މުސާރަ ނުލިބޭ ކަމަށް ބުނެ، މުލިއާގެ ކައިރިއަށް މިއަދު އެއްވި 55 ބިދޭސީންގެ މައްސަލަ ބެލުމުގައި ލޭބާ ރިލޭޝަންސް އޮތޯރިޓީން ވެސް ހަރަކާތްތެރިވަމުން އަންނަކަމަށް އިމިގްރޭޝަން ކޮންޓްރޯލަރު ޝަމްއާން ވަހީދު މިއަދު ވިދާޅުވެއްޖެއެވެ.
ގިނަ އަދަދެއްގެ ބިދޭސީން މުލިއާގެ ކައިރީގައި ތިއްބާ ފުލުހުން ގޮސް، މަޖީދިއްޔާ ސްކޫލާ ހިސާބަށް ފަހަތަށް ޖައްސާ މަންޒަރު ފެންނަ ވީޑިއޯތަކެއް ސޯޝަލް މީޑިއާގައި އާންމުވެފައިވެއެވެ.
އެ އެއްވުމާ ގުޅޭ ގޮތުން ފުލުހުން "ސަން"އަށް ބުނީ، މުސާރަ ނުދޭ ކަމަށް ބުނެ ބިދޭސީންތަކެއް މުލިއާގެއާ ހިސާބުގައި ހިތްހަމަނުޖެހުން ފާޅުކުރަމުންދާ މައްސަލައަކާ ގުޅިގެން ފުލުހުން އެޓެންޑުވި ކަމަށެވެ.
ފުލުހުން ބުނީ އެ މީހުން މިހާރު އިމިގްރޭޝަންގެ ބެލުމުގެ ދަށަށް ގެންގޮސްފައިވާ ކަމަށާއި އޭގެ ތެރޭގައި ހިމެނެނީ އިންޑިއާގެ 38 މީހުންނާއި ބަންގްލަދޭޝްގެ 17 މީހުން ކަމަށެވެ.
އެ ކަމާ ގުޅިގެން ޝަމްއާން ވިދާޅުވީ މި މައްސަލައާ ގުޅިގެން ބަލަންޖެހޭ ކަންކަން މިވަގުތު ބަލަމުން އަންނަކަމަށެވެ. އަދި މި ބިދޭސީންނާ މެދު އަޅަންޖެހޭ ފިޔަވަޅެއް އަޅާނީ މައްސަލަ އެއްކޮށް ތަހުގީގުކޮށް ނިމުމުން ކަމަށް ވިދާޅުވިއެވެ.
"މި ބިދޭސީންގެ ހައްގުތަކެއް ގެއްލިފައިވާކަމަށް އެފަރާތްތަކުން ބުނަމުންދާތީ، މިވަގުތު ލޭބާ ރިލޭޝަންސް އޮތޯރިޓީގެ ބޭފުޅުން ވެސް ދަނީ އިމިގްރޭޝަންގެ ޑިޓެންޝަން ސެންޓަރުގައި ހަރަކާތްތެރިވަމުން،" ޝަމްއާން ވިދާޅުވިއެވެ.
އިމިގްރޭޝަނުން ދޫކޮށްފައިވާ ހުއްދައިގެ ދަށުން ރާއްޖޭގައި އުޅޭ އެއްވެސް މީހަކަށް ރާއްޖޭގެ ޤާނޫނާއި ޤަވާއިދުތަކާއި ޚިލާފުވާން ފުރުސަތު ނުދެވޭނެކަމަށް ވެސް އޭނާ ވިދާޅުވިއެވެ.
އިއްޔެ ވެސް އާޓިފިޝަލް ބީޗުގައި ބިދޭސީންތަކެއް ހަމަނުޖެހުމެއް ހިންގި މައްސަަލައެއް ފެންމަތިވިއެވެ.