުގައި ބުނެފައިވާ ގޮތުގައި، ޗައިނާގެ އޭއައި ބޭނުންކުރާ މީހުންގެ ތިންބައިކުޅަ ދެބައި މީހުން އޭއައި ބޭނުންކުރަނީ ސުވާލުތަކަށް ޖަވާބު ހޯދުމަށެވެ. ތިންބައިކުޅަ އެއްބައި މީހުން އޭއައި ބޭނުންކުރަނީ ޕްރެޒެންޓޭޝަން ސްލައިޑް ތައްޔާރުކުރުމަށާއި ބައްދަލުވުންތަކުގެ ޔައުމިއްޔާ ލިޔުމަށެވެ.
ޗައިނާގައި އޭއައި ބޭނުންކުރާ މީހުންގެ އަދަދު އިތުރުވަމުން ދިއުމުން، އެ ޤައުމުގައި ބޮޑެތި ލެންގުއޭޖް މޮޑެލްތައް (އެލްއެލްއެމްތައް) ބޭނުންކުރުން އިތުރުވަމުންދާކަން ދައްކުވައިދެއެވެ. މީގެ ސަބަބުން ޗައިނާގެ ޓެކްނޮލޮޖީ ކުންފުނިތަކުން އޯޕަން އޭއައި އަދި ގޫގުލް ފަދަ އެމެރިކާގެ ބޮޑެތި އޭއައި ކުންފުނިތަކާ ވާދަކުރަން މަސައްކަތްކުރަމުންދެއެވެ.
ބައިޗުއަން، ޒިޕު އޭއައި، މޫންޝޮޓް އޭއައި އަދި މިނިމެކްސް ފަދަ ޗައިނާގެ ނަން މަޝްހޫރު ސްޓާޓްއަޕްތަކުން ވަނީ އާންމު ފަރުދުންނާއި ވިޔަފާރިތަކަށް ބޭނުންކުރެވޭ ގޮތަށް އަމިއްލަ އޭއައި މޮޑެލްތައް ތަޢާރަފުކޮށްފައެވެ. ނަމަވެސް، އެމެރިކާއިން އެންވީޑިއާ ފަދަ ސަޕްލަޔަރުންނަށް ތަކެތި އެކްސްޕޯޓްކުރުމަށް ގެނެސްފައިވާ ހުރަސްތަކާއި އެހެނިހެން ޤަވާޢިދުތަކުގެ ސަބަބުން ޗައިނާގެ އޭއައި ކުންފުނިތަކުގެ ކުރިއެރުން ލަސްވެދާނެކަމަށް ބެލެވެއެވެ.
އޭއައި ޓެކްނޮލޮޖީއަކީ ދުނިޔޭގެ އެންމެ ބާރު ސްޕީޑެއްގައި ކުރިއަރަމުންދާ ދާއިރާތަކުގެ ތެރެއިން އެއް ދާއިރާއެވެ. ޚާއްޞަކޮށް ބޮޑެތި ލެންގުއޭޖް މޮޑެލްތައް (އެލްއެލްއެމްތައް) ތަޢާރަފުވުމާ އެކު، މި ދާއިރާއަށް ވަނީ އިންޤިލާބީ ބަދަލުތަކެއް އައިސްފައެވެ.
ޗައިނާއަކީ އޭއައި ޓެކްނޮލޮޖީ ދާއިރާގައި އެމެރިކާއާ ވާދަކުރާ އެންމެ ބޮޑު އެއް ޤައުމެވެ. ނަމަވެސް، އެމެރިކާއިން ޗައިނާއަށް އަމާޒުކޮށް ގެނެސްފައިވާ އެކި ޤަވާޢިދުތަކާއި ހުރަސްތަކުގެ ސަބަބުން، ދެ ޤައުމުގެ ދެމެދުގައި އޮތް ޓެކްނޮލޮޖީގެ ހަނގުރާމަ އިތުރަށް ގަދަވެފައިވެއެވެ.
މިކަމުގެ ސަބަބުން ޗައިނާގެ އޭއައި ކުންފުނިތަކަށް ދަތިތަކެއް ކުރިމަތިވި ނަމަވެސް، އެ ޤައުމުގެ އާބާދީގެ ބޮޑު ބައެއް އޭއައި ޓެކްނޮލޮޖީ ބޭނުންކުރަމުންދާކަން ފާހަގަކުރެވެއެވެ.