ޖަމާލުއްދީން ސްކޫލުގެ ސޯޝަލް މީޑިއާ އެކައުންޓުތަކުގައި ހިއްސާކޮށްފައިވާ ވީޑިއޯތަކާއި ފޮޓޯތަކުން ދައްކުވައިދެނީ ކެލިގްރަފީގެ ރީތި އިބާރާތްތަކެކެވެ. މި ރީތި އިބާރާތްތަކުން އެ ސްކޫލުގެ ފާރުތައް ވަނީ ފަޅު ފިލުވައިދީފައެވެ. ފޮޓޯތަކުންނާއި ބަލާބެލުމަށް ވެސް މިއީ ވަރަށް ފުރިހަމަ މަސައްކަތެކެވެ. ނަމަވެސް މި ކެލިގްރަފީގެ ފަހަތުގައި ވަނީ މާ ފުރިހަމަ ވާހަކައެކެވެ.
މިއީ އެ ސްކޫލުގައި ތައުލީމު ހާސިލްކުރަމުންދާ ދަރިވަރު ހުސައިން ނާއިޝްގެ މަސައްކަތެކެވެ. އޭނާ އަކީ އުފެދުމުގައި އަޑު އިވުމާއި ވާހަކަ ދެއްކުމުން މަހުރޫމުވެފައިވާ ކުއްޖެކެވެ. ނަމަވެސް، މިއަދު އޭނާ މުޅި ދުނިޔެއަށް ވެސް ސާބިތުކޮށްދެނީ އެއީ ފަސްޖެހި އިސްޖަހަންވީ ސަބަބެއް ނޫންކަމެވެ. އަޑި ނީވުނަސް އޭނާގެ ހުނަރުވެރިކަމުގެ އަޑު އޭނާ އެންމެންނަށް އިއްވައިފިއެވެ.
ޖަމާލުއްދީން ސްކޫލުން ވަނީ އޭނާގެ ކުރެހުމުގެ ފޮޓޯތަކާއި ވީޑިއޯތައް ހިއްސާކޮށްފައެވެ. މި ވީޑިއޯގައި އަތުގެ އިޝާރާތުން އޭނާ ވަނީ ސްކޫލުން ފޯރުކޮށްދިން މި ފުރުސަތަށް ޝުކުރު އަދާކޮށްފައެވެ. އަދި ދޭ އެހީތެރިކަމާއި ހިތްވަރަށް ވެސް ޝުކުރު އަދާކޮށްފައެވެ.
ނާއިޝް ޖަމާލުއްދީން ސްކޫލުގެ ފާރުގައި ކުރެހި ކެލިގްރަފީއާއެކު -- ފޮޓޯ/ ޖަމާލުއްދީން ސްކޫލް
އެނާ ބުނީ ސްކޫލުގެ ފާރުތަކުން އޭނާގެ މަސައްކަތް ފެނުމުން އުފާވެ ހިތްހަމަ ޖެހޭކަމަށެވެ. އަދި މިއީ އަބަދުވެސް ދެކެމުން އައި ހުވަފެނެއް ކަމަށް އޭނާ ބުންޏެވެ.
ށ. ކަނޑިތީމަށް އުފަން، ނާއިޝް އަކީ އެންމެ ކުޑައިރުއްސުރެ ވެސް ހުނަރުވެރި ކުރެހުންތެރިއެކެވެ.
ކުލާސް ގަޑީގައި ވެސް އޭނާ އެންމެ ޝައުގުވެރިކަމާއެކު ކުރާ ކަމަކީ ކުރެހުމެވެ. އެ ދުވަސްވަރު ނާއިޝް އެންމެ ޝައުގުވެރިކަމާއެކު ކުރަހަނީ މާލެއާއި ކަނޑިތީމާ ދެމެދު ދަތުރުކުރާ "އުޅިއަށި" ބޯޓެވެ. ފަތިގަނޑު ޖައްސައިގެން ސީދާ ރޮނގުތަކެއް އަޅަމުން އެ ބޯޓުގެ ކުދި ކުދި ތަފްސީލުތައް އޭނާ ފަރިތަކަމާއެކު ކުރަހާލައެވެ.
ގުރޭޑު ހަތަރެއް ނިންމުމަށްފަހު އާއިލާއާއެކު ނާއިޝް ކިޔަވަން މާލެއައިސް ޖަމާލުއްދީން ސްކޫލުގައި ތައުލީމު ހާސިލު ކުރަން ފެށިއެވެ. ރަށުގައި ކިޔެވިއިރު ދިމާވި ދަތިތަކާ ދުރުވެ ދެކެމުން އައި ހުވަފެންތައް ހަގީގަތަކަށް ހެދުމަށްޓަކައިއެވެ.
ނާއިޝް ޖަމާލުއްދީން ސްކޫލުގެ ފާރުގައި ކުރެހި ކެލިގްރަފީއާއެކު -- ފޮޓޯ/ ޖަމާލުއްދީން ސްކޫލް
މީގެ ކުރިން "ސަން"އަށް ދިން އިންޓަވިއުއެއްގައި ނާއިޝް ބުނީ ޖަމާލުއްދީން ސްކޫލުން ތައުލީމު ހާސިލު ކުރަން ފެށި ފަހުން އޭނާގެ ކިޔެވުމަށާއި ކުރެހުމަށް ވެސް ބޮޑު ކުރިއެރުމެއް އައިކަމަށެވެ.
"ޖަމާލުއްދިން ސްކޫލަށް ޖޮއިން ކުރި ފަހުން ކިޔެވުމުން ވެސް ކުރިއަށް ދެވުނު. ހަމަ އެއާ އެއްވަރަށް ކުރެހުމުންވެސް ކުރިއަށް ދެވުނު. އިތުރު ފުރުސަތުތައް ވެސް ލިބުނު،" ނާއިޝް ކިޔައިދިނެވެ.
ކެލިގްރަފީއަކީ ވެސް އޭނާ އެންމެ ޝައުގުވެރިކަމާއެކު ކުރާ އެއް މަސައްކަތެވެ. ނާއިޝްގެ ހިތުގައި ފުރަތަމަ މިކަމަށް ޝައުގުވެރިކަން އުފެދުނީ ކޮވިޑުގެ ދުވަސްވަރުގައެވެ. އަޑު ނީވޭ ކުއްޖަކަށް ވުމުން ނާއިޝް ޤުރުއާން ކިޔަވަނީ ސައިން ލޭންގުއޭޖުންނެވެ. އެގޮތަށް ޤުރުއާން ކިޔަވަމުން ދަނިކޮށް ނާއިޝްގެ ހިތުގައި އަރަބި ލިއުމަށް ޝައުގުވެރިކަން އުފެދުނީއެވެ.
ނާއިޝް ޖަމާލުއްދީން ސްކޫލުގެ ފާރުގައި ކުރެހި ކެލިގްރަފީއާއެކު -- ފޮޓޯ/ ޖަމާލުއްދީން ސްކޫލް
އަރަބިކް ކެލިގްރަފީ ދަސްކުރަން ނާއިޝް އެންމެ ފުރަތަމަ އަޅަން ފެށީ ﷲ ގެ އިސްމުފުޅެވެ. އެއަށް ފަހު ބިސްމި އެވެ. ފިޔަވަޅަކަށް ފަހު ފިޔަވަޅެއް އަޅަމުން ގޮސް، މިހާރު ދިގު ލިޔުންތައް ބޮޑު އަކުރުކޮށްގެން އޭނާ ލިޔެއެވެ. ވަށް ކެންވަސްއެއްގައި ރަންއަކުރުން “އައް ރަޙްމާން” ސޫރަތް ލިޔުމަށް ކުރި މަސައްކަތަކީ އޭގެތެރެއިން އޭނާ އެންމެ ހިތްހަމަޖެހޭ މަސައްކަތެވެ.
ނާއިޝް ދަނީ އެތައް ގޮތަކުން އެތައް ބަޔަކު އޭނާގެ ކުރެހުމުގެ ޖާދުލުގައި ޖައްސަމުންނެވެ. އެގޮތުން ކުރެހުމުގެ މައުރަޒުތަކުގައި ވެސް ނާއިޝް އޭނާގެ ކުރެހުމުގެ ހުނަރު ދައްކައެވެ.
ނާއިޝް ދުވަހަކުވެސް ކުރެހުން ހުއްޓާލާކަށް ބޭނުމެއް ނުވެއެވެ. އެ ހުނަރު އޭނާއަށް ދެއްވި ކަމަށްޓަކައި އަބަދާއަބަދު މާތް ރަސްކަލާނގެއަށް ޝުކުރުވެރިވެއެވެ.