ވޮޝިންޓަން ޕޯސްޓުގައި އިންޑިއާއިން ރާއްޖޭގެ ވެރިކަން ބަދަލުކުރުމަށް ރޭވުންތަކެއް ރޭވިކަމަށް ބުނެ ލިޔެފައިވާ ރިޕޯޓަކީ މުޅީން ދޮގު ރިޕޯޓެއް ކަމަށް ފޮރިން މިނިސްޓަރު އަބްދުﷲ ޚަލީލް ވިދާޅުވެއްޖެއެވެ.
މިހާރު އިންޑިއާއަށް ކުރައްވާ ރަސްމީ ދަތުރުފުޅުގެ އިންޑިއާގެ ވިއޯން ނޫހަށް ދެއްވި ޚާއްސަ އިންޓަވިއުއެއްގައި ޚަލީލް ވަނީ ވޮޝިންޓަން ޕޯސްޓުން ޝާއިއުކުރި ރިޕޯޓުގައި އެއްވެސް ހަގީގަތެއް ނެތްކަމަށް ވިދާޅުވެފައެވެ.
"އެއީ މުޅީން ދޮގު، އެ ތުހުމަތުތަކަކީ، ވެސް އަޅުގަނޑު ގަބޫލުކުރާ ގޮތުގައި އެއްވެސް ތެދެއް ނެތް ތުހުމަތުތަކެއް،" ޚަލީލް ވިދާޅުވިއެވެ.
ޚަލީލް ވިދާޅުވީ އަބަދުވެސް ދެ ގައުމުގެ ގުޅުން ހީނަރުކުރަން މަސައްކަތްކުރާ ބަޔަކު އުޅޭނެ ކަމަށާއި، ނަމަވެސް އިންޑިއާ ސަރުކާރުން ދަންނާނެ އަދި ދަމަހައްޓާނެ އިތުބާރަކީ ވެސް، އަބަދުވެސް ދިވެހި ސަރުކާރުން އިންޑިއާއާއެކު މަސައްކަތް ކުރަން ތިބޭނެކަމުގެ ޔަގީންކަންކަމަށް އޭނާ ވިދާޅުވިއެވެ.
މީގެ އިތުރުން ރާއްޖެއިން ޗައިނާއާއެކު ބާއްވާ ގުޅުމާ ގުޅޭގޮތުން ސުވާލުކުރުމުން ޚަލީލް ވަނީ އެހެން ގައުމަކާއެކު ރާއްޖެއިން ބާއްވާ ގުޅުމަކާހެދި އިންޑިއާއެކު ރާއްޖެއިން ބާއްވާ ޒަމާންވީ ގާތް ގުޅުމަށް ބަދަލެއް ނާންނާނެ ކަމަށް ވިދާޅުވެފައެވެ.
ޚަލީލް ވިދާޅުވީ މިއަދު ގައުމުތައް ވަނީ ވަރަށް ބޮޑަށް ގުޅި ލާމެހިފައި ކަމަށެވެ. އެހެންކަމުން ގައުމުތަކާ ގުޅުން ބަދަހިކުރުމުގެ މަސައްކަތް ރާއްޖެއިން ކުރާނެ ޚަމަށް ޚަލީލް ވިދާޅުވިއެވެ.
ޚަލީލް ވިދާޅުވީ އެކި ގައުމުތަކާއެކު ބާއްވާ ގުޅުން ތަފާތު ކަމަށެވެ. އެގޮތުން ބައެއް ގައުމުތަކާއެކު ހަަމައެކަނި އިގްތިޞާދީ ދާއިރާއިން ގުޅުން ބަދަހިކުރާއިރު، ބައެއް ގައުމުތަކާއެކު އެހެން ދާއިރާތަކުން ގުޅުން ބަދަހިކުރާ ކަމަށް ވިދާޅުވިއެވެ.
ވިއޯން އަށް ޚަލީލް ދެއްވި އިންޓަވިއުގެ ތެރެއިން --
ނަމަވެސް އިންޑިއާއާ ހަމައިން އަބަދުވެސް އެންމެ ފުރަތަމަ އިސްކުރާނީ އިންޑިއާ ކަމަށާއި، އެ ކަން ދަމަހައްޓާނެ ކަމަށް ވިދާޅުވިއެވެ. އަދި އިންޑިއާއަކީ ރާއްޖެއާ އެންމެ ގާތް، އަވަށްޓެރި ގައުމަށް ވެފައި، ރާއްޖެއިން ބޭނުންވާ ކޮންމެ ކަމެއްގައި އެންމެ ފުރަތަމަ އިންޑިއާއިން ދީފައިވާ އެހީތެރިކަމުން މި ގުޅުމުގެ މުހިންމު ކަން ހާމަވާނެ ކަމަށް ވިދާޅުވިއެވެ.
ވޮޝިންޓަން ޕޯސްޓުގައިވާ ރިޕޯޓަކީ އެއްވެސް ބުރަދަނެއް ނެތް ދޮގު ރިޕޯޓެއްކަމަށް ޚަލީލް ވިދާޅުވިއިރު އެ ރިޕޯޓުގައިވަނީ، މި އަހަރުގެ ޖެނުއަރީ މަހުގެ ތެރޭގައި, އިދިކޮޅު އެމްޑީޕީއާއި ޑިމޮކްރެޓްސް ގުޅިގެން ރައީސް ޑރ. މުޙައްމަދު މުއިއްޒު ވެރިކަމުން ދުރުކުރަން ރާވައި، އެކަމަށް އިންޑިއާއިން ފައިސާގެ އެހީ ހޯދަން މަސައްކަތް ކުރި ކަމަށް ބުނެފައެވެ.
އަދި އެ ކަން ހާމަވަމުން ސޯޝަލް މީޑިއާގައި އިންޑިއާއަށް ކުޑައިމީސްކުރަން އެންގެވީ ސީދާ ރައީސް މުއިއްޒުކަމަށް ވޮޝިންޓަން ޕޯސްޓުގެ ރިޕޯޓުގައި ބުނެފައިވެއެވެ.
'އިންޑިއާ އައުޓް' ޝިއާރާއެކު ވެރިކަމަށް އައި މި ސަރުކާރު ފުރަތަމަ ވެސް ސިފަކޮށްފައިވަނީ އިންޑިއާއަށް ވުރެ ޗައިނާއާ ގާތް ސިޔާސަތެއް ގެންގުޅޭ ސަރުކާރެއްގެ ގޮތުގައި ކަމަށްވާއިރު، މިއަހަރުގެ ޖެނުއަރީ މަހުގެ ތެރޭގައި ނައިބު ވަޒީރުންތަކެއް އެގައުމަށް ކުޑައިމީސް ކުރުމާ ގުޅިގެން ދެގައުމުގެ ގުޅުން ވަރަށް ގޯސްވިއެވެ.
އެއަށްފަހު، ގުޅުން ރަނގަޅު ކުރަން ސަރުކާރުން އިންޑިއާއާއެކު ގިނަ މަސައްކަތްތަކެއް ކޮށް، ގުޅުން އާންމު ހާލަތަށް ރުޖޫއަވެފައިވާ ކަމަށް މި ސަރުކާރުން ބުނެފައިވެއެވެ.