ފޮތްތައް ނުލިބިގެން ކަންބޮޑުވުން؛ މިނިސްޓްރީން ބުނީ ސްކޫލް ފެށެންވާއިރަށް ލިބޭނެ ކަމަށް

ދަރިވަރުންތަކެއް ސްކޫލުގައި: އެޑިއުކޭޝަން މިނިސްޓްރީއިން ބުނީ ސްކޫލު ފެށެންވާއިރަށް ފޮތްތައް ހަވާލުކޮށް ނިންމާނެ ކަމަށް -- ސަން ފޮޓޯ/ ފަޔާޒު މޫސާ

އަންނަ ހަފުތާގައި ސްކޫލު ހުޅުވެން ވާއިރަށް، ދަރިވަރުންނަށް ފޮތްތައް ހަވާލުކޮށް ނިންމާނެ ކަމަށް އެޑިއުކޭޝަން މިނިސްޓްރީން މިއަދު ބުނެފިއެވެ.

އެންމެ ފަހުގެ ދިރާސީ އަހަރު ނިންމައި، ދަރިވަރުން ބޮޑު ޗުއްޓީއަށް ދިޔައީ ރޯދަ މަހާ ދިމާކޮށް، ފެބްރުވަރީ މަހުގެ 27ގައެވެ. އައު ދިރާސާ އަހަރު ފެށޭނީ އަންނަ ހަފުތާގެ ހޯމަ ދުވަހެވެ.

ސްކޫލް ފެށެން ކުޑަ ދުވަސްކޮޅަކަށް ވެފައިވާއިރު ސޯޝަލް މީޑިއާގައިއާއި، ސްކޫލް ގުރޫޕުތަކުގައި ވެސް ބައެއް ބެލެނިވެރިން އަންނަނީ ފޮތް ލިސްޓު ހަމަނުވާ ކަމުގެ ކަންބޮޑުވުން ފާޅުކުރަމުންނެވެ. އެގޮތުން ދަރިވަރުންގެ ޓެކްސްޓް ފޮތްތަށް ނުލިބޭތީއާއި ފޮތަތަކަށް ސެލޯފިން ލައްވައި ތައްޔާރުކުރުމުގެ ކަންކަން ނުކުރެވޭތީ އެ ބެލެވެރީން އަންނަނީ ޝަކުވާ ކުރަމުންނެވެ.

މިކަމާ ގުޅިގެން މިއަދު "ސަން"އިން ސުވާލު ކުރުމުން އެޑިއުކޭޝަން މިނިސްޓްރީގެ މީޑިއާ އޮފިޝަލް ވިދާޅުވީ، ދަރިވަރުން ކިޔެވުމަށް ބޭނުންވާ ޓެކްސްޓް ފޮތްތައް ސްކޫލު ހުޅުވުމުގެ ކުރީން ސުކޫލުތަކާ ހަވާލުކުރާނެ ކަމަށެވެ.

އޭނާ ވިދާޅުވީ މާލެ ސަރަހައްދުގެ ސްކޫލުތަކަށް މާދަމާ ފޮތްތައް ބަހަން ފަށާނެ ކަމަށެވެ. ދެ ދުވަހެއްގެ ތެރޭގައި އެ މަސައްކަތް ނިމޭނެ ކަމަށާއި އަތޮޅުތެރޭގެ ސްކޫލުތަކަށް ލޯންޗުތަކުގައި ފޮތްތައް ބެހުމުގެ މަސައްކަތް މިހާރު ވެސް ކުރަމުން އަންނަކަމަށް އޮފިޝަލް ވިދާޅުވިއެވެ.

މީގެ އިތުރުން، މޫސުން ރަނގަޅުނަމަ، ސްކޫލު ހުޅުވުމުގެ ކުރީން ރާއްޖޭގެ ހުރިހާ ހިސާބުތަކަށް ފޮތްތައް ލިބޭނެ ކަމަށް އޮފިޝަލް ވިދާޅުވިއެވެ.

އަންނަ ހަފުތާގައި ފަށާ ދިރާސާ އަހަރު އަންނަ ޑިސެމްބަރު މަހުގެ 25އަށް ނިމެނޭއެވެ. އެއަށްފަހު އައު ދިރާސީ އަހަރު ފަށާނީ ޖަނަވަރީ 27ގައެވެ.

ދިރާސާ އަހަރު ޖަނަވަރީ މަހު ފަށާ ގޮތަށް ބަދަލު ގެނައުމަކީ ރައީސް ޑރ. މުޙައްމަދު މުއިއްޒުގެ ރިޔާސީ ވައުދުފުޅެކެވެ.

comment ކޮމެންޓް