އިނގިރޭސި ޕްރިމިއާ ލީގުގައި ފުލަމުން ބްރައިޓަން އެންޑް ހޯވް އެލްބިއަން ބަލިކޮށްފިއެވެ.
ފުލަމްގެ ދަނޑުގައި ކުޅުނު މި މެޗު އެ ޓީމުން ކާމިޔާބުކޮށްފައިވަނީ 3-1 އިންނެވެ.
މެޗުގެ ހަތަރުވަނަ މިނެޓުގައި ބްރައިޓަންގެ ކީޕަރު ބާޓް ވާބްރޫގެންއަށް ހެދުނު ގޯހެއްގެ ފައިދާ ނަގައި ފުލަމުން ވަނީ މެޗުގެ ފުރަތަމަ ލަނޑު ކާމިޔާބުކޮށް، ލީޑު ނަގައިފައެވެ. މި ލަނޑު އެ ޓީމަށް ކާމިޔާބުކޮށްދިނީ އެލެކްސް އިވޯބީއެވެ. މި ލަނޑު ޖެހިތާ މާ ގިނައިރުތަކެއްނުވެ، އިވާބީއަށް ވަނީ ލީޑު ފުޅާކުރާނެ ރަނގަޅު ފުރުސަތެއް ވެސް ލިބިފައެވެ.
ބްރައިޓަންގެ ހަމައެކަނި ލަނޑު ކާމިޔާބުކޮށް، މެޗުގެ ނަތީޖާ ހަމަހަމަކުރީ ކާލޯސް ބަލޭބާ ކާމިޔާބުކޮށްދިން ލަނޑުންނެވެ. މި މެޗުގައި ފުލަމުން ދެވަނަ ފަހަރަށް ލީޑު ނަގާފައިވަނީ މެޗުގެ 79 ވަނަ މިނެޓުގައި ބްރައިޓަންގެ މެޓް އޯރައިލީ އަތުން ބައިކޮޅަށް ވަން ލަނޑަކުންނެވެ. ފަހު ލަނޑު މެޗު ނިމެން ތިން މިނެޓަށް ވެފައިވަނިކޮށް ކާމިޔާބުކޮށްދިނީ ފުރަތަމަ ލަނޑު ވެސް ކާމިޔާބުކޮށްދިން އިވޯބީއެވެ.
މި ކާމިޔާބީއާ އެކު ފުލަމް މިހާރު ވަނީ ކުޅުނު 14 މެޗުން ލިބިފައިވާ 22 ޕޮއިންޓާ އެކު ހަވަނައަށް ކުރިއަށް ޖެހިލައިފައެވެ. ފަސް ވަނައިގައި އޮތް ބްރައިޓަންއާ ދެމެދު އޮތީ އެއް ޕޮއިންޓްގެ ފަރަގެކެވެ.
މެޗުން ދެ ލަނޑުގެ ތަފާތަކުން ފުލަމް ބަލިކުރެވުނު ނަމަ ހަތަރުވަނައަށް އެރުމުގެ ފުރުސަތު އޮތް ބްރައިޓަން މިހާރު އޮތީ 23 ޕޮއިންޓްގައެވެ.
މުބާރާތުގައި ބޯންމޯތާއި ޓޮޓްނަމް ހޮޓްސްޕާ ބައްދަލުކުރި މެޗު އަމިއްލަ ދަނޑުގައި 1-0 އިން ކާމިޔާބުކޮށްފައިވަނީ ބޯންމޯތެވެ. މެޗުގެ ހަމައެކަނި ލަނޑު މެޗުގެ 17 ވަނަ މިނެޓުގައި ބޯންމޯތަށް ކާމިޔާބުކޮށްދިނީ ލިބުނު ކޯނަރަކުން ޑިފެންޑާ ޑީން ހުއިސެނެވެ.
މި ކާމިޔާބީއާ އެކު ބޯންމޯތު އޮތީ 21 ޕޮއިންޓާ އެކު ނުވަވަނައަށް ކުރިއަށް ޖެހިލާފައެވެ. ސްޕާސް އޮތީ 20 ޕޮއިންޓާ އެކު 10 ވަނައިގައެވެ.