ދުންފަތާ ދުރުވާން ބޭނުންވާ މީހުންނަށް ފަރުވާ ދިނުން ނުވަތަ "ސިޒޭޝަންގެ" ޚިދުމަތް ރާއްޖޭގެ ހުރިހާ ސަރަހައްދަކުން ދިނުމަށް މީހުން ތަމްރީނުކުރުން ކުރިއަށް އޮތް ދެތިން މަސްތެރޭގައި ނިންމާނެ ކަމަށް ހެލްތު މިނިސްޓަރު އަބްދުﷲ ނާޒިމް އިބްރާހީމް މިއަދު ވިދާޅުވެއްޖެއެވެ.
ދުންފަތް ކޮންޓްރޯލްކުރުމަށް ސަރުކާރުން ކުރަމުން އަންނަ މުހިންމު މަސައްކަތްތަކާ ގުޅޭގޮތުން މައުލޫމާތު ހިއްސާކުރުމަށް މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު ނާޒިމް ވިދާޅުވީ، މިހާރު ވެސް ހޮސްޕިޓަލްތަކުގައި ސެޒޭޝަން ކްލިނިކްތައް ހިންގާ ކަމަށެވެ.
ސިޒޭޝަންގެ ޚިދުމަތް އަވަހަށް ފޯރުކޮށްދިނުމުގެ ގޮތުން އެ ޚިދުމަތް ބޭނުންވާ މީހުން ގުޅުމަށް ޚާއްސަ ކުއިކް ލައިނެއް ވެސް ވަނީ ގާއިމުކޮށްފައެވެ. އެ ޚިދުމަތަށް އެދި ގުޅޭނެ ނަންބަރަކީ 1676 އެވެ.
ނާޒިމް ވިދާޅުވީ އެ ނަންބަރަށް ގުޅާލުމުން އެންމެ ފުރަތަމަ ބޭނުންވާ އެހީތެރިކަން ލިބޭނެ ކަމަށެވެ. އަދި އެމީހަކާ އެންމެ ކައިރި ހިސާބަކުން ސިޒޭޝަންގެ ޚިދުމަތް ލިބޭނީ ކޮން ހެލްތު ސެންޓަރަކުންކަން ވެސް އެނގިގެންދާނެ ކަމަށް ނާޒިމް ވިދާޅުވިއެވެ.
ނާޒިމް ވިދާޅުވީ މުޅި ރާއްޖޭގަ އެ ޚިދުމަތް ފެށުމަށްޓަކާ މިހާރު ކެބިނެޓުން ނިންމާފައިވާ ކަމަށެވެ. އަދި އެކަމަށް ބޭނުންވާ ބަޖެޓު ވެސް މިހާރު ހަމަޖެހިފައިވާ ކަމަށް ނާޒިމް ވިދާޅުވިއެވެ.
އަޅުގަނޑުމެން މި ގަސްތު ކުރަނީ އެންމެ ލަސްވެގެން ހުރިހާ ރަށެއް ހިމެނޭގޮތަށް އެކަމަށް ބޭނުންވާ މީހުން ތަމްރީނުކޮށް ނިންމަން ކުރިއަށް އޮތް ދެތިން މަސްތެރޭގަ. އެއީ އަޅުގަނޑުމެންގެ ޓާގެޓަކީ، ހެލްތު މިނިސްޓަރު އަބްދުﷲ ނާޒިމް އިބްރާހީމް
ދުންފަތުގެ އިސްތިއުމާލުކުރުން ހުއްޓުވުމަށްޓަކައި ގިނަ ފިޔަވަޅުތަކެއް ސަރުކާރުން އަޅަމުންދާއިރު ދުންފަތުގެ އިސްތިއުމާލު ކުރުމަށް އާދަވެފައިވާ މީހުން އެކަމާ ދުރުވާން ބޭނުންކުރާ ނިކޮޓިން ޕެޗާއި ގަމް ފަދަ ތަކެތި އާސަންދަ މެދުވެރިކޮށް ލިބޭނެ އިންތިޒާމު ހަމަޖައްސާފައިވާ ކަމަށް ވެސް ނާޒިމް މިއަދު ވިދާޅުވިއެވެ.
އަދި ދުންފަތް ކޮންޓްރޯލްކުރުމުގައި މުޖުތަމައުގެ ބައިވެރިވުން އިތުރުކުރުމަށްޓަކައި ކައުންސިލްތަކުން އިސްނަގައިގެން ރަށު ފެންވަރުގައާއި އަތޮޅު ފެންވަރުގައި ހިންގާ ދުންފަތް ކޮންޓްރޯލް ކުރުމުގެ މަސައްކަތަށް ސަރުކާރުން އެހީތެރިކަން ފޯރުކޮށްދޭނެ ކަމަށް ވެސް ނާޒިމް ވިދާޅުވިއެވެ.
ފާހަގަކޮށްލެވޭ ގޮތުގައި މިފަހުން ސަރުކާރުން ވަނީ ދުންފަތް ކޮންޓްރޯލުކުރުމާ ބެހޭ ގާނޫނަށާއި އެކްސްޕޯޓް އިމްޕޯޓްގެ ގާނޫނަށް ވެސް އިސްލާހުތަކެއް ގެނެސްފައެވެ. އެއާއެކު ސިނގިރޭޓާއި ބިޑިން ނަގާ އިމްޕޯޓު ޑިއުޓީ ގާތްގަނޑަކަށް ތިން ގުނަ ވަނީ ބޮޑުވެފައެވެ. އެ އިސްލާހާ އެކު ކުރިން ސިނގިރޭޓަކުން ނަގަމުން އައި ތިން ރުފިޔާ ވެސް އަށް ރުފިޔާއަށް ވަނީ ބޮޑުކޮށްފައެވެ. އަދި، ސިނގިރޭޓު ކާޓަންއެއްގެ އަގު ހުރީ 2،240 ރުފިޔާއާ ހަމައަށް އުފުލިފައެވެ.
ފާހަގަކޮށްލެވޭ ގޮތުގައި މިދިޔަ މަހުގެ 15 އިން ފެށިގެން އިލެކްޓްރޯނިކް ސިނގިރޭޓާއި ވޭޕް ކުރުމަށް ބޭނުންކުރާ އެފަދަ އާލާތްތައް ރާއްޖެ އެތެރެކުރުން ވެސް ވަނީ މަނާކޮށްފައެވެ. މި މަހުގެ 15 އިން ފެށިގެން އެ ތަކެތި ބޭނުންކުރުމާއި ވިއްކުމާއި ހިލޭ ބެހުން ވެސް މުޅިން މަނާވާނެއެވެ.
މީގެ އިތުރުން ދުންފަތުގެ ވިޔަފާރި ރާއްޖޭގައި ކުރާ މީހުންނަށް ސަރުކާރުގެ ކަމާބެހޭ އިދާރާއިން ދޫކުރާ ވިޔަފާރިކުރުމުގެ ހުއްދައިގެ އިތުރުން މިނިސްޓްރީން ދޫކުރާ ސައްހަ ލައިސެންސެއް އޮންނަންވާނެ ކަމަށް ވެސް ހެލްތު މިނިސްޓްރީން މި ފަހުން ވަނީ ބުނެފައެވެ.