މުސާރަ ނުލިބޭ ކަމަށް ބުނެ، މުލިއާގެ ކައިރިއަށް މިއަދު އެއްވި 55 ބިދޭސީން އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.
ގިނަ އަދަދެއްގެ ބިދޭސީން މުލިއާގެ ކައިރީގައި ތިއްބާ ފުލުހުން ގޮސް، މަޖީދިއްޔާ ސްކޫލާ ހިސާބަށް ފަހަތަށް ޖައްސާ މަންޒަރު ފެންނަ ވީޑިއޯތަކެއް ސޯޝަލް މީޑިއާގައި އާންމުވެފައިވެއެވެ.
އެ އެއްވުމާ ގުޅޭ ގޮތުން ފުލުހުން "ސަން"އަށް ބުނީ، މުސާރަ ނުދޭ ކަމަށް ބުނެ ބިދޭސީންތަކެއް މުލިއާގެއާ ހިސާބުގައި ހިތްހަމަނުޖެހުން ފާޅުކުރަމުންދާ މައްސަލައަކާ ގުޅިގެން ފުލުހުން އެޓެންޑުވި ކަމަށެވެ.
ފުލުހުން ބުނީ އެ މީހުން މިހާރު އިމިގްރޭޝަންގެ ބެލުމުގެ ދަށަށް ގެންގޮސްފައިވާ ކަމަށާއި އޭގެ ތެރޭގައި ހިމެނެނީ އިންޑިއާގެ 38 މީހުންނާއި ބަންގްލަދޭޝްގެ 17 މީހުން ކަމަށެވެ.
ބިދޭސީން އެއްވި ސަރަހައްދުގައި ފުލުހުން: އެ ސަރަހައްދުން 55 ބިދޭސީން އިމިގްރޭޝަންގެ ބެލުމުގެ ދަށަށް ގެންދިޔަ -- ސަން ފޮޓޯ/ ނާއިޝް ނާހިދު
މިއަދުގެ އެއްވުމުގައި ބައިވެރިވެފައި ވަނީ ކޮން ކުންފުންޏަކަށް ނުވަތަ ކުންފުނިތަކެއްގެ ދަށުން މަސައްކަތް ކުރާ މީހުންނެއް ކަމަށް މިހާތަނަށް ކަށަވަރު ވެފައި ނުވެއެވެ.
ބިދޭސީން ރާއްޖެ ގެނައުމަށް ފަހު މަސައްކަތް ކުރުވައި، މުސާރަ ނުދޭ މައްސަލައަކީ އާންމު މައްސަލައެކެވެ. އެފަދަ މައްސަލަތަކުގައި މީގެ ކުރިން ވެސް ބިދޭސީން އެއްވުންތައް ބާއްވައި، މުޒާހަރާކޮށްފައިވެއެވެ.
މިއަދުގެ އެއްވުން ބާއްވައިފައިވަނީ، އިއްޔެ އާޓިފިޝަލް ބީޗުގައި ބިދޭސީންގެ މެދުގައި ހިނގި މާރާމާރީއެއްގެ މައްސަލަ ފުލުހުން ބަލަމުން ގެންދަނިކޮށެވެ.
އިމިގްރޭޝަނުން ވަނީ އެ މާރާމާރީގައި ބައިވެރިވި ބިދޭސީންނާ މެދު ފިޔަވަޅު އަޅާނެ ކަމަށް ބުނެފައެވެ.