ފަތުރުވެރިންނަށް ޚިދުމަތްދޭ ތަންތަނަށް އަންނަ ކޮންމެ ފަތުރުވެރިއެއްގެ ބޮލަށް 500 ޑޮލަރު ރާއްޖޭގެ ބޭންކަކުން މާރުކުރުން ނުވަތަ ލިބޭ އާމްދަނީގެ 20 ޕަސެންޓް މާރު ކުރަން ޖެހޭ ގޮތަށް, އިޚްތިޔާރެއް ދިން ނަމަވެސް ލިބޭނެ އާމްދަނީއަށް މާ ބޮޑު ބަދަލެއް ނާންނާނެކަމަށް މަރުކަޒީ ބޭންކް، އެމްއެމްއޭގެ ގަވަރުނަރު އަހްމަދު މުނައްވަރު މިއަދު ވިދާޅުވެއްޖެއެވެ.
ބޭރު ފައިސާގެ ގަވާއިދު އެކުލަވާލައި އެ ބަދަލުތައް ގާނޫނަކަށް ހެދުމަށް ޓަކައި އެކުލަވައިލި ބިލުގައި، އިޚްތިޔާރު ދިނުމަށްފަހު މިއަދު ވަނީ ރައްޔިތުންގެ މަޖިލީހަށް ހުށަހަޅާފައެވެ.
އެ ބިލަށް ގެނައި މި ބަދަލާ ގުޅިގެން އެމްއެމްއޭގެ ގަވަރުނަރު މުނައްވަރު ނޫސްވެރިންނާ ބައްދަލުކުރައްވައި، ވިދާޅުވީ މި ބަދަލަކީ ފަތުރުވެރިކަމުގެ ދާއިރާގެ ބޭފުޅުންނާ ކުރެވުނު މަޝްވަރާތަކަށްފަހު އިތުރު ފަސޭހައެއް ދިނުމަށް ގެނައި ބަދަލެއް ކަމަށެވެ.
މުނައްވަރު ވިދާޅުވީ މި އިޚްތާޔާރު ދީފައި އޮތް ނަމަވެސް ބޭންކަށް މާރުކުރާނެ ކަމަށް ބެލެވޭ ޑޮލަރުގެ އަދަދަށް މާ ބޮޑު ބަދަލެއް އަންނާނެ ކަމަށް ނުބެލެވޭ ކަމަށެވެ.
މީގެ އިތުރުން އާމްދަނީގެ ވަކި ޕަސެންޓެއް މާރުކުރުމުގެ އިޚްތިޔާރު ދިނުމާމެދު ކުރިން ވެސް އެމްއެމްއޭގެ ތެރޭ މަޝްވަރާތަކެއް ކުރެވިފައި އޮތް ކަމަށް ވެސް މުނައްވަރު ވިދާޅުވިއެވެ.
ހަމައެއާއެކު މި ބަދަލާއެކު މި ކަމަށް ޚާއްސަ ގަވައިދުތަކެއް އެކުލަވައިލާ، ކޮންމެ ރިސޯޓަކުން ވެސް ކޮންމެވެސް އެއް ގޮތެއް ޚިޔާރުކުރަން ޖެހޭނެކަމަށް މުނައްވަރު ފާހަގަކުރެއްވިއެވެ.
މީގެ އިތުރުން މިހާރު ހުރިހާ ރިސޯޓަކުން ވެސް އެމްއެމްއޭގައި ރަޖިސްޓްރީވެ، އާމްދަނީއާ ގުޅޭ ބަޔާންތައް ހުށަހަޅަމުން އަންނަ ކަމަށް ވަނީ ފާހަގަކޮށްފައެވެ.
މި ބަދަލުގެ އިތުރުން ވެސް އެހެނިހެން ފަސޭހަތައް މި ބިލަށް ވަނީ ގެނެސްފައެވެ.
ސަރުކާރުގެ ފަރާތުން މިއަދު މި ބިލު ހުށަހެޅުއްވީ ޕީއެންސީ ޕާލިމެންޓްރީ ގްރޫޕްގެ ލީޑަރު އަދި އިނގުރައިދޫ ދާއިރާގެ މެންބަރު އިބްރާހީމް ފަލާހެވެ.
ބިލު ހުށަހެޅުމުގެ މަގުސަދަކީ ރާއްޖޭގައި ބޭރު ފައިސާއިން ކުރެވޭ މުއާމަލާތްތައް ކަނޑައަޅައި، ބޭރު ފައިސާ ރާއްޖެއަށް އެތެރެކުރުމާއި، ބޭރުކުރުމާއި، ބޭރު ފައިސާ ރާއްޖޭގައި ގެންގުޅުމާއި، ޖަމާކުރުމާއި، މަނާކުރުމާ ބެހޭ އުސޫލުތައް ކަނޑައެޅުމެވެ.
އަދި އެ ނޫން ވެސް ބޭރު ފައިސާއާ ބެހޭ މުއާމަލާތްތަކާ ގުޅޭ ހަމަތަކާއި އުސޫލުތައް ކަނޑައަޅައި ހިންގުމަށް ބޭނުންވާނޭ ކަމާބެހޭ ހަރުދަނާ އޮނިގަނޑެއް އެކުލަވާލުމެވެ.