ހދ. އަތޮޅު ކައުންސިލުން މިދިޔަ އަހަރު ތައިލެންޑުގެ ބެންކޮކަށް ކުރި ދަތުރުން އެ އަތޮޅު ކައުންސިލްތަކަށް އެއްވެސް މަންފާއެއް ނުލިބޭ ކަމަށް ބުނެ އާންމުކުރި އޮޑިޓު ރިޕޯޓު އެކުލަވާލީ ދަތުރުގެ މައުލޫމާތަށް ރިއާޔަތްނުކޮށް، ޒިންމާދާރުކަން ކުޑަ ގޮތަކަށް ކަމަށް ހދ. އަތޮޅު ކައުންސިލުން ބުނެފިއެވެ.
މި ދަތުރުގެ މަގުސަދުގެ ގޮތުގައި އެ ކައުންސިލުން ބުނެފައިވަނީ ބައިވެރިންނަށް ތަޖުރިބާ ހޯދުމާއި ކެޕޭސިޓީ އިތުރުކުރުމާއި އަތޮޅުގެ ކުރިއެރުމަށް ކުރެވޭނެ ކަންކަމުގައި ތައިލެންޑްގެ އިންވެސްޓަރުން ހޯދަން މަގުފަހިކުރުމެވެ. އަދި، ގުޑް ގަވަނަންސްއާއި ޕަބްލިކް ޕޮލިސީ އަދި ރޫރަލް ޑިވޮލޮޕްމަންޓްގެ ދާއިރާތަކުން ތަޖުރިބާ ހޯދުން ވެސް މަގުސަދެއްގެ ގޮތުގައި ބަޔާންކޮށްފައިވެއެވެ.
އެހެން ނަމަވެސް މި ދަތުރުން އެ އަތޮޅު އެއްވެސް ކައުންސިލަކަށް މަންފާއެއް ލިބިފައިނުވާތީ އެ މައްސަލައިގައި ފިޔަވަޅު އަޅަން އޮޑިޓު އޮފީހުން ވަނީ އަންގައިފައެވެ.
މި ކަމާ ގުޅިގެން ހދ. އަތޮޅު ކައުންސިލުން ނެރުނު ބަޔާނެއްގައި ވަނީ މި ކަމާ ގުޅިގެން ނެރުނު އޮޑިޓު ރިޕޯޓު ތައްޔާރުކޮށްފައިވަނީ ދަތުރުގެ އެއްވެސް މައުލޫމާތަކަށް ރިއާޔަތް ނުކޮށް ކަމަށެވެ. އަދި ރައްޔިތުންގެ މެދުގައި ނުތަނަވަސްކަން އުފެދޭ ގޮތަށް، އާންމުންނާއި މީޑިއާގެ އިތުރުން މުޅި ދައުލަތުގެ ކުރިމަތީގައި އެ ކައުންސިލް ފަޟީހަތްވާގޮތަށް އަމަލުކުރުމުން ކަންބޮޑުވުން ފާޅުކޮށްފައިވެއެވެ.
މީގެ އިތުރުން އެ ކައުންސިލުން ބުނީ ބެންކޮކް ދަތުރުން އެ ކައުންސިލަށް އެކަށީގެންވާ މަންފާއެއް ލިބިފައިނުވާ ކަމަށް އޮޑިޓު ރިޕޯޓުގައި ފާހަގަކޮށްފައިވަނީ އެއްވެސް އަސާސެއް ނެތި، ގާނޫނީ މަސްއޫލިއްޔަތާ ޒިންމާތަކަށް ވެސް ރިއާޔަތްނުކޮށް ކަމަށެވެ. އެ ގޮތުން އެ ދަތުރުގައި ބައިވެރިވި ހދ. އަތޮޅުގެ 12 ރަށުގެ ކައުންސިލްގެ ރައީސުންގެ ބަހެއް ނެތި، އެ ދަތުރަކީ މަންފާއެއް ނެތް ދަތުރެއް ކަމަށް ސިފަކޮށްދޭން މަސައްކަތް ކުރުމަކީ ވަރަށް ނާތަހުޒީބު ކަމެއް ކަމަށް ބުނެފައިވެއެވެ.
އިންސާނީ ތަރައްގީއަކީ ވެސް ތަހުޒީބުވަމުން އަންނަ ދުނިޔޭގައި ވަޒަންކުރަންޖެހޭ ކަންކަން ކަމުގައި އޮޑިޓު ރިޕޯޓުގައި ފާހަގަ ކޮށްފައި ނެތުމަކީ، ޒިންމާދާރުކަން ކުޑަ ކަމެއްގެ ގޮތުގައި އެ ބަޔާނުގައި ފާހަގަކޮށްފައިވެއެވެ.
އެ ކައުންސިލުން ބުނީ، އޮޑިޓު ރިޕޯޓުތަކަކީ ގާނޫނާ ގަވާއިދުތަކުގެ އިތުރުން، ސުލޫކީ މިންގަނޑުތަކަށް ފެތޭގޮތަށް، އަދި ޒިންމާދާރުކަމާއެކު، ޖަވާބުދާރީވަނިވި ގޮތެއްގައި އާންމު ކުރާ ރިޕޯޓުތަކަކަށް ވާންޖެހޭނެ ކަމަށް އެ ކައުންސިލުން ދެކޭ ކަމަށެވެ.
އޮޑިޓް އޮފީހުން އާންމުކުރި ރިޕޯޓުގައި ވާގޮތުން ހދ. އަތޮޅު ކައުންސިލްގެ ދަތުރަށް ޖުމުލަ 952،885 ރުފިޔާ ޚަރަދުކުރިއެވެ.
އެކަމަކު، ދަތުރަށް އެއް އަހަރު ވީއިރު ވެސް މި ދަތުރުން ހޯދި ފަންނީ ކުރިއެރުމާއި ތަޖުރިބާ ހޯދައިގެން އަތޮޅުގައި އެއްވެސް މަޝްރޫއެއް ފަށާފައިނުވާ ކަމަށް އޮޑިޓް ރިޕޯޓުގައި ބުނެފައިވެއެވެ. އެހެންވެ، މި ދަތުރުން ކައުންސިލަށް އެކަށިގެންވާ މަންފާއެއް ނުލިބޭ ކަމަށް އެ ރިޕޯޓުގައި ބުނެފައިވެއެވެ.
އެހެންވެ، އޮޑިޓް އޮފީހުން ވަނީ ކައުންސިލްގެ ޚަރަދުތަކަށް ޒިންމާވާ ފަރާތްތަކަށް ފިޔަވަޅު އަޅަން މާލީ ވުޒާރާއަށް އަންގައިފައެވެ.