ފެނަކަ ކޯޕަރޭޝަނަކީ ފައިދާވާ ކުންފުންޏަކަށް ހެދުމަށް ޓަކައި ކުރަމުންދާ މަސައްކަތާއެކު، 2027އަށް އެ ކުންފުނީގެ ހުރިހާ ދަރަންޏެއް ދައްކައި ނިންމާލެވޭނެ ކަމަށް ކުންފުނީގެ މެނޭޖިން ޑިރެކްޓަރު މުއާޒު މުހައްމަދު ރަޝީދު މިރޭ ވިދާޅުވެއްޖެއެވެ.
ޕީއެސްއެމްގެ ރާއްޖެ މިއަދު ޕްރޮގްރާމްގައި މުއާޒު ވިދާޅުވީ ހައްލުތަކާއެކު، ފެނަކައިގެ ހުރިހާ ދަރަންޏެއް 2027އަށް ފިލުވައިލެވި، އެ ކުންފުނީގެ އޮޕަރޭޝަންސްގައި ދިމާވާ މައްސަލަތައް ވެސް ހައްލު ކުރެވޭނެ ކަމަށެވެ.
އޭގެ ތެރޭގައި ހިމެނޭ ބައެއް ކަންކަމަކީ:
- ނަރުދަމާ ނިޒާމު ބެލެހެއްޓުމަށް ދާ ޚަރަދާ އެއްވަރަށް ސަބްސިޑީ ލިބިގެންދިއުން
- ޓެރިފް ޑިފަރެންސްގެ ގޮތުގައި ނަގާފައިވާ 619 މިލިއަން ރުފިޔާގެ ލޯނަށް ކެނޑުން ހުއްޓާލައި، އެސްޓީއޯ ތެޔޮ ބިލަށް އެ ފައިސާ ދެއްކުން
- ލޯނުތަކުގެ ތެރެއިން ފިނޭންސް މިނިސްޓްރީއަށް ދައްކަންޖެހޭ ފައިސާ ތިން އަހަރަށް މަޑުޖައްސައިދިނުން
- އެމްއައިބީން ނަގާފައިވާ 400 މިލިއަން ރުފިޔާގެ ދެ ލޯނު ރީސްޓްރަކްޗާ ކުރުން
- ސަރުކާރުގެ ފަރާތުން ފެނަކައަށް ލިބެންޖެހޭ ފައިސާ މަހުން މަހަށް ލިބުން
"މި ދެންނެވި ހައްލުތަކާ އެއްކޮށް އިރާދަ ކުރެއްވިއްޔާ އަޅުގަނޑުމެންނަށް 2027 އަންނައިރުގައި މިހާރު މިހިރަ ހުރިހާ ދަރަންޏެއް އެއްކޮށް ފިލުވާލައި، އޮޕަރޭޝަންސްގައި މި ހުރި މައްސަލަތައް އެކީ އެއްކޮށް ހައްލު ކުރެވިގެންދާނެ،" މުއާޒު ވިދާޅުވިއެވެ.
އެހެން ނަމަވެސް މި ހައްލުތަކަކީ ހަމަ އެކަނި ފެނަކައަށް އެކަނި ކުރެވޭނެ ކަމެއް ނޫންކަން އޭނާ ފާހަގަ ކުރެއްވިއެވެ. އެ ގޮތުން އެ ކުންފުންޏަށް މި ވަގުތު ކުރެވެން އޮތް ކަމަކީ ޚަރަދު ކުޑަކުރުން ކަމަށް އޭނާ ވިދާޅުވިއެވެ.
ސަރުކާރުން ދޭ ސަބްސިޑީއާއެކު މަހެއްގެ މައްޗަށް ފެނަކައަށް ލިބޭ ޖުމްލަ އާމްދަނީއަކީ 213 މިލިއަން ރުފިޔާއެވެ. އޭގެ ތެރެއިން 79 މިލިއަން ރުފިޔާ މުވައްޒަފުންގެ މުސާރައަށް ޚަރަދުވެއެވެ. އެއީ އާމްދަނީގެ 35 ޕަސަންޓެވެ. މުއާޒު ވިދާޅުވި ގޮތުގައި އެ ކުންފުނި ރަނގަޅަށް ހިންގޭނަމަ، މުސާރައަށް ކުރާ ޚަރަދު 28 ޕަސަންޓަށް ކުޑަ ކުރެވޭނެއެވެ.
އައު ސަރުކާރުން ފެނަކައާ ހަވާލުވީއިރު، އެ ކުންފުނީގައި 4.3 ބިލިއަން ރުފިޔާގެ ދަރަނި ހުރި ކަމަށް ފެނަކައިން ބުނެއެވެ. އަދި އޭގެ އިތުރަށް އެ ކުންފުނީގައި ބޭނުންވާ ވަރަށްވުރެ އިތުރަށް މުވައްޒަފުން ވެސް ތިއްބެވެ. މުވައްޒަފުން މަދުކުރަންޖެހޭ ކަމަށާއި، އެހެން ނަމަވެސް ކުއްލިއަކަށް އެ ކަން ނުކުރެވޭނެ ކަމަށް މުއާޒު ވަނީ ވިދާޅުވެފައެވެ.
ޚަރަދު ކުޑަކުރުމަށް ޓަކައި އެ ކުންފުނިން ކުރަމުންދާ މަސައްކަތުގެ ތެރެއިން މިދިޔަ އަހަރާ އަޅައިބަލާއިރު، ޚަރަދުން 140 މިލިއަން ރުފިޔާވަނީ މަދުކޮށްފައެވެ.
ފެނަކައިގެ ސައްތައިންސައްތަ ހިއްސާ، އެސްޓީއޯއިން ގަނެ އެ ކުންފުނީގެ ސަބްސިޑަރީ ކުންފުންޏެއްގެ ގޮތުގައި ފެނަކަ ހަމަޖެއްސުމަށް ރައީސް ޑރ. މުޙައްމަދު މުއިއްޒު މިދިޔަ އޮގަސްޓު މަހުގެ 25ގައި ނިންމެވިއެވެ. އެހެން ނަމަވެސް އެ މަސައްކަތްތައް ހުއްޓާލައިފައިވާކަން އެސްޓީއޯއިން ވަނީ މިދިޔަ ނޮވެންބަރު 27ގައި އިއުލާންކޮށްފައެވެ.