އަންނަ ހަފުތާގައި މުޒާހަރާއެއް ބޭއްވުމަށް ގޮވައިލައްވައި، މަދަނީ ބަސްނޭހުމުގެ ހަރަކާތެއް ފަށާނެ ކަމަށް ޖަލުގައި ހުންނެވި ޕާކިސްތާނުގެ ކުރީގެ ބޮޑު ވަޒީރު އިމްރާން ޚާން އޭނާއަށް ތާއީދު ކުރާ މީހުންނަށް ވިދާޅުވެއްޖެއެވެ.
ބުރާސްފަތި ދުވަހު އެކްސްގައި ކުރި ޕޯސްޓެއްގައި ޚާން ވަނީ އޭނާގެ ޕާކިސްތާން ތަހްރީކް އިންސާފް (ޕީޓީއައި) ޕާޓީން ވެރިކަންކުރާ ޚައިބަރު ޕަޚްތުންޚްވާ ޕްރޮވިންސްގެ ވެރިރަށް ހުޅަނގު އުތުރުގެ ސިޓީ ޕެޝަވާރަށް ޑިސެމްބަރު 13ވަނަ ދުވަހު ސަޕޯޓަރުން އެއްވުމަށް އެދިވަޑައިގެންފައެވެ.
އޭނާ އެ ކަމަށް އެދިވަޑައިގެންފައި ވަނީ އެ ޤައުމުގެ ވެރިރަށް އިސްލާމްއާބާދުގައި އޭނާގެ ސިޔާސީ ޕާޓީން އެއްވުންތަކެއް ބާއްވައި ބޮޑެތި ހަމަނުޖެހުންތަކެއް ހިންގިތާ ދުވަސްކޮޅެއް ފަހުންނެވެ.
ނޮވެމްބަރު މަހުގެ 25ވަނަ ދުވަހު ޕާކިސްތާނުގެ ވެރި ރަށް އިސްލާމްއާބާދުގައި ހިންގި ހަމަނުޖެހުންތަކުގައި 12އަށްވުރެ ގިނަ މީހުން މަރުވިކަން ފާހަގަކުރައްވާ އިމްރާން ވިދާޅުވީ އެ ހާދިސާގެ މައްޗަށް ޝަރުއީ ތަހުގީގެއް ހިނގަންޖެހޭކަމަށެވެ. އަދި މިދިޔަ އަހަރުގެ މެއި މަހުގެ 9ވަނަ ދުވަހު ހިންގި ހަމަނުޖެހުންތަކުގައި 8 މީހުން މަރުވި މައްސަލަ ވެސް ބަލަންޖެހޭ ކަމަށް އޭނާ ވިދާޅުވިއެވެ.
އޭގެ އިތުރުން ހައްޔަރުކޮށްފައިވާ ހުރިހާ ސިޔާސީ މަސައްކަތްތެރިން މިނިވަން ކުރަން ވެސް އޭނާ ޝަރުތުކުރެއްވިއެވެ. އެ ގޮތަށް ކަންތައް ނުކޮށްފިނަމަ މަދަނީ ބަސްނޭހުމުގެ ހަރަކާތެއް އަނެއްކާ ވެސް ފަށްޓަވާނެކަމުގެ އިންޒާރު އޭނާ ދެއްވިއެވެ.
"މި ކަންތައްތައް މިގޮތަށް ކުރިއަށް ނުގެންގޮސްފިނަމަ، ޑިސެމްބަރު 14އިން ފެށިގެން މަދަނީ ނުކިޔަމަންތެރިކަމުގެ ހަރަކާތެއް ފަށާނެ، އަދި އޭގެ ސަބަބުން ނުކުންނަ ނަތީޖާއެއްގެ ޒިންމާ ނަގާނީ ސަރުކާރުން." އިމްރާން ވިދާޅުވިއެވެ.
ނޮވެމްބަރު 25ވަނަ ދުވަހު ބޭއްވި މުޒާހަރާގައި މީހަކު މަރުވިކަން ސަރުކާރުން ދޮގުކުރެއެވެ. ސަރުކާރުން ބުނާގޮތުގައި އިމްރާނަށް ތާއީދުކުރާ މީހުން ވަނީ މިދިޔަ އަހަރުގެ މެއި މަހުގެ 9ވަނަ ދުވަހު އަސްކަރީ މަގާމުތަކަށް ހަމަލާ ދީފައެވެ.
މެއި މަހުގެ 9ވަނަ ދުވަހުގެ ހަމަލާތައް ރާއްވަވައި ހިންގުމަށް އިރުޝާދު ދެއްވި ކަމުގެ ތުހުމަތުގައި އިމްރާންގެ މައްޗަށް ދައުވާކޮށްފައިވާއިރު، އޭނާވަނީ އެ ތުހުމަތުތަކަށް އިންކާރުކުރައްވާފައެވެ. މި ދައުވާއަކީ މިދިޔަ އަހަރުގެ ފަހުކޮޅުން ފެށިގެން އިމްރާންގެ މައްޗަށް އުފުލާފައިވާ އެތައް މައްސަލައެއްގެ ތެރެއިން އެންމެ ފަހުގެ ދައުވާއެވެ.
ޕީޓީއައި އިން އަންނަނީ އެމަނިކުފާނު މިނިވަންކުރުމަށް ގޮވާލަމުންނެވެ. އިމްރާނަކީ މިހާރުގެ ބޮޑު ވަޒީރު ޝެހްބާޒް ޝަރީފާ އިދިކޮޅުގައި އެންމެ ވާދަވެރި ފަރާތެވެ. ޕާކިސްތާނުގެ ސިޔާސީ މަޝްރަހު ދިރާސާކުރާ ބައެއް ފަރާތްތަކުންނާއި ޕީޓީއައިއިން ބުނާ ގޮތުގައި، އިމްރާންގެ މައްޗަށް ކޮށްފައިވާ ދައުވާތަކަކީ ސިޔާސީ ގޮތުން ކޮށްފައިވާ ދައުވާތަކެކެވެ.
މަދަނީ ބަސްނޭހުމަކަށް ދާނެ ކަމަށް ވިދާޅުވެފައިވާއިރު، އިމްރާންގެ އަނބިކަނބަލުން ބުޝްރާ ބީބީ ހައްޔަރު ކުރުމުގެ އަމުރެއް ވެސް އެ ގައުމުގެ ކޯޓަކުން ބުރާސްފަތި ދުވަހު ވަނީ ނެރެފައެވެ.
ބުޝްރާ ހައްޔަރުކުރުމުގެ އަމުރެއް ނެރެފައި ވަނީ ޚިޔާނާތުގެ މައްސަލައެއްގެ އަޑުއެހުންތަކަށް ތަކުރާރުކޮށް ހާޒިރު ނުވުމުން ކަމަށް ޕާކިސްތާނުގެ މީޑިއާތަކުން ބުނެއެވެ.
ބުޝްރާ ކަފާލާތުގެ ދަށުން ދޫކޮށްލާފައި ވަނީ އޮކްޓޫބަރު މަހުއެވެ. ބުޝްރާ ޖަލަށްލާފައި ވަނީ 2018 އިން 2022އަށް އިމްރާންގެ ވެރިކަމުގައި އޭނާގެ ސަރުކާރަށް ލިބުނު ހަދިޔާތައް ގަވާއިދާ ޚިލާފަށް ވިއްކުމާ ގުޅޭ މައްސަލައެއްގައެވެ.