ހދ. އަތޮޅު ކައުންސިލުން މިދިޔަ އަހަރު ތައިލޭންޑްގެ ބެންކޮކަށް ކުރި ދަތުރުން އެ އަތޮޅުގެ ކައުންސިލްތަކަށް މަންފާއެއް ލިބިފައިނުވާތީ، އެ މައްސަލައިގައި ފިޔަވަޅު އަޅަން އޮޑިޓާ ޖެނެރަލްގެ އޮފީހުން އަންގައިފިއެވެ.
އޮޑިޓް އޮފީހުން އާންމުކުރި ރިޕޯޓުގައި ވާގޮތުން ހދ. އަތޮޅު ކައުންސިލްގެ ދަތުރަށް ޖުމުލަ 952،885 ރުފިޔާ ޚަރަދުކުރިއެވެ.
އޮޑިޓް ރިޕޯޓުގައި ބުނީ، ހދ. އަތޮޅު ކައުންސިލްގެ ދަތުރުގައި އެ ކައުންސިލްގެ 14 މެންބަރުންގެ ތެރެއިން 13 މެންބަރުންނާއި ސެކްރެޓަރީ ޖެނެރަލް އަދި ސީނިއާ މެނޭޖްމަންޓުގެ ހަ މުވައްޒަފުންނާ އެކު ޖުމުލަ 20 މުވައްޒަފުން ދިޔަ ކަމަށެވެ. އެ ދަތުރުގައި ހޭދަކުރީ ޖުމުލަ 10 ދުވަހެވެ.
ދަތުރުގެ ތަފުސީލީ ޚަރަދުތައް:
- ޓްރެއިނިން އިންސްޓިޓިއުޓްގެ ފީ އަދި ކެއިންބުއިމުގެ ޚަރަދު - 535،213
- ދަތުރުގެ ޚަރަދު - 133،229 ރުފިޔާ
- ޕޮކެޓް މަނީ - 46،260 ރުފިޔާ
- ދަތުރުގެ ޚަރަދު (މާލެ) - 28،000 ރުފިޔާ
- ޑޮމެސްޓިކް ޓިކެޓު ޚަރަދު - 72،020 ރުފިޔާ
- އިންޓަނޭޝަނަލް ޓިކެޓު ޚަރަދު - 138،163 ރުފިޔާ
ކައުންސިލުން ދަތުރުގެ މަގުސަދުގެ ގޮތުގައި ބުނެފައިވަނީ ބައިވެރިންނަށް ތަޖުރިބާ ހޯދުމާއި ކެޕޭސިޓީ އިތުރުކުރުމާއި އަތޮޅުގެ ކުރިއެރުމަށް ކުރެވޭނެ ކަންކަމުގައި ތައިލެންޑްގެ އިންވެސްޓަރުން ހޯދަން މަގުފަހިކުރުމެވެ. އަދި، ގުޑް ގަވަނަންސްއާއި ޕަބްލިކް ޕޮލިސީ އަދި ރޫރަލް ޑިވޮލޮޕްމަންޓްގެ ދާއިރާތަކުން ތަޖުރިބާ ހޯދުން ވެސް މަގުސަދެއްގެ ގޮތުގައި ބަޔާންކޮށްފައިވެއެވެ.
އެކަމަކު، ދަތުރަށް އެއް އަހަރު ވީއިރު ވެސް މި ދަތުރުން ހޯދި ފަންނީ ކުރިއެރުމާއި ތަޖުރިބާ ހޯދައިގެން އަތޮޅުގައި އެއްވެސް މަޝްރޫއެއް ފަށާފައިނުވާ ކަމަށް އޮޑިޓް ރިޕޯޓުގައި ބުނެފައިވެއެވެ. އެހެންވެ، މި ދަތުރުން ކައުންސިލަށް އެކަށިގެންވާ މަންފާއެއް ނުލިބޭ ކަމަށް އެ ރިޕޯޓުގައި ބުނެފައިވެއެވެ.
އަތޮޅުގެ ތަރައްގީއަށް ފައިދާކުރާނެ ކަންކަމަށް ޚަރަދުކުރުމުގެ ބަދަލުގައި މިދިޔަ އަހަރު ހދ. އަތޮޅު ކައުންސިލަށް ލިބުނު އާމްދަނީއާއި ދައުލަތުގެ މާލިއްޔާއިންދޭ ބްލޮކް ގްރާންޓުން ދިން ފައިސާގެ ބޮޑުބައެއް މި ދަތުރަށް ޚަރަދުކުރި ކަމަށް އޮޑިޓް ރިޕޯޓުގައި ފާހަގަކޮށްފައިވެއެވެ.
މީގެ އިތުރުން، ދަތުރުތަކަށް ކައުންސިލްގެ ބަޖެޓުގައި މިދިޔަ އަހަރު ކަނޑައެޅި 651،572 ރުފިޔާއަށް ވުރެ ގިނައިން މި ދަތުރުގެ ސަބަބުން ދަތުރުތަކަށް ޚަރަދުކޮށްފައިވާކަން ވެސް ރިޕޯޓުގައި ފާހަގަކޮށްފައިވެއެވެ.
އެހެން އެ ޚަރަދު ކުރީއިރު ލާމަރުކަޒީ ގާނޫނުގައި ބަޔާންކުރާ ގޮތަށް ސަޕްލިމެންޓަރީ ބަޖެޓެއް ހަދާފައިނުވާކަން ވެސް އޮޑިޓް ރިޕޯޓުގައި ފާހަގަކޮށްފައިވެއެވެ. ރަސްމީ ދަތުރުތައް ކުރާއިރު މާލީ ވުޒާރާއިން ހުއްދަ ހޯދަންޖެހުނު ނަމަވެސް، އެ ހުއްދަ ވެސް ހޯދާފައިނުވާ ކަމަށް ރިޕޯޓުގައިވެއެވެ.
އެހެންވެ، ކައުންސިލްގެ ޚަރަދުތަކަށް ޒިންމާވާ ފަރާތްތަކަށް ފިޔަވަޅު އަޅަން އޮޑިޓް އޮފީހުން މާލީ ވުޒާރާއަށް ވަނީ އަންގައިފައެވެ.