ހަކުރު ބަލި ހުންނަ މީހުންނަށް ރާއްޖޭގެ ބާޒާރުގައި މިހާރު އިންސިއުލިން ޕެން ވިއްކާ އަގާ އަޅައި ބަލާއިރު، ބަލްކު ޕްރޮކިއުމަންޓުގެ ތެރެއިން އިންސިއުލިން ޕެން ގެނެސްގެން ވިއްކުމުން އަގު ވަރަށް ބޮޑަށް ހެޔޮ ކުރެވޭނެ ކަމަށް އާސަންދައިން މިރޭ ބުނެފިއެވެ.
ސަރުކާރުން ބޭހުގެ ބަލްކް ޕްރޮކިއުމަންޓް ނިޒާމުގެ ދަށުން އާންމުކޮށް ދިވެހީން ބޭނުންކުރާ ބޭސްތައް އަގުހެޔޮކޮށް ފޯރުކޮށްދިނުމުގެ މަސައްކަތް މިހާރު ވަނީ ފަށާފައެވެ. އެގޮތުން، ކުޑަ އަގެއްގައި މިހާތަނަށް 10 ބޭހެއް ގެނެސް ފާމަސީތަކުން ލިބެން އެބަހުއްޓެވެ.
މި ފަހުން އަގު ކުޑަކުރި 250 ބޭހުގެ ތެރެއިން އަގު މުރާޖައާ ކޮށްފައިވާ 87 ބޭސް މިދިޔަ މަހުގެ އެކަކުން ފެށިގެން ވަނީ އަގު ކުޑަކޮށްފައެވެ. ބާކީ 126 ބޭހެއްގެ އަގަށް މިދިޔަ މަހު 24އިން ފެށިގެން ބަދަލު ގެންނާނެ ކަމަށް ސަރުކާރުން މީގެ ކުރިން ބުންޏެވެ.
އެސްއެސްޓީވީގެ ބާރު ހަތަރެއް ޕްރޮގްރާމުގައި އާސައިންދައިގެ މެޑިކަލް ކްލެއިމްސް އިންވެސްޓިގޭޝަން މެނޭޖަރު މަރިޔަމް ފަޔާޒާ ވިދާޅުވީ، ހަކުރު ބަލީގެ ފަރުވާއަށް ބޭނުންކުރާ ތިން ބޭހެއް މިދިޔަ ނޮވެންބަރު މަހު ބަލްކް ޕްރޮކިއުމެންޓްގެ ދަށުން ގެނެސްފައިވާ ކަމަށެވެ.
އެ ބޭސްތަކުގެ ތެރޭގައި އިންސިއުލިން ޕެން ހިމެނޭއިރު، ރާއްޖޭގެ މާކެޓުގައި އޭގެ ޕެންއެއްގެ އަގު ހުރީ 316 ނުވަތަ 317 ރުފިޔާއަށް ކަމަށް އޭނާ ވިދާޅުވިއެވެ. އެއާ ޚިލާފަށް، ބަލްކު ޕްރޮކިއުމަންޓް ނިޒާމުގެ ތެރެއިން އިންސިއުލިން ޕެންއެއް 84 ރުފިޔާއަށް ލިބޭ ކަމަށް ފަޔާޒާ ވިދާޅުވެފައިވެއެވެ.
އެހެންވީމާ އަގުގެ ގޮތަށް ބާލައިރު، ވަރަށް ބޮޑު ތަފާތެއް އެބަ އަޅުގަނޑުމެންނަށް ފާހަގަކުރެވޭ މި ބަލްކު ޕްރޮކިއުމަންޓުގެ ތެރެއިން ގެންނަ ބޭސްތަކުން
އިތުރަށް ވާހަކަދައްކަވަމުން އޭނާ ވިދާޅުވީ، ރާއްޖޭގައި ބޭހުގެ އަގު މި ސަރަހައްދުގެ އަގުތަކާ ބަލާއިރު 70 ގުނަ ބޮޑު ކަމަށާއި ދުނިޔޭގެ އެހެން ހިސާބުތަކަށް ވުރެ 15 ގުނަ ބޮޑު ކަމަށެވެ. ބަލްކް ޕްރޮކިއުމަންޓު ތައާރަފުކުރަން ޖެހުނީ އޭގެ ސަބަބުންކަން އޭނާ ފާހަގަކުރެއްވިއެވެ.
ބޭސް ފިހާރައެއް: މާކެޓުގައި 317 ރުފިޔާއަށް ވިއްކާ އިންސިއުލިން ޕެން ބަލްކު ޕްރޮކިއުމަންޓުން 84 ރުފިޔާއަށް ލިބޭނެ ކަމަށް އާސަންދައިން ވަނީ ބުނެފައި --- ސަން ފޮޓޯ
އެ ނިޒާމުގެ ތެރެއިން ގެންނަ ބޭސްތަކަކީ އަގު ބޮޑު ބޭސްތަކެއް ކަމަށްވިޔަސް އާސަންދައިން އެ ބޭސްތައް ގެންނަނީ ޔޫއެންޑީޕީ މެދުވެރިކޮށް ޕޫލް ޕްރޮކިއުމަންޓެއްގެ ތެރެއިން ކަމަށާއި އެހެންވެ ހެޔޮ އަގެއްގައި އެ ބޭސްތައް ލިބޭ ކަމަށް ފަޔާޒާ ވަނީ ވިދާޅުވެފައެވެ.
ފަޔާޒާ ވިދާޅުވީ، އެ ނިޒާމުގެ ތެރެއިން ގެނައި ބޭސްތަކުގެ ތެރޭގައި ހުރީ 'ޖެނެރިކް' ބޭސްތަކެއް ކަމަށާއި އެ ބޭސްތައް ހެޔޮ އަގެއްގައި ލިބުނަސް ރާއްޖޭގެ މާކެޓުގައި ލިބެން ހުންނަނީ އަގު ބޮޑުކޮށް ކަމަށެވެ.
"މިސާލަކަށް ނަގާ ކަމަށް ވެއްޖިއްޔާމުން، ޑައިކްލޯފެނަކް ސޯޑިއަމް އަޅުގަނޑުމެން ބަލްކުގެ ތެރެއިން ޖުލައި މަހު ގެނައި ބޭސްގައި އެބަ އުޅޭ 50 މިލިގްރާމްގެ ޓެބްލެޓް. އަޅުގަނޑުމެނަށް ބަލްކުގެ ތެރެއިން ގެނެވުނީމަ އެބޭސް އެންމެ ގުޅައެއް އެބަ ޖެހޭ 89 ލާރިއަށް."
"އެހެން ނަމަވެސް، އަޅުގަނޑުމެންގެ މިވަގުތު ރެޖިސްޓާ ކުރެވިފައި މިހިރަ ބްރޭންޑުތަކުގެ ތެރޭގައި އެބަ ހުރި ހަ ރުފިޔާއާ އެއް ރުފިޔާއާ ދެމެދުގެ އަގުތަކެއްގަ ހުރި ބޭސްތަކެއް."
އޭގެއިތުރުން، ބަލްކުގެ ތެރެއިން ރާއްޖެއަށް ބޭނުންވާ އަސާސީ ބޭސްތައް ގެންނަން މަސައްކަތް ކުރަމުން އަންނަ ކަމަށް އޭނާ ވަނީ ވިދާޅުވެފައެވެ.
އާސަންދައިގެ ނިޒާމު އޮންނަ ގޮތަށް އަބަދު ވެސް ފާޑުކިޔުން އަމާޒުވެއެވެ. މި ސަރުކާރުން ވަނީ އާސަންދަ ރިފޯމްކުރުމުގެ މަސައްކަތްތައް ފަށައިފައެވެ. އެގޮތުން، މިހާރު އާސަންދަ ދޫކުރާނީ ޕްރައިވެޓް އިންޝުއަރެންސުން ކެނޑުމަށް ފަހުއެވެ.