ރިސޯޓުތަކުން ކޮންމެ ފަތުރުވެރިއެއްގެ ބޮލަކަށް 500 ޑޮލަރު މާރުކުރަންޖެހޭ ގަވާއިދު ގާނޫނަކަށް ހަދަން ހުށަހެޅިއިރު ބޮލަކަށް ޖެހޭ އަދަދުގެ ބަދަލުގައި އާމްދަނީގެ 20 އިންސައްތަ މާރުކުރަން އިޚުތިޔާރުދިން ނަމަވެސް އާމްދަނީއަށް ބަދަލު ނާންނާނެ ކަމަށާއި ނިންމުން ތަންފީޒުކުރައްވާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
ކުރިން އޮތީ ރިސޯޓުތަކުން 500 ޑޮލަރު މާރުކުރަން ޖެހޭ ގޮތަށެވެ. އެކަމަކު، މިއަދު މަޖިލީހަށް ބިލު ހުށަހެޅިއިރު އޮތީ 500 ޑޮލަރުގެ ބަދަލުގައި ރިސޯޓުތަކަށް މަހަކަށް ލިބޭ އާމްދަނީގެ 20 އިންސައްތަ ވެސް މާރުކުރެވޭ ގޮތަށް އިހުތިޔާރު ދީފައެވެ.
މާލެ އަތޮޅުގެ ބައެއް ރަށްރަށަށް ކުރައްވަމުން އަންނަ ދަތުރުފުޅުގެ ތެރެއިން ހުރާގެ ރައްޔިތުންނާ މުޚާތަބުކުރައްވަމުން ރައީސް ވިދާޅުވީ، ޑޮލަރު މާރުކުރާ ގަވާއިދު ގާނޫނަކަށް ހަދަން މަޖިލީހަށް ހުށަހަޅާފައި އެ އޮތީ އެ މަނިކުފާނު ކުރިން ވެސް ވިދާޅުވި ގޮތަށް ބަދަލެއް ގެނައުމަކައިނުލާ ކަމަށެވެ.
އެ ކަމުގެ ސަބަބުން މުޅި ގައުމަށް ފައިދާވާނެ ކަމަށް ރައީސް ގަބޫލުކުރައްވައެވެ.
"އެއީ ހަމަ ހަގީގަތުގައި ވެސް ރައްޔިތުންގެ ލާބައާއި މަންފާއަށް، ރައްޔިތުންނަށް އެ ކަންކަމުގެ ތެރެއިން ވިޔަފާރިއާއި އެހެން ކަންކަމުގައި ވަރަށް ގިނަ ފައިދާތައް ވާނެ ކަމެއް،" ބިލަށް ތާއީދުކުރައްވާ ވާހަކަދައްކަވަމުން ރައީސް ވިދާޅުވިއެވެ.
"އޭގައި އޮންނާނީ އަޅުގަނޑު ކުރިން ދެންނެވި ގޮތަށް ގަވާއިދުގައި އޮތް ގޮތަށް ރިސޯޓުތަކުން 500 ޑޮލަރު މާރުކުރަންޖެހޭ ގޮތަށް. އަދި، އަޅުގަނޑު ދެންނެވިން އެއީ ގާތްގަނޑަކަށް 20 އިންސައްތައޭ އާމްދަނީގެ ޖުމުލަ ރެވެނިއުގެ އެ މަހަކަށްޖެހޭ ރެވެނިއުގެ 20 ޕަސެންޓޭ ގާތްގަނޑަކަށް،"
އެ މަނިކުފާނު ވިދާޅުވީ، ފަތުރުވެރިއެއްގެ ބޮލަށް 500 ޑޮލަރު މާރުކުރުމަކީ ރިސޯޓަކަށް ވަންނަ ޖުމުލަ އާމްދަނީގެ ގާތްގަނޑަކަށް 20 އިންސައްތަ ކަމަށެވެ. އެއީ، ފަތުރުވެރިކަމުގެ ސިނާއަތުގެ ބޭފުޅުންނާ އެކު މަޝްވަރާކުރެއްވުމަށް ފަހުގައި ހިމެނުއްވި ބައެއް ކަމަށް ރައީސް ވިދާޅުވިއެވެ.
އެކަމަކު، އެ ބިލާ އެކުގައި ޑޮލަރު މާރުކުރުމަށް އެއްވެސް ބަދަލެއް ނާންނާނެ ކަމަށް އެ މަނިކުފާނު ތަކުރާރުކޮށް ވިދާޅުވިއެވެ.
"ގާނޫނުން މަޖުބޫރު މި ކުރަނީ. އެހެންވީމާ އަޅުގަނޑު ދެންނެވި ގޮތަށް އިރާދަކުރެއްވިއްޔާ އެއްވެސް ބަދަލެއް ނުގެނެސް އެކަން އެ އޮތީ،" އެ މަނިކުފާނު ވިދާޅުވިއެވެ.
ރައީސް ވިދާޅުވީ، މި ހިނގާ މަޖިލީހުގެ ދައުރު މި މަހު 15 ގައި ނިމުމުގެ ކުރިން ޑޮލަރު މާރުކުރުމާ ބެހޭ ބިލު ފާސްކޮށްދެއްވާނެކަމުގެ ޔަގީންކަން އެބައޮތް ކަމަށެވެ. ބިލު ފާސްވުމާ އެކު އެ ދުވަހުން ފެށިގެން އެ ކަން ތަންފީޒުކުރައްވާނެ ކަމަށް އެ މަނިކުފާނު ވިދާޅުވިއެވެ.
މި މައްސަލައިގައި ވިޔަފާރިވެރިންނާއި ސަރުކާރާ ދެމެދު ހިޔާލު ތަފާތުވުން އުފެދިފައި ވަނިކޮށް މި ސަރުކާރަށް އެއް އަހަރު ފުރުން ފާހަގަ ކުރުމަށް ބޭއްވި ރަސްމިއްޔާތުގައި ރައީސް ވަނީ އެ ގަވާއިދު ބަދަލު ނުކުރައްވާނެ ކަމަށް ވިދާޅުވެފައެވެ. ޖެހޭނީ 500 ޑޮލަރު މާރުކުރަން ކަމަށް ރައީސް ވިދާޅުވިއެވެ.
ނަމަވެސް، ބައެއް ލުއިތައްދީ އެމްއެމްއޭއިން މި ފަހުން އަނެއްކާ ވެސް މި ވަނީ ބޭރު ފައިސާގެ ގަވާއިދު އެކުލަވާލައިފައެވެ. އެ ބަދަލުތައް ގާނޫނަކަށް ހެދުމަށްޓަކައި ބިލެއް އެކުލަވާލައި މިއަދު ވަނީ ރައްޔިތުންގެ މަޖިލީހަށް ހުށަހަޅާފައެވެ. ސަރުކާރުގެ ފަރާތުން މި ބިލު ހުށަހެޅުއްވީ ޕީއެންސީ ޕާލިމެންޓްރީ ގްރޫޕްގެ ލީޑަރު އަދި އިނގުރައިދޫ ދާއިރާގެ މެންބަރު އިބްރާހީމް ފަލާހުއެވެ.
ބިލުގައި ވާގޮތުގައި ޓޫރިސްޓުންނަށް ޚިދުމަތް ދޭ ތަންތަން ވަނީ ގިންތިތަކަށް ބަހާލާފައެވެ. އެއީ، "ކެޓެގަރީ-އޭ ޓޫރިޒަމް އެސްޓެބްލިޝްމަންޓް" އަދި "ކެޓެގަރީ-ބީ ޓޫރިޒަމް އެސްޓެބްލިޝްމަންޓް" އެވެ. މި ދެ ކެޓަގަރީން ވެސް އިޚުތިޔާރެއް ވަނީ ދީފައެވެ.
ކެޓެގަރީ-އޭ ޓޫރިޒަމް އެސްޓެބްލިޝްމަންޓްގައި ހިމެނެނީ ރަޖިސްޓަރީކޮށްފައިވާ ރިޒޯޓުތަކާއި، އިންޓަގްރޭޓަޑް ޓޫރިސްޓް ރިޒޯޓުތަކާއި، ޕްރައިވެޓް އައިލެންޑްތަކާއި އެނޫންވެސް ތަންތަނެވެ. މި ކެޓަގަރީން ހިދުމަތްދޭ ކޮންމެ ފަތުރުވެރިއެއްގެ ބޮލަކަށް 500 އެމެރިކާ ޑޮލަރު މާރުކުރަންޖެހެއެވެ. ނުވަތަ މަހެއްގެ ތެރޭގައި އެ އެސްޓެބްލިޝްމަންޓަކަށް ލިބޭ ބޭރު ފައިސާގެ އާމްދަނީގެ 20 ޕަސެންޓް މާރުކުރަންޖެހެއެވެ.
ކެޓެގަރީ-ބީ ޓޫރިޒަމް އެސްޓެބްލިޝްމަންޓްގައި ހިމެނެނީ ރަޖިސްޓަރީކޮށްފައިވާ ޓޫރިސްޓް އުޅަނދުތަކާއި، ޓޫރިސްޓް ހޮޓާތަކުގެ އިތުރުން ޓޫރިސްޓް ގެސްޓްހައުސްތަކެވެ. މި ކެޓަގަރީން ހިދުމަތް ހޯދާ ކޮންމެ ފަތުރުވެރިއެއްގެ ބޮލަކަށް 25 އެމެރިކާ ޑޮލަރު މާރުކުރަންޖެހެއެވެ. ނުވަތަ މަހެއްގެ ތެރޭގައި އެ އެސްޓެބްލިޝްމަންޓަކަށް ލިބޭ ބޭރު ފައިސާގެ އާމްދަނީގެ 20 ޕަސެންޓް މާރުކުރަންޖެހެއެވެ.
ލިބޭ އާމްދަނީގެ ޕަސެންޓެއް ބޭންކުތަކަށް މާރުކުރަން ޖެހޭ ގޮތް ހެދުމަކީ ޓޫރިޒަމް އިންޑަސްޓްރީގެ ކުރީގެ ވެސް ހުށަހެޅުމެކެވެ. ނަމަވެސް، އެމްއެމްއޭއާއި ސަރުކާރުން ފުރަތަމަ ނިންމީ އެ އިހުތިޔާރު ނުދީ ސީދާ ވަކި އަދަދަކަށް ޑޮލަރު މާރުކުރަން އެންގުމަށެވެ.