ޗައިނާ ސަފީރުކަމުގެ މަގާމުގައި ހުރި ތިން އަހަރު، ޗައިނާއާއި ރާއްޖޭގެ ގުޅުން ކުރިއަރައި، އިތުރަށް ހަރުދަނާވި މަންޒަރު ފެނުމަކީ ލިބުނު ވަރަށް ބޮޑު އުފަލެއް ކަމަށް ޗައިނާ ސަރުކާރުން ރާއްޖެއަށް ކަނޑައަޅުއްވާފައި ހުންނަވާ ސަފީރު ވަންގް ލިޒިން މިއަދު ވިދާޅުވެއްޖެއެވެ.
ޗައިނާ ސަފީރު ވަންގް ލިޒިންގެ ތިން އަހަރުގެ ދައުރު މިހާރު ވަނީ ހަމަވެފައެވެ. އޭނާ އެ މަގާމަށް ވަޑައިގަތީ ސެޕްޓެމްބަރު 6، 2021 ގައެވެ.
އެކްސްގައި މިއަދު ވަންގް ލިޒިން ވަނީ ވަދާއުގެ މެސެޖެއް ހިއްސާކުރައްވާފައެވެ. އެ މެސެޖުގައި ވިދާޅުވީ, ރާއްޖެ ފަދަ ރަހުމަތްތެރި ގައުމަކަށް ސަފީރުކަމުގެ މަގާމު ފުރުއްވުމަކީ ލިބޭ ވަރަށް ބޮޑު ޝަރަފެއް ކަމަށެވެ. ވޭތުވެދިޔަ ތިން އަހަރާއި ތިން މަސްދުވަހުގެ ތެރޭގައި، ޗައިނާއާއި ރާއްޖޭގެ ގުޅުން ކުރިއެރި މަންޒަރު ފެނުމަކީ ލިބުނު ވަރަށް ބޮޑު އުފަލެއް ކަމަށެވެ.
އޭނާ ވިދާޅުވީ, ވޭތުވެދިޔަ ފަސް އަހަރު ދުވަހުގެ ތެރޭގައި ޗައިނާއާއި ދިވެހިރާއްޖެއަކީ އަބަދު ވެސް އެކަކު އަނެކަކަށް އިހުތިރާމްކޮށް އެހީތެރިކަން ފޯރުކޮށްދެމުން ދިޔަ ދެ ގައުމުކަމަށެވެ. ތަފާތު ސައިޒުގެ ގައުމުތަކުގެ މެދުގައި ހަމަހަމަކަމާއި، އެއްބަޔަކު އަނެއްބަޔަކަށް އިހުތިރާމުކުރުމުގައި ރަނގަޅު ނަމޫނާއެއް ދައްކަމުންދާ ދެ ގައުމު ކަމަށެވެ.
"މި އަހަރަކީ ޗައިނާގެ ރައީސް ޝީ ޖިންޕިން ރާއްޖެއަށް ކުރެއްވި ތާރީޚީ ރަސްމީ ދަތުރުފުޅަށް 10 އަހަރު ފުރޭ އަހަރު. މި ދަތުރުފުޅުގެ ނަތީޖާއެއްގެ ގޮތުން ޗައިނާ މޯލްޑިވްސް ފްރެންޑްޝިޕް ބްރިޖާއި ވެލާނާ އިންޓަނޭޝަނަލް އެއާޕޯޓު ފުޅާކޮށް އަޕްގްރޭޑްކުރުމާއި އިޖުތިމާއީ ބޯހިޔާވަހިކަމުގެ މަޝްރޫއުތަކުގެ ސަބަބުން ރާއްޖޭގެ ގައުމީ ތަރައްގީއަށާއި ރައްޔިތުންގެ ދިރިއުޅުމަށް ވެސް ބޮޑެތި ބަދަލުތަކެއް އައިސް، ދެ ގައުމުގެ ގުޅުން އިތުރަށް ބަދަހިކުރުމަށް ހަރުދަނާ ބިންގަލެއް އެޅުނު،" އެ މެސެޖުގައި ވަންގް ލިޒިން ފާހަގަކުރެއްވިއެވެ.
މި އަހަރުގެ ޖެނުއަރީ މަހު ޗައިނާގެ ރައީސް ޝީ ޖިންޕިންގެ ދައުވަތަކަށް ރައީސް ޑރ. މުހައްމަދު މުއިއްޒު ކާމިޔާބު ރަސްމީ ދަތުރުފުޅެއް ޗައިނާއަށް ކުރައްވާފައިވާކަން ވެސް އެ މެސެޖުގައި ފާހަގަކުރެއްވިއެވެ. އެ ބައްދަލުކުރެއްވުމުގައި ދެ ރައީސުން ދެއްކެވި ވާހަކަފުޅުގައި، ދެ ގައުމުގެ ދެމެދުގައި އޮތް ގުޅުން އިތުރަށް ބަދަހިކުރެއްވުމަށާއި، ޗައިނާ މޯލްޑިވްސް ކޮމިއުނިޓީއެއް ގާއިމުކުރެއްވުމަށް މަސައްކަތްކުރައްވާނެކަމުގައި ވިދާޅުވެފައިވާ ކަމަށް އޭނާ ވިދާޅުވިއެވެ.
އޭނާގެ ދައުރުގައި، ދިވެހިރާއްޖެއިން ވެދިން އެއްބާރުލުމާއި، ދެ ގައުމުގެ ގުޅުން އިތުރަށް ބަދަހިކުރުމަށް ކުރާ މަސައްކަތަށްޓަކާ ވަނީ ޝުކުރުއަދާކުރައްވާފައެވެ. އެ އެކުވެރިކަން އަބަދު ވެސް ހަނދާންކުރާނެ ކަމަށް މެސެޖު ނިންމަވާލައްވަމުން ވަނީ ވިދާޅުވެފައެވެ.
މިދިޔަ އަންގާރަ ދުވަހު ސަފީރު ވަންގް ލިޒިން ވަނީ ރައީސް ޑރ. މުހައްމަދު މުއިއްޒު އަރިހަށް ވަދާޢީ ޒިޔާރަތެއް ވެސް ކުރައްވާފައެވެ.
މި ބައްދަލުކުރެއްވުމުގައި ރައީސް މުއިއްޒު ވަނީ، ސަފީރަށް ހެޔޮއެދުންތައް އަރިސްކުރައްވައި، ސަފީރުގެ ހައިސިއްޔަތުން އެ ކަމަނާގެ އިސްނެންގެވުމާ އެކު ކޮށްދެއްވާފައިވާ އަގުހުރި ޚިދުމަތްތަކަށް ޝުކުރު އަދާކުރައްވާފައެވެ.
ރައީސްގެ އަރިހަށް ކުރެއްވި މި ވަދާޢީ ޒިޔާރަތް ނިންމަވާލައްވަމުން، ކުރިއަށް އޮތް ދުވަސްތަކުގައި ދިވެހިރާއްޖެއާއި ޗައިނާގެ ގުޅުން އަދިވެސް އިތުރަށް ބަދަހިވެގެންދާނެކަމަށް ޔަގީންކުރައްވާކަމުގައި ސަފީރު ވަނީ ވިދާޅުވެފައެވެ.