ފަހު ވަގުތު ބެޓިސްއިން އެއްވަރުކުރުމުން ބާސާއަށް ލީޑު ގެއްލުމުގެ ބިރު ބޮޑުވެއްޖެ

ސްޕެނިޝް ލަލީގާގެ އެއްވަނައިގައި އޮތް އެފްސީ ބާސެލޯނާއަށް ރެއާލް ބެޓިސް ބަލިނުކުރެވި، ލީޑު ގެއްލިދާނެކަމުގެ ބިރު ހީވެއްޖެއެވެ.

ބެޓިސްގެ ދަނޑުގައި ކުޅުނު މި މެޗު ނިމުނީ 2-2 އިން އެއްވަރުވެގެންނެވެ. މެޗުގައި ބާސާއަށް ބެޓިސްގެ ގޯލަށް އަމާޒުކޮށް ފޮނުވާލެވިފައިވަނީ ކާމިޔާބުކުރި ދެ ލަނޑުގެ އިތުރުން އެންމެ ހަމަލާއެކެވެ. މެޗުގެ ފުރަތަމަ ލަނޑު ކާމިޔާބުކޮށް، ލީޑު ނަގާފައިވަނީ ބާސާއިންނެވެ. މި ލަނޑު އެ ޓީމަށް 39 ވަނަ މިނެޓުގައި ކާމިޔާބުކޮށްދީފައިވަނީ ރޮބަޓް ލެވަންޑޯސްކީއެވެ.

މެޗުގައި ބެޓިސްއިން ކާމިޔާބުކުރި ފުރަތަމަ ލަނޑު މެޗުގެ 68 ވަނަ މިނެޓުގައި ކާމިޔާބުކޮށް، ނަތީޖާ ހަމަހަމަކޮށްފައިވަނީ ލިބުނު ޕެނަލްޓީއަކުން ޖިއޮވާނީ ލޮ ސެލްސޯއެވެ. ބާސާގެ ދެވަނަ ލަނޑު މެޗުގެ 82 ވަނަ މިނެޓުގައި ކާމިޔާބުކޮށް، އެ ޓީމަށް ދެވަނަ ފަހަރަށް ލީޑު ނަގައިދިނީ ފެރާން ޓޯރޭޒެވެ. މި ލަނޑާ އެކު މެޗުން ބާސާ މޮޅުވެދާނެ ކަމަށް ހީވި ނަމަވެސް ބެޓިސްއިން ހިތްވަރު އެލުވައިނުލާ ކުޅުމުގެ ނަތީޖާއަކަށްވީ މެޗުގެ އިތުރު ވަގުތުގެ ހަތަރުވަނަ މިނެޓުގައި އަސާން ޑިއާއޮ ކާމިޔާބުކޮށްދިން ލަނޑުން ނަތީޖާ ހަމަހަމަކުރުމެވެ.

މި މެޗު އެއްވަރުވުމާއެކު ބާސާ މިހާރު އެއްވަނައިގައި އޮތީ 38 ޕޮއިންޓާ އެކުއެވެ. ދެވަނައިގައި އޮތް އެންމެ ފަހުގެ ޗެމްޕިއަން ރެއާލް މެޑްރިޑް 33 ޕޮއިންޓާ އެކު އޮތް ނަމަވެސް އެ ޓީމު ނުކުޅެ ދެ މެޗު އޮތުމާ އެކު ބާސާގެ ލީޑު ގެއްލުމުގެ ފުރުސަތު އެބައޮތެވެ. މެޗުން ލިބުނު ޕޮއިންޓާ އެކު ބެޓިސް އޮތީ 21 ޕޮއިންޓާ އެކު 11 ވަނައިގައެވެ.