އުފަލާއި ހިތްހަމަޖެހުމަކީ ކޮންމެ އިންސާނަކަށްމެ ލިބެންޖެހޭ އަސާސީ ދެ ސިފައެވެ. އެއީ ދިރިއުޅުމުގައި އަބަދުވެސް ހޯދުމަށް މަސައްކަތްކުރާ އިޙްސާސްތަކެކެވެ. އުފާވެރިކަން އާލާކުރުމުގެ ގޮތްތަކުގެ ތެރޭގައި އިންސާނުންގެ މެދުގައި އޮންނަ ހިތުގެ ލޯބި، ދުޅަހެޔޮ ގުޅުންތަކާއި، ވަފާތެރިކަމާއި އަދި އުޖާލާ ވިސްނުމުން ބުނެވޭ "ލޯބިވަމާހޭ" ފަދަ މުޢާމަލާތުގެ ބަސްތައް ހިމެނެއެވެ.
"ސްމައިލް ޝިހާބް" ޕޮޑްކާސްޓުގެ 5 ވަނަ އެޕިސޯޑު "ލޯބިވަމާ" ސަން ޕޮޑްކާސްޓިންގ އިން ގެނެސްދީފައިވަނީ 2024 ނޮވެމްބަރު 2 ވަނަ ދުވަހުއެވެ. މި އެޕިސޯޑުގައި މެހެމާނެއްގެ ގޮތުގައި ބައިވެރިވެވަޑައިގެންފައިވަނީ ފަތުރުވެރިކަމުގެ ދާއިރާގައި މަސައްކަތްކުރައްވަމުން، ފޮތްކިޔުމާއި އެ ފޮތްތަކުން ލިބޭ ޢިބްރަތްތައް އެހެން މީހުންނާ ހިއްސާކޮށްގެން މަޤްބޫލުކަން ހޯއްދަވަމުން އަންނަ ޒުވާން، މަރްޔަމް ނަފާ ނާޝިދު އެވެ. ނަފާ އަކީ "ނަފް ސްމައިލް ބުކް" ގެ ނަމުންވެސް މަޝްހޫރު ބޭކަނބަލެކެވެ. އޭނާއަކީ ޓްރެއިނަރެއްގެ އިތުރުން ލީޑަރޝިޕް ކޯޗެކެވެ. އަދި ލިޔުންތެރިއެކެވެ. "އައި އެމް މައި ތެރަޕިސްޓް" ގެ މުޞައްނިފެވެ.
ނަފްހާމަކުރެއްވި ގޮތުގައި، އޭނާ ފަތުރުވެރިކަމުގެ ދާއިރާ ޚިޔާރުކުރުމަށް މަގުފަހިވީ ކުޑައިރު މަރަދޫގައި މޫދަށް އެރި އުޅުނުއިރު ފަތުރުވެރިންނާ ބައްދަލުވެ، އޭގެތެރެއިން މީހަކު އެއްދުވަހަކު ހިއްސާކުރި އިހުސާސްތަކާ ގުޅިގެންނެވެ. އެ ފަތުރުވެރިޔާ ދިވެހިރާއްޖޭގެ ޤުދުރަތީ ރީތިކަމުން އާޝޯޚުވެ، ތަޢުރީފުގެ ބަސްތައް ރައްދުކުރިއެވެ. ސާފު މޫދާއި، ދޮންވެލި ގޮނޑުދޮށްތަކާއި، އިރުއޮއްސޭ މަންޒަރުގެ ހިތްގައިމުކަމުގެ ވާހަކަތަކެވެ. މި ބަސްތައް އަޑުއެހުމުން ނަފްގެ ހިތުގައި އުފެދުނީ އުފާވެރިކަމުގެ ފުން އަސަރެކެވެ. އަދި ދިވެހިރާއްޖެއާމެދު ފަޚުރުވެރިކަމުގެ އިހުސާސްތަކެވެ. އެދުވަހު ނަފް ޝައުޤުވެރިވީ ދިވެހިރާއްޖޭގެ ޤުދުރަތީ ރީތިކަން އެހެން މީހުންނަށް ތަޢާރަފުކޮށްދިނުމަށް މަސައްކަތްކުރުމަށެވެ. މީގެ އިތުރުން، ނަފްގެ ބައްޕައަކީވެސް ޓުއަރ ގައިޑެއްގެ ގޮތުގައި މަސައްކަތްކުރައްވާފައިވާ ބޭފުޅަކަށްވުމުން، އެކަމަކީވެސް މި ދާއިރާއަށް ޝައުޤުވެރިކަން އުފެދުނު އެއް ސަބަބެވެ.
ނަފްގެ ވާހަކަތަކުން އޭނާގެ ޝަޚްޞިއްޔަތާއި ހަޔާތުގެ މުހިންމު ކަންތައްތަކެއް ހާމަވެގެންދެއެވެ. ކުޑައިރު ރުޅިއައުމުގެ މައްސަލަ ދިމާވިނަމަވެސް، އެފަދަ ކޮންމެ ވަގުތެއްގައި ބައްޕަދެއްވާ ނަސޭޙަތާއި ޙިކުމަތްތެރި ތަރުބިއްޔަތުގެ ސަބަބުން ނަފް ބޮޑުވަމުން އައީ ދުނިޔެ ދެނެގަންނަމުންނެވެ. ބައްޕައާ އޮންނަ ގާތްގުޅުމުގެ ސަބަބުން، މުހިންމު ނިންމުންތަކުގައި އަބަދުވެސް ބައްޕަގެ މަޝްވަރާ ހޯދައެވެ.މީހުންނާ މުޢާމަލާތް ކުރުމުގައި ނަފް އިސްކަންދެނީ ވަގުތާއި ޙާލަތަށް ރިޢާޔަތްކޮށް، އެކަށީގެންވާ ބަހުރުވައެއް ބޭނުންކުރުމަށެވެ. މިއީ އަމިއްލަ ޝަޚްޞިއްޔަތު ދައްކުވައިދިނުމުގެ މުހިންމު ބައެއްކަމަށް އޭނާ ދެކެއެވެ.
އާއިލާގެ ތެރެއިން ނަފް އެންމެ ގާތްކަން ފާހަގަކުރަނީ ކޮއްކޮއާއެވެ. ކުޑައިރު ބައްޕައާއި ކޮއްކޮއާއެކު ވާރޭގައި ހޭދަކުރި ވަގުތުތަކަކީ އޭނާގެ އެންމެ އުފާވެރި ހަނދާންތަކުގެ ތެރެއިންވާ ކަމެކެވެ. މިފަދަ ހަނދާންތަކާއި، އައްޑޫ އަދި މަރަދޫގައި އާއިލާއާއެކު ހޭދަކުރެވުނު ދުވަސްތަކުގެ ހަނދާންތަކަކީ ނަފްގެ ހިތުގައި ޚާއްޞަ މަޤާމެއް ލިބިފައިވާ ކަންކަމެވެ.
ނަފްގެ ތަޖުރިބާއާއި ވިސްނުން އަންގައިދޭ ގޮތުގައި، އަމިއްލަ ނަފްސަށް އިތުބާރު ކުރުމާއި ކުރިއަށް ދިއުމަށްޓަކައި މަޤްޞަދުތަކެއް އެކަށައެޅުމުގައި އޭނާގެ ދަތުރު ފެށުނީ ވަރަށް އާދައިގެ ހާލަތަކުންނެވެ. ނަމަވެސް، ހިތްވަރާއި ބުރަ މަސައްކަތުގެ ސަބަބުން މިއަދު އޭނާގެ ޝަޚްޞިއްޔަތު ވަނީ ބިނާކުރެވިފައެވެ. ކުޑައިރުގެ ނޭދެވޭ ތަޖުރިބާތަކުން އަރައިގަތުމަށްފަހު، އުފާވެރި، ހަމަޖެހޭ އަދި ޤަދަރުވެރި ދިރިއުޅުމެއް އުޅުމަށް އޭނާ ވަނީ އަޒުމް ކަނޑައަޅާފައެވެ. ޚާއްޞަކޮށް، އޭނާގެ މަންމައަށް ހިތްހަމަޖެހޭ ދިރިއުޅުިރިއުޅުމެއް ހޯދައިދިނުމަކީ އޭނާގެ މައިގަނޑު މަޤްޞަދެކެވެ.
ތަޢުލީމީ ދާއިރާގައި، ނަފް ވަނީ މަތީ ދަރަޖަތަކެއް ހާސިލުކޮށްފައެވެ. މިކަން ހާސިލުކުރެވުނީ ބުރަ މަސައްކަތާއި ދެމެހެއްޓެނިވި ވިސްނުމުގެ ސަބަބުންނެވެ. މައިންބަފައިން އުފާކުރުވުމާއި، ފެންވަރު ރަނގަޅު ދިރިއުޅުމެއް ހޯދުމަކީ އޭނާގެ މައިގަނޑު ލަނޑުދަނޑިތަކެވެ.
މުސްތަޤްބަލާމެދު ވިސްނުމުގައި، ނަފްގެ ދެކޭގޮތުގައި ގިނަ ޒުވާނުން އިޚްތިޔާރުކުރަނީ ވަގުތީ ހައްލުތަކެވެ. މިސާލަކަށް، އަވަސް ކައިވެންޏެއް ކުރުން ނުވަތަ އެހެން މީހަކަށް ބަރޯސާވުން ފަދަ ކަންކަމެވެ. އެހެންނަމަވެސް، ނަފް އަބަދުވެސް ވިސްނަނީ ދުރު މުސްތަޤްބަލަށެވެ. އޭނާގެ ކާމިޔާބީގެ މައިގަނޑު ބިންގަލަކީ މައިންބަފައިންގެ އެއްބާރުލުމާއި އެހީތެރިކަމެވެ. މިއީ އޭނާއަށް ލިބުނު އެންމެ މުހިންމު ފުރުޞަތު ކަމުގައި އޭނާ ދެކެއެވެ.
ދިރިއުޅުމުގައި އަމިއްލަ އިޚްތިޔާރާއި މިނިވަންކަމުގެ މުހިންމުކަން ނަފް ފާހަގަކުރެއެވެ. އޭނާގެ ނަޒަރުގައި، މިކަން އެހެން މީހަކަށް ބަރޯސާވުމަށްވުރެ މާ މުހިންމެވެ. ނަމަވެސް، ކައިވެނިކޮށް ޢާއިލާއެއް ބިނާކުރުމަކީ އޭނާ ޤަބޫލުކުރާ އަދި ހިތްވަރުދޭ ކަމެކެވެ.
ނަފްގެ ވިސްނުމުގައި، ޒަވާޖީ ޙަޔާތަކުން ލިބޭ ލޯބި، އަޅާލުން އަދި އޯގާތެރިކަން، އެކުވެރިއެއްގެ ފަރާތުން ލިބޭ އެހީތެރިކަމާ ތަފާތުވާނެއެވެ. ނަމަވެސް، މި ތަފާތު ޔަޤީންކުރެވޭނީ އެ ތަޖުރިބާ ކުރުމުންކަން އޭނާ ފާހަގަކުރެއެވެ.
ޙަޔާތުގެ އުފާވެރިކަން ހަމައެކަނި ބައިވެރިއެއްގެ ސަބަބުން ލިބޭނެކަމަށް ބުނާ ޚިޔާލާމެދު ނަފް ޝައްކުކުރެއެވެ. އެހެންނަމަވެސް، ބައިވެރިއެއްގެ ފަރާތުން އެހީތެރިކަން ލިބޭނެކަން އޭނާ ޤަބޫލުކުރެއެވެ. މި ބައިވެރިޔާ ކޮންމެހެން ޒަވާޖީ ގުޅުމަކުން ގުޅިފައިވާ މީހަކަށް ވާކަށް ނުޖެހެއެވެ. މިގޮތުން، އޭނާގެ އެހީތެރިޔެއްގެ ގޮތުގައި އޭނާގެ ދެބެންގެ ދެދަރި، ދައްތަ ބަތޫލްގެ ނަން ގެ ނަން ޝުކުރުވެރިކަމާއެކު ފާހަގަކުރެއެވެ.
ވަޒީފާގެ މާޙައުލުގައި، ނަފް އަބަދުވެސް މުވައްޒަފުންނަށް ކުރު ތަމްރީނެއް ދެއެވެ. މި ތަމްރީނުގައި، އޭނާ މާސްލޯގެ ބޭނުންތަކުގެ ވިއުގަ ތިއަރީއަށް އިޝާރާތްކުރެއެވެ. މި ތިއަރީއަށް ނަފް ވަރަށް ބޮޑަށް ތާއީދުކުރާ ކަމަށާއި، ހުރިހާ ލީޑަރުންނެކޭ އެއްފަދައިން، ތިމާގެ ވަށައިގެން ހިތްވަރުދޭ ބަޔަކު ތިބުމުގެ މުހިންމުކަން އޭނާ ތަކުރާރުކޮށް ފާހަގަކުރެއެވެ.
ނަފް ވިދާޅުވި ގޮތުގައި، ޑިވްޑްރޮޕް ލީޑަރޝިޕް ކޯޗިންގ ޕްރޮގްރާމަކީ އޭނާގެ ޙަޔާތަށް އިންޤިލާބީ ބަދަލެއް ގެނުވި ތަޖުރިބާއެކެވެ. މި ޕްރޮގްރާމުގެ ސަބަބުން އޭނާގެ ޙަޔާތަށް ކުރިއެރުމާއި އުފާވެރިކަން ލިބި، މުޅި ޝަޚްޞިއްޔަތަށް އެދެވޭ ބަދަލުތަކެއް އައިސްފައިވެއެވެ.
ނަފް ފާހަގަކުރެއްވި ގޮތުގައި، މި ކޯޗިންގ ޕްރޮގްރާމަކީ އުނގެނުމުގެ އައު ދޮރެއް ހުޅުވާލި ތަޖުރިބާއެކެވެ. މީގެ ސަބަބުން އޭނާގެ ހުނަރުތައް ދެނެގަނެ، ތަރައްޤީކުރަންޖެހޭ ދާއިރާތައް ފާހަގަކުރެވުނެވެ. އަދި ޙަޔާތުގެ އަސްލު މަޤްޞަދު ދެނެގަނެ، ލަނޑުދަނޑިތަކެއް ކަނޑައަޅައި، އެ މިސްރާބަށް މަސައްކަތްކުރަން ފެށުނެވެ.
ނަފްގެ ޅަފަތުގައި ތަޖުރިބާކުރެވުނު ނުތަނަވަސްކަމާއި ހިތާމަތަކުން އަރައިގަތުމަށް މި ޕްރޮގްރާމުން ވަރަށް ބޮޑު އެހީތެރިކަމެއް ލިބުނެވެ. މީގެ ސަބަބުން އޭނާއަށް އަސްލު މާނައިގައި ހިނިތުންވުމާއި، މައިންބަފައިންނަށް މަޢާފްކުރުމާއި، ލޯބި ފާޅުކުރަން ދަސްވިއެވެ. އަދި މުޅި ދިރިއުޅުމާއި މެދު ދެކެވެމުން އައި ގޮތް ބަދަލުކުރެވި ވިސްނުން ހެޔޮ މަގަށް އެޅުވުނެވެ.
ނަފް ޝުކުރުވެރިކަމާއެކު ފާހަގަކުރެއްވި ގޮތުގައި، މި ބަދަލުވުމުގެ އެންމެ އިސް މޭސްތިރިއަކީ ޑިވްޑްރޮޕްގެ ޝަހީނާއެވެ. ޝަހީނާގެ އިރުޝާދާއި ހިތްވަރުދިނުމުގެ ސަބަބުން، ވޭތުވެދިޔަا ދެ އަހަރުގެ ތެރޭގައި ނަފްގެ ޝަޚްޞިއްޔަތަށް ވަރަށް ބޮޑު ކުރިއެރުމެއް ލިބިފައިވާކަން އޭނާ ފާހަގަކުރެއްވިއެވެ.
ކޯހުގެ ނިންމުން ފާހަގަކުރި ދުވަހު ނަފް އޭނާގެ ފޮތް "އައި އޭމް މައި ތެރަޕިސްޓް" ނެރުމަށްފަހު އަޑުއެހުންތެރިންނާ ހިއްސާކުރި ތަޖުރިބާތަކުގެ ތެރެއިން އޭނާއަށް ވަރަށް ބޮޑަށް ރޮވުނުކަމަށް ބުނެފައިވެއެވެ. މިއީ އޭނާއަށް ނަފްސާނީގޮތުން ބޮޑު ލުޔެއް ލިބުނު ކަމެއްކަމުގައި ފާހަގަކޮށްފައިވެއެވެ. ޚާއްޞަކޮށް އަޑުއެހުންތެރިންގެ ތެރެއިން ލިބުނު ހިތްވަރުދިނުމުގެ ބަސްތައް އޭނާ ފާހަގަކުރިއެވެ. އެދުވަހު އޭނާއަށް ވިސްނުނީ ރޮވެންޖެހޭ ކަންކަމުގައި ރޮވުމަކީ މައްސަލައެއް ނޫންކަމާއި، އަދި އެފަދަ ކަންކަން ހިއްސާކުރުމުގެ މުހިންމުކަމެވެ. ނަފް ވިދާޅުވީ އޭނާ ނެރުނު ފޮތަކީ ފަރުވާގެ ދަތުރެއްގެ ގޮތުގައި ދެކޭކަމަށާއި، މިހާރު އަލުން އެފޮތް ނެރޭނަމަ ބައެއް ކަންކަން ތަފާތުވާނެކަމަށެވެ.
ޒުވާނުންނަށް ދޭނެ މެސެޖަކާ ބެހޭގޮތުން ސުވާލުކުރުމުން، ނަފް އަންނަނިވި ނުކުތާތައް ފާހަގަކުރެއްވިއެވެ:
1. އެއްވެސް ޙާލެއްގައި އަމިއްލަ ނަފްސު ހަނދާންނައްތާނުލުން.
2. އަބަދުވެސް އަމިއްލަ ޤާބިލުކަން ޤަބޫލުކުރުން.
3. ހިތްވަރުދޭ މީހުންނާއެކު ވަގުތު ހޭދަކުރުން.
4. ޚިޔާލީ ދުނިޔެއިން ނިކުމެ ޙަޤީޤީ ދުނިޔެ ދެނެގަތުން.
5. އަމިއްލަ ހުނަރުތައް ތަރައްޤީކުރުން.
6. ތަފާތު މަޢުލޫމާތު ހޯދައި، ވިސްނުން ތަރައްޤީކުރުން.
7. ރަނގަޅު ގޮތުގައި މުޢާމަލާތްކުރަން ދަސްކުރުން.
ރިސޯޓު މަސައްކަތުގެ ދާއިރާގައި އެންމެ އުފާވެރި ތަޖުރިބާއަކީ ރަނގަޅު މަގެއްގައި ދެމިހުރެވުމެވެ. ޔުނިވަރސަލްގައި މަސައްކަތްކުރިއިރު، ނަފް ކުރިއަށް ގެންދިޔަ ޙަރަކާތެއްގެ ފުރިހަމަކަމާ ގުޅިގެން އިސްވެރިއަކު ދެއްވި ތަޢުރީފުގެ ބަސްތައް އުފަލާއެކު ހިއްސާކުރިއެވެ. ރިސޯޓަކީ މިނިވަންކަން ލިބިދޭ ތަނެއްކަމާއި، ޚާއްޞަކޮށް އަންހެން ކުދިންނަށް ރައްކާތެރި މާޙައުލެއްކަން ފާހަގަކުރިއެވެ. މީގެއިތުރުން، ކުރިއަރަން ބޭނުންވާ ފަރާތްތަކަށް ގިނަގުނަ ފުރުޞަތުތައް ހުޅުވިފައިވާކަންވެސް ފާހަގަކުރިއެވެ. ހުސްވަގުތުގައި ކުރެހުމާއި، ފޮތްކިޔުމާއި، ތަމްރީނު ސެޝަންތަކުގައި ބައިވެރިވުމާއި، ރާޒުވާ ކުޅުންފަދަ ޙަރަކާތްތަކުން އުފާވެރިކަން ލިބޭކަން ބަޔާންކުރިއެވެ.
ނަފް ކިޔާފައިވާ ފޮތްތަކުގެ ތެރެއިން "އިޗިގޯ އިޗީ" ފޮތުގައިވާ ވާހަކަތައް ވަރަށް ކަމުދިޔަކަމަށް ބުނެފައިވެއެވެ. އަދި މި ފޮތުން ލިބުނު މަޢުލޫމާތު އޭނާގެ ދިރިއުޅުމުގައި ބޭނުންކުރާކަންވެސް ފާހަގަކޮށްފައިވެއެވެ. އޭނާ ދެކޭ ހުވަފެންތައް ޙަޤީޤަތަކަށް ހެދުމަށް ލިބޭ ފުރުޞަތުތަކުގެ ބޭނުން ހިފުމަށް ނަސޭހަތްތެރިވެފައިވެއެވެ. ރޯދަމަހަށް ތައްޔާރުވުމުގެ ގޮތުން އައްޑޫގައި ކުރާ ކަންތައްތައް ހިއްސާކުރިއެވެ. އާއިލާއާއި ރައްޓެހިންނާއެކު ހޭދަކުރެވޭ ވަގުތުތަކުން ލިބޭ އުފާވެރިކަމުގެ އިޙްސާސްތައް ވަރަށް ފުންކަން ފާހަގަކުރިއެވެ.
ނަފްގެ ނަޒަރުގައި، މާ ބޮޑު ޕްލޭނެއް ނުހަދައި، ހާލަތާ އެއްގޮތަށް ދިރިއުޅުން ބައްޓަންކުރުމުން އުފާވެރިކަން އިތުރުވާކަމަށް ދެކެއެވެ. އޭނާއަށް އެންމެ މީރީ ގަރުދިޔައާއި ބަތްކަން ފާހަގަކޮށްފައިވެއެވެ. އަދި ބައެއް ބާވަތްތަކުގެ ކާނާ މީރުކޮން ތައްޔާރުކުރަން އެނގޭކަމާއި، ކިރުބޯކިބާ ތައްޔާރުކުރާ ގޮތްވެސް ހިއްސާކޮށްފައިވެއެވެ.
މިހާތަނަށް ލިބިފައިވާ މުހިންމު ތަޖުރިބާތަކުގެ ތެރޭގައި، ކޮންމެ މީހަކީވެސް ހެޔޮ ނިޔަތެއް އޮންނަ ފަރާތެއްކަން ދެނެގަތުމަށް ވިސްނުން ހުޅުވުނެވެ. ބުރަ މަސައްކަތުން ކާމިޔާބީގެ ދޮރުތައް ހުޅުވިގެންދާނެއެވެ. އިންސާނުންގެ އަޚްލާޤާއި ސުލޫކަކީ އެމީހަކަށް ކުރިމަތިވެފައިވާ ތަޖުރިބާތަކުގެ ނަތީޖާއެއްކަމާއި، ދިމާވާ ޙާލަތްތަކަށް ޝާމިލު ނަޒަރަކުން ބެލުމުގެ މުހިންމުކަން އިޙްސާސްކުރެވުނެވެ.
އަމިއްލަ ނަފްސަށް އަޅާލުމާއި ލޯބިކުރުމަކީ ދާއިމީ އާދައަކަށް ހަދަންޖެހޭ ކަމެކެވެ. ކުދިކުދި ފިޔަވަޅުތަކުން ފެށިގެން ކުރިއަށްދިއުމަކީ ދިރިއުޅުމުގައި އެދެވޭ ބަދަލުތައް ގެނައުމުގެ ހަރުދަނާ ގޮތެކެވެ. އިސްނެގުމާއި ފުރުޞަތުތަކުގެ ބޭނުން ހެޔޮގޮތުގައި ހިފުމަކީ މުހިންމު ކަމެކެވެ. ލިބިފައިވާ ނިޢުމަތްތަކަށް ޝުކުރުވެރިވުމުގެ އާދަ އަށަގެންނެވުމާއެކު، މަޢާފުކުރުމާއި ލޯބިވުމުގެ މަތިވެރި ސިފަތައް އަމިއްލަ ނަފްސުގައި އަށަގެންނެވުމަށް މަސައްކަތްކުރަމާ ހިންގަވާށެވެ.