ޗައިނާއާ އެކު ދިވެހިރާއްޖެއިން ވެފައިވާ މިނިވަން ވިޔަފާރީގެ އެއްބަސްވުމުގެ ދަށުން މިހާތަނަށް 1.9 މިލިއަން ރުފިޔާގެ މުދާ ކްލިއާ ކޮށްފައިވާ ކަމަށް ކަސްޓަމުން ބުނެފިއެވެ.
މި އެއްބަސްވުމަށް އަމަލުކުރަން ފެށީ މި އަހަރުގެ ޖެނުއަރީން ފެށިގެންނެވެ.
މި އެއްބަސްވުމުގެ ދަށުން މިދިޔަ ހޮނިހިރުގެ ނިޔަލަށް، ވައިގެ މަގުން ޖުމްލަ ނުވަ ޝިޕްމެންޓެއްވަނީ ރާއްޖެ ގެނެސް، ކްލިއާކޮށްފައެވެ. އޭގެ ކޮސްޓް، އިންޝޫރެންސް، ފްރައިޓް (ސީއައިއެފް) އަގު 882،381 ރުފިޔާއަށް އަރާ ކަމަށް ކަސްޓަމުން ބުނެއެެވެ.
އަދި ކަނޑުގެ މަގުން ތިން ޝިޕްމެންޓެއް ކްލިއާކޮށްފައިވާއިރު، އޭގެ ސީއައިއެފް އަގު 1،040،875 ރުފިޔާއަށް އަރާ ކަމަށް ކަސްޓަމުންވަނީ ބުނެފައެވެ.
ދިވެހި ސަރުކާރާއި ޗައިނާގެ މަރުކަޒީ ބޭންކާ ދެމެދު ކަރަންޓު އެކައުންޓު މުއާމަލާތްތަކެއް ދެ ގައުމުގެ ފައިސާއިން ކުރެވޭ އެއްބަސްވުމުގެ މައްޗަށް، މިނިވަން ވިޔަފާރީގެ އެއްބަސްވުމަށް އަމަލު ކުރަން ފެށުމާއެކު ދިވެހި ވިޔަފާރިތަކަށާއި ރާއްޖޭގެ އިގުތިސޯދަށް ބޮޑެތި ކުރިއެރުން ލިބޭނެ ކަމަށް އިކޮނޮމިކް މިނިސްޓަރު މުހައްމަދު ސައީދު މީގެ ކުރިން ވިދާޅުވެފައިވެއެވެ.
އެ އެއްބަސްވުމުގެ ދަށުން ޗައިނާއިން ރާއްޖެ އެތެރެކުރާ މުދަލުގެ 91 ޕަސެންޓުގެ ބާވަތުން ޑިއުޓީ ދައްކާކަށް ނުޖެހޭނެއެވެ. އަދި ދިވެހި ރުފިޔާއިން، ޗައިނާއިން މުދާ ގަނެވޭނެއެވެ.
ރާއްޖެއާއި ޗައިނާގެ މިނިވަން ވިޔަފާރީގެ އެއްބަސްވުން ހަދާފައިވަނީ ކުރީގެ ރައީސް އަބްދުﷲ ޔާމީން އަބްދުލް ގައްޔޫމްގެ ވެރިކަމުގައި 2014ވަނަ އަހަރުގައެވެ. އެ ސަރުކާރު ބަދަލުވުމުން، އެއްބަސްވުން މުރާޖައާކުރަމުންދާ ކަމަށް ބުނެ، މިދިޔަ ސަރުކާރުން އެއަށް އަމަލެއް ނުކުރިއެވެ.