ގައުމު ދެކެ ލޯބިވާ، ގައުމީވަންތަ، ޒިންމާދާރު ކުދިންތަކެއް ބިނާކުރުމަށް ޓަކައި އަޒުމް ކަނޑައަޅަން ޖެހޭކަމަށް ރައީސް ޑރ. މުޙައްމަދު މުއިއްޒު މިއަދު ވިދާޅުވެއްޖެއެވެ.
އެ މަނިކުފާނު މިފަދައިން ވިދާޅުވީ މާފަންނު މަދަރުސާގެ 40ވަނަ އަހަރީ ދުވަސް ފާހަގަކުރުމަށް މިއަދު ހަވީރު ބޭއްވި ޖަލްސާގައެވެެ.
އެ ސްކޫލުގެ ތުއްތު ދަރިވަރުންނަށް އިޝާރާތްކުރައްވައި ރައީސް ވިދާޅުވީ އެ ކުދިންނަކީ މާދަމާ ގައުމުގެ ކަންކަމުގައި ހަވާލުވެ ތިބޭނެ ހުނަރުވެރި ކުދިން ކަމަށެވެ. އަދި ރަނގަޅު ބިންގަލެއްގައި އެ ކުދިން ބޮޑުވާ މަންޒަރު ފެނުމަކީ ލިބިވަޑައިގަންނަވާ ހިތްވަރެއްކަމަށް ވެސް ރައީސް ވިދާޅުވިއެވެ.
"އަޅުގަނޑުމެން އެންމެން އެކުގައި ރާއްޖޭގައި އަޅުގަނޑުމެން ބޭނުންވާ ގޮތަށް މާތްވެގެންވާ އިސްލާމްދީނުގެ ވަރުގަދަ އަގީދާގެ މަތީގައި ތިބި ދިވެހި ގައުމުދެކެ ލޯބިވާ، ގައުމިއްޔަތުގެ ރޫހު ފުރިހަމައަށް އަޝަގަނެފައިވާ ދިވެހި ލޮބުވެތި ދަރިންތަކެއް، ގައުމުގެ މުސްތަގްބަލާ ހަވާލުވެވޭނެ ފަދަ ޒިންމާދާރު ދަރިންތަކެއް ބިނާކުރުމުގައި އަޅުގަނޑުމެން އެންމެން އެކުގައި ގައުމީ ވިސްނުމެއްގައި މަސައްކަތް ކުރުމަކީ މިއަދު އަޅުގަނޑުމެން އަޒުމް ކަނޑައަޅަންޖެހޭ ކަމެއް،" ރައީސް ވިދާޅުވިއެވެ.
އެ މަނިކުފާނު ވިދާޅުވީ ރާއްޖެއަކީ އުޖާލާ މުސްތަގްބަލެއް އޮތް ގައުމެއް ކަމަށެވެ.
އެއާއެކު ރައީސްވަނީ މި ފެށޭ އަހަރު މާފަންނު މަދަރުސާގައި ފަސޭހައިން ބޭނުންކުރެވޭނެހެން އާ ހޯލެއް، ތިރީގައި ތަރައްގީ ކޮށްދޭނެ ކަމަށް ވިދާޅުވެފައެވެ. އަދި ސަރުކާރުން މާފަންނު މަދަރުސާގެ ކުރިއެރުމަށް ކޮށްދެވެން ހުރި ކަންކަން ކޮށްދެއްވާނެ ކަމުގެ ޔަގީންކަން ރައީސް ވަނީ ދެއްވައިފައެެވެ.
އެ މަނިކުފާނު ވިދާޅުވީ ކޮމިއުނިޓީ ސްކޫލުތަކަކީ ވަރަށް މުހިންމު ތަންތަން ކަމަށެވެ. މި ފަދަ ކޮމިއުނިޓީ ސްކޫލުތައް ހިންގަން ލާމަރުކަޒީ ނިޒާމުގެ ތެރެއިން ކައުންސިލްތަކާ ހަވާލުކުރެވިފައިވާއިރު އެ ފަދަ ސްކޫލުތަކަށް ބޭނުންވާ ކަންކަން ފަހިކޮށްދިނުމަށް ސަރުކާރާ ގުޅިގެން މަސައްކަތްކުރުމަށް ރައީސް ވަނީ ކައުންސިލްތަކަށް އިރުޝާދު ދެއްވައިފައެވެ.
އަދި އެޑިއުކޭޝަން މިނިސްޓްރީގައި އެދިފައިވާ ކަންކަމާއި، އެދޭ ކަންކަން ފަހިކޮށްދޭނެކަމަށް ވެސް ރައީސް ވިދާޅުވިއެވެ.
އިތުރަށް ވާހަކަފުޅުދައްކަވަމުން ރައީސް ވިދާޅުވީ އެޑިއުކޭޝަން މިނިސްޓްރީން މިހާރު އަންނަނީ ސެން ޓީޗަރުން ތަމްރީނުކުރުމަށް އާ ޕްރޮގްރާމެއް، އަ ކޮންސެޕްޓަކަށް ފަަށަން ތައްޔާރުވަމުން ކަމަށެވެ.
އެ ޕްރޮގްރާމްގެ ބޭނުމަކީ ހުރިހާ ޓީޗަރުންނަށް ވެސް ޚާއްސަ އެހީއަށް ބޭނުންވާ ކުދިންނަށް ކިޔަވައިދޭނެ ގޮތް އެންގުން ކަމަށާއި، އަދި އެ ދާއިރާއަށް ޚާއްސަ ޓީޗަރުން ބިނާކުރުން ކަމަށް ރައީސް ވިދާޅުވިއެވެ.
މިއީ ރާއްޖޭގެ ހުރިހާ ސަރަހައްދެއްގައި ހުރި އެ ފަދަ ސްކޫލުތަކަށް އަމާޒުވާނެ ޕްރޮގްރާމެއް ކަމަށް ވިދާޅުވިއެެވެ. އަދި ޑިޕްލޮމާއާއި ޑިގްރީއާ ހަމައަށް މި ޕްރޮގްރާމްތަކުން އެކި ދުވަސްވަރު އެކި ޓީޗަރުން ތަމްރީނުކުރެވޭނެ ކަމަށް އުންމީދުކުރައްވާ ކަމަށް ރައީސް ވިދާޅުވިއެެވެ.