ހިތްހަމަޖެހުމާއި އުފާވެރި ކަމަކީ މާތްﷲ ދެއްވާ ބޮޑު ނިޢުމަތެކެވެ. އިންސާނުންގެ މެދުގައި އޮންނަ ހިތު ލޯބި، ދުޅަހެޔޮ ގުޅުންތަށް، ވަފާތެރިކަމާއި ފަހި ވިސްނުން، ލޯބިވުން އަދި ނަމޫނާ ދެއްކުމާއި އެކު ހިތުން އެކަކު އަނެކަކަށް އަޅާލުމުން އުފެދޭ ލޯބީގެ ޖާދޫ އަކީ އުފާވެރިކަން އާލާ ކުރެވޭނެ ގޮތްތަކެވެ. ހަމަ އެހެންމެ އުޑަށް ބެލުންފަދަ ޤުދުރަތީ މާޙައުލުން ލިއްބައިދޭ އުފާވެރިކަމުގެ އިޙްސާސް މަންމަ އަކަށް ވެގެން ދިރިއުޅުމުގެ ގޮންޖެހުންތަކުން އަރައިގަތުމަށް ކުރާ ހިތްވަރު މިއީ ވެސް ފާހަގަ ކޮއްލެވޭ ކަންކަމެވެ.
ސްމައިލް ޝިހާބް ޕޮޑްކާސްޓގެ 11 ވަނަ އެޕިސޯޑް" ހިތްވަރު" ސަންޕޮޑްކާސްޓިން ގެނެސްދީފައިވަނީ 2024 ޑިސެންބަރު 14 ވަނަ ދުވަހުއެވެ. މި އެޕިސޯޑުގެ މެހެމާނެއްގެ ގޮތުގައި ބައިވެރިވެވަޑައިގެންފައިވަނީ ޕީއެސް.އެމްގެ ރޭޑިޔޯޕްރެޒެންޓަރު އަދި ލޯފަންމީހުންގެ ޙައްޤުތަކަށް މަސައްކަތްކުރައްވާ ސ. މަރަދޫ ދެވެލި އަލްފާޟިލް ޢަބްދުއްﷲ ޒިޔާއު، ޒިޔާއެވެ.
ޒިޔާ އަކީ ގިނަ ރޮނގުތަކުން ހުނަރުވެރިކަން ހުރި ހިތްވަރުގަދަ ޒުވާނެއްކަން އޭނާގެ ވާހަކަތަކުން އެނގުނެވެ. ޒިޔާ އަކީ ބްލައިންޑު އެންޑު ވިޜުއަލީ އިމްޕަޔާރޑް ސޮސައިޓީ އޮފް މޯލްޑިވްސް ( ބީ.ވީ.އައި.އެސް.އެމް ) ގެ ކުރީގެ މީޑައާ ކޯޑިނޭޓަރެވެ. ޒިޔާ ލޯފަންމީހުންގެ ޙައްޤުތަކަށް މަސައްކަތް ކުރައވާތާ މިހާރު 15 އަހަރު ވެއްޖެއެވެ.
ޒިޔާ ގެ އެންމެ ކުޑައިރުގެ ހަނދާތަކުގެ ތެރޭގައި ރޭގަނޑު ވަކި ގަޑިއެއްގައި ރަށުން ކަރަންޓުކެނޑޭކަން ފާހަގަ ކުރިއެވެ. އޭގެ އިތުރުން ރަށުގައި ކުދިންނާއި އެކު މަގުމަތީގައި ދުވެ ކުޅެ މަޖާކޮށް އުޅުނު ހަނދާންތަށް އުފާވެރިކަމާއި އެކު އޭނާ ހިއްސާކުރިއެވެ.
ކުޑައިރުންސުރެ ބޭރަށްގޮސް ކަންކަމުގައި ބައިވެރި ވުމުގެ ފަހި ފުރުޞަތު ފަހިވެފައި އޮތްކަމަށް ޒިޔާ ވިދާޅުވިއެވެ. މަންމަމެން ދުވަހަކު ވެސް ކަމެއްވެދާނެތީ ހިފަހައްޓައި ކަންކަން މަނާ ކޮއްފައި ނުވާކަން ފާހަގަ ކުރިއެވެ. އެހެންކަމުން އޭނާއަށް ވަރަށް ގިނަކަން ކަން ދަސްވިކަމަށާއި އަމިއްލަ ނަފްސަށް އިތުބާރުކުރަން ދަސްވި ކަމަށެވެ. މަންމަވެސް ޢާއިލާއިން ވެސް ދިޔަ ހުރިހާތާކަށް ގެންދިޔަކަމަށާއި ޒިޔާ އާއި ދޭތެރޭގައި ކަންބޮޑުވެ ލަދު ވެތިކަން ނުބާއްވާ ކަން ފާހަގަ ކުރެއްވިއެވެ. ޒިޔާގެ މަންމަ ދެވެން ހުރި ހުރިހާ ފުރުޞަތެއްދެއްވައި އެހެންކުދިންނާއި ތަފާތު ކުރުމުގެ ވިސްނުން ނުގެންގުޅޭކަން ފާހަގަ ކުރެއްވިއެވެ.
އުފާވެރިކަން ދެކޭގޮތް ޙިއްސާކުރައްވަމުން ޒިޔާ ވިދާޅުވީ އުފާވެރިކަމަކީ ތިމާގެ ފަރާތުން އަނެކާއަށް ދެވޭ ހަދިޔާއެކެވެ. ތިމާ އެހެން މީހަކަށް ބޭނުންވާ ޙާލަތުގައި ހުރެ ތިމާގެ ފަރާތުން އެހެންމީހަކަށް އެހީތެރި ވެވުމަކީ ލިބޭވަރަށް ބޮޑު އުފަލެކެވެ. ޒިޔާއަށް ގިނަކަންކަން ކުރެވޭ ގޮތަށް މަގުފަހިވުންވެސް އެއީލިބޭ އުފާވެރިކަމެކެވެ. ޒިޔާ ދެކޭ ގޮތުގައި އެކަންކަމުގެ ސަބަބުން އޭނާގެ ފަރާތުން އެހެންމީހަކަށް ހިނިތުންވެލާ އުފާވެރިކަން ގެނެސްދެވުމަކީ އޭނާ އެންމެ އުފާ ވާ ކަންތަކެވެ. އަމިއްލަ ނަފްސު ދެެކެލޯބި ވުމާއި ނަފްސައް އޮންނަ އިތުބާރަކީވެސް އުފާވެރި ކަމެކެވެ.
އެހެންނަމަވެސް އަލަށް ދިމާވާ މީހުނާއި ބައްދަލުވުމުން ޖެހުލުންވީ ދުވަސްވަރެއް ދިޔަ ކަމަށްވިދާޅުވިއެވެ. މިކަމަށް އެންމެ ބޮޑުބަދަލެއް ގެނެސްދިނީ ރޭޑިޔޯ އިންކަން ޒިޔާ ފާހަގަ ކުރެއްވިއެވެ. އެގޮތުން ރޭޑިޔޯ ޕޮރޮގްރާމް ތަކުގައި ބައިވެރިވެ ވާހަކަދައްކައި ލަވަކިޔައި ހަދާކަމަށް ވިދާޅުވިއެވެ. އެކަމުގެ ތެރެއިން މީހުން ގުޅާ ރަޙްމަތްތެރިވާން އެދުނުކަން ފާހަގަ ކުރެއްވިއެވެ. އެހެންނަމަވެސް ޒިޔާ އަކީ ލޯފަން މީހެއްކަން އެނގޭ ހިސާބުން މީހުން ދުރުވާކަމަށް ޒިޔާ ކިޔައިދިނެވެ.
ޒިޔާގެ ޙަޔާތަށް އެންމެ ބޮޑު ހެޔޮބަދަލެއް ގެނެސްދިން އެކައްޗަކީ ރޭޑިޔޯ ކަން ޒިޔާ ފާހަގަ ކުރެއްވިއެވެ. އެކަންވީ ގޮތް ތަފްޞީލްކޮށްދެމުން އޭނާ ވިދާޅުވީ ރޭޑިޔޯގެ ދިވެހި އެފް އެމްގެ ފޮރޮގްރާމްތަކަށް ގުޅައިގެން ބައިވެރިވަމުން ދިޔުމުގެ ތެރޭގައި އެއްދުވަހަކު ޕްރެސެންޓަރެއް " މިއީ ހާދަ ގިނައިން ގުޅާ ކުއްޖެކޭ ހާދަހާ ބައްދަލުކޮއްލާ ހިތްވެޔޭ" ވިދާ ޅުވިކަމަށެވެ. އެދުވަހު ޒިޔާ އަކީ ކާކުކަން މިވެނި މީހަކު ގާތު އަހާލާށޭ ޒިޔާ ބުނިކަމަށްވެއެވެ. އެހެންބުނީ ޒިޔާ އާއި ބައްދަލު ކުރާހިތް އެވަނީ އަޑު ރީތިވީމަކަމަށާއި ލޯފަން މީހެއްކަން އެނގޭ ނަމަ ބައްދަލު ކުރަން ބޭނުން ނުވާނެ ކަމުގެ ބިރު ހިތުގައި އޮތުމުންކަން އަސަރާއި އެކު ޒިޔާ ފާހަގަ ކުރެއްވިއެވެ.
ޒިޔާ އެދުނު މީހާ ގާތު އަހާފައި ޒިޔާ އަކީ ކާކުކަން އެނގި ހުރެ އެޕްރެސެންޓަރު ޒިޔާ އާއި ބައްދަލު ކުރިކަމަށާއި ޒިޔާގެ އޭރުހުރި ވިސްނުން ބަދަލުކުރުމަށް ވިސްނައިދީ ހިތްވަރުދިންކަން އުފަލާއި އެކު ފާހަގަ ކުރެއްވިއެވެ. އޭގެ ފަހުން ޒިޔާގެ މޫނު ފެނި ލޯފެނިދާނެތީ ޒިޔާގެ ހިތުގައި އޮތް ޖެހިލުންވުމާއި ބިރުވެރިކަން މުޅިން ފިލައިގެން ދިޔަކަމަށް ވިދާޅުވިއެވެ. އެދުވަހުގެ ވާހަކަތަށް ވަރަށް ބޮޑަށް ޤަބޫލު ކުރެވި ބަލައި ގަނެވި އަމިއްލަނަފްސަށް އިތުބާރާއި ޔަޤީންކަން އިތުރުވިކަމަށެވެ. ޒިޔާގެ ޙަޔާތަށް މިވަރު ހެޔޮ ބޮޑު ބަދަލެއްގެނެސްދިނީ އޭނާއަށް އެންމެ މަޤްބޫލު ޕްރެސެންޓަރު މިޒޫކަން ޝުކުރުވެރިކަމާއިއެކު ފާހަގަ ކުރެއްވިއެވެ.
ޒިޔާގެ ކެރުމާއި ހިތްވަރު ލިބުނީ ކިހިނެތްތޯ ކުރެވުނު ސުވާލަށްޖަވާބު ދެއްވަމުން ވިދާޅުވީ އެއީ ކުޑައިރުންފެށިގެން މަންމަ އާއި އާއިލާ އަދި ރައްޓެހިންގެ ފަރާތުން ލިބުނު އެއްޗެއްކަމަށެވެ. ތަންތަނަށް ދިޔުމާއި ކަންކަން ކުރަށް ހުރަސްނާޅާ މަނާ ނުކޮށް ފުރުޞަތު ލިބުމުން ކަމަށެވެ. ދުވެ، ބައިސްކަލް ދުއްވާ ކެރަމްބޯޑުކުޅެ، ކަންކަން ކޮށް ދަސްކުރަން ލިބުނު ފުރުޞަތު ތަށް ކަމަށެވެ. ރަށްޓެހިންގެ ފަރާތުންލިބުނު "ކުރެވޭނޭ ކީއްވެހޭ ނުކުރެވޭނީ " ފަދަ މިހާ " ބޫސްޓު" ކޮއްލާ ބަސްތަކުން ނެވެ.
އޭގެ އިތުރުން އޭނަ ފަދަ ފެނުމުން މަޙްރޫމްވެފައިވާ މީހުންނާއި އެކުވެ ބައްދަލުވެ ވާހަކަ ދެކެވި އެކަކު އަނެކަކުގެ ކިބައިން ހޯދާ ހިތްވަރެވެ. އޭގެ އިތުރުން ދިރި އުޅުމުގައި ދަތި ކަންކަން ހުރިކަމުގައި ވިޔަސް އަމިއްލަ ނަފްސު ދެކެވާ ލޯބި ވެސް އެއީ ލިބޭ ބޮޑު ހީތްވަރެއް ކަމުގައި ޒިޔާ ދެކެއެވެ.
ޒިޔާ ދެކޭ ގޮތުގައި ޙަޔާތުގައި ކަމަކުން ފެއިލް ވުމަކީ އަދި ނާޤާބިލް ވުމެއް ނޫނެވެ. ވަގުތީ ގޮތުން އެކަމެއް ޙާސިލް ނުވިޔަސް އަދި އެ ފުރުޞަތު ލިބުން އެކަށީގެން ވެއެވެ. މިކަމާއި ގުޅޭ ބައެއް ޙަދިސާ ޙިއްސާކުރިއެވެ. އެގޮތުން މޯލްޑިވިއަން އަޑޮލް އަށް އައްޑޫއިން ހޮވޭނެ ކަމަށް ވަރަށް އުންމީދު ކުރިކަމަށާއި އެހެންނަމަވެސް އެދުވަހު ނުހޮވުނު ކަމަށެވެ. އެހެންނަމަވެސް އެއަށް ވުރެ ބޮޑު ޕްލެޓްފޯމަކުން ފަހުން ފުރުޞަތު ލިބުނުކަން އުފަލާއި އެކު ޒިޔާ ހާއްމަ ކުރިއެވެ.
އޭބިޔޫ ފެސްޓިވަލަށް ދާންވެސް 2 ފަހަރު ރިޖެކްޓް ވީ ކަމަށާއި އެހެން ނަމަވެސް ފަހުން ހޮވުނުކަން ފާހަގަ ކުރެއްވިއެވެ. އެ ފެސްޓިވަލްގައި އޭނާގެ އަމިއްލަ ދިވެހި ބަހުން ރީތި ލަވައެއް ކަޒަކިސްތާނުގައި ހުށަ ހަޅައިދިންކަން ފާހަގަ ކުރެއްވިއެވެ. މި ރީތި ލަވަ ޕޮޑްކާސްޓުގެ އެހުންތެރިންނަށް ޒިޔާގެ ހިތްގައިމު އަޑުން އިއްވާލިއެވެ.
ޒިޔާ ބޭރުގެ 10 ވަރަކަށް ޤައުމަށް ދަތުރު ކުރެވިއްޖެ ކަމަށާއި އެތަންތަނުގެ މާޙައުލު ތަޖުރިބާ ކުރެއެވެ. މާޙައުލުގައި ހިމެނޭ ތަކެތީގައި އަތްލައި ހިނގާލާއި އެ މާޙައުލު އިޙްސާސްކުރެއެވެ. ޒިޔާ އަކީ މަޢުލޫމާތު މުއްސަނދި ހޭލުންތެރި ދޫ ފަސޭހަ ފަރާތެއްކަން ހާމަވެއެވެ. މި ހުނަރުތަށް ލިބުނީ ރޭޑިޔޯ އަޑު އަހައިގެންކަން އޭނާ ފާހަގަ ކުރެއްވިއެވެ. އޭގެ އިތުރުން ބޭރުޤައުމުތަކަށް ކުރެވުނު ދަތުރު ތަކުންލިބުނު ހުނަރާއި ތަޖުރިބާތަށް ހިމެނެއެވެ.
މިފަދަ އެތަށް ކާމިޔާބީ ތަކެއްގައި ބައިވެރިވެވުނީ ރައްޓެހިންގެ ވަރަށް ފުރިހަމަ އެހީ ތެރިކަމުގައިކަން ޒިޔާ ޝުކުރުވެރިކަމާއި އެކު ފާހަގަ ކުރެއްވިއެވެ. އެގުތުން އަތޮޅު ތެރެއަށާއި ރާއްޖެއިން ބޭރަށް ކުރާ ތަފާތު ތަޖުރިބާ ދަތުރުތަކާއި ޙޭލުންތެރި ކަމުގެ ދަތުރުތަކުގައި އެހީތެރި ވެދެއްވި ފަރާތްތަށް ހިމެނެއެވެ.
ދިވެހި ރާއްޖޭގެ އަޑުން ލިބުނު ވަޒީފާ އަކީ ވެސް އޭނާގެ މަސައްކަތަށް ލިބުނު ކުރިއެރުމަކާއި އާ ހީތްވަރެއްކަން ފާހަގަ ކުރެއްވިއެވެ. ލޯފަން މީހުންނަށް ޒިޔާރަތް ކުރެވި ދިރި އުޅުމުގެ ވާހަކަތަށް ޙިއްސާކުރުމުގެ ތަފާތު ޙަރަކާތް ތަކުގައި ޒިޔާ މަސައްކަތް ކުރައްވައެވެ. ޒިޔާ ދެކޭ ގޮތުގައި މީހުންނަށް ހީވެފައި އޮތަސް ހާލުގައި އުޅެނީ ލޯފަން މީހުން އެކަނި ނޫންކަން ޒިޔާ ފާހަގަ ކުރެއްވިއެވެ.
ޒިޔާ ދެކޭ ގޮތުގައި މިހާ ނުކުޅެދޭ މީހަކަށްވަނީ އޭނާ އުޅޭ މާޙައުލުން ނުވަތަ މުޖުތަމައުއިން އޭނާ އަށް ބޭނުންވާ ކަންކަން ފަހިވެފައި ނެތުނީމައެވެ. މިސާލަކަށް ވީލް ޗެއަރގައި އުޅޭ މީހަކަށް ތަންނަތަށް ވަނުމުގައި ރޭންޕް ހަދާފައި ހުންނަނަމަ އޭނާއަށް ވަދެވޭނެއެވެ. އެފަދަ ތަންތަނަށް ވަނުމުގައި އޭނާ އަކީ ނުކުޅެދުން ތެރި މީހަކަށް ނުވެއެވެ. ކޮންމެ ނުކުޅެދުންތެރިކަން ހުންނަ މީހަކަށްވެސް މުޖުތަމަޢުގައި އެމީ ހަކަށް ބައިވެރި ވެވޭ ގޮތަށް ކަންކަން ފަހި ވެފައި ހުންނަ ނަމަ ދިރިއުޅެން ފަސޭހަވާނެއެވެ. ނުކުޅެދުންތެރިކަން ކުޑަވާނެއެވެ.
ކިޔެވުމާއި ގުޅޭ ގޮތުން ޒިޔާ ވިދާޅުވި ކުޑައިރު އޭނާ ފަދަ ކުދިންނަށް ކިޔެވޭފަދަ ގޮތެއް ފަހިވެފައި ނެތުމުން ސްކޫލަށްގޮސް ކިޔެވޭނެ ގޮތެއް ނުވިކަމަށެވެ. އެހެންނަމަވެސްފޯނުން ޓޯކުބެކް ބޭނުން ކޮއްގެންް ނޫސްކިޔާކަމަށް ވިދާޅުވިއެވެ. ނޫސްތަކުން މަޢުލޫމާތާއި ޚަބަރު ކިޔައި މަޢުލޫމާތު ހޯދައެވެ. އޭގެ އިތުރުން އެކި ކަހަލަ ޕްރޮގްރާމް ތަކުގައި ބައިވެރިވެ ނަފްސު ހޭލުންތެރިކުރުވައެވެ.
ރަށުގައި އުޅުނުއިރު ތަފާތުޝޯތަށް ހުށައަޅައިދޭން ފުރުޞަތު ލިބުނެވެ. އޭގެ އިތުރުން އެނުއުންސްމަންޓުތަކަށާއި އިޝްތިހާރުތަކަށްވެސް އަޑު އަޅަން ފުރުޞަތު ލިބުނެވެ. ޒިޔާ ދެކޭ ގޮތުގައި ކުޅެދޭ މީހުންތިބި އިރުވެސް އޭނާއަށް އެފުރުޞަތުތަށް ލިބެނީ މީހުންނަށް ކަމުދާތީކަން އޭނާ ޤަބޫލުކުރެއެވެ. އެހެންކަމުން އެކަން ކަން ކުރުމަށް ޝަޢުޤުވެރިވާ ކަމަށާއި ވީހާ ރަނގަޅަށް އެކަމެއް ކިރެވޭތޯ މަސައްކަތް ކުރާކަމަށް ޒިޔާ ވިދާޅުވިއެވެ. ޒިޔާއަށް ވާކަން ވާނެކަން ކުރެވޭނެކަން މިކަންކަމުން ޤަބޫލު ކުރެވެއެވެ.
ކްލަބް ހައުސްފަދަ ޑީޖޭ ފަދަ ޕްލެޓްޕޯމްތަކުން ޒިޔާއަށް ފުރުޞަތުލިބެނީ އޭނާގެ މޮޅު ހުނަރުގެ ސަބަބުންނެވެ. މީހުންގެ ކުރިމަތީގައި އޭނަގެ މަސައްކަތަށް އޮންނަ ޔަޤީންކަމާއި އިތުބާރު އެގޮތުގައި ދަމަހައްޓަން ޒިޔާ ބޭނުންވެއެެވެ.ޒިޔާ އަކީ މުޖުތަމަޢު ދެކޭގޮތުގައި އެހެންމީހުންނަށް އުފާވެރިކަން ގެނެސްދޭ ހިތްހެޔޮ މަޖާ އުފާވެރި މިޒާޖެއްގެ ވެރި އެކެވެ.
ޒިޔާ ލޯފަންމީހުންގެ ޙާލަތު ރަނގަޅު ކުރުމަށްޓަކައި އާއިލާތަކާއި މުޖުތަމަޢު ހޭލުންތެރި ކުރުވުމަށް ފޭސްބުކާއި ޓިކްޓޮކްފަދަ ތަފާތު މަންސަ ތަކުގައި މަސައްކަތް ކުރެއެވެ.ރަނގަޅު މެސެޖްތަކުން ޢާއްމުން ހޭލުންތެރި ކުރުވައެވެ.ޒިޔާ ދެކެނީ މަޖަލާއި ސަމަސާ އާއި އުފާވެރި ކަމުގެ ތެރެއިން އޮށްޓަރު ހުރި ރަނގަޅު މެސެޖެއް ފޯރު ކޮއްދިނުމަށެވެ. ލޯފަންމީހުންގެ ޙައްޤުތަކަށް ވަކާލާތު ކުރެއެވެ. ލޯފަންމީހުންނަށް ނަމޫނާ ދައްކަމުން އެމީހުންގެ ހިތުގައި ކެރުމާއި ހިތްވަރު އާލާ ކޮއްދެއެވެ.
ޒިޔާގެ މަންމަ އާއި ގުޅޭ ގޮތުން ވިދާޅުވީ މަންމަގެ އެހީތެރި ކަމާއި ހިތްވަރު އަބަދުވެސް ލިބެއެވެ.އެއްވެސް ޝަރުތަކާއި ނުލައި ނިހާޔަތަށް ލޯބި ދޭ ކަން ޝުކުރުވެރިކަމާއިއެކު ފާހަގަ ކުރެއްވިއެވެ. ކަންކަން ދަސްކުރުމަށް އެންމެ ފުޅާދާއިރާއެއްގައި ފުރުޞަތުދިންކަމަށެވެ. މަންމަ އާއި ބައްޕަ އާއި މުޅި ޢާއިލާ އަދި އަވަށްޓެރިންނާއި ރަޙްމަތްތެރިންގެ އެހީތެރިކަމާއި ދޭ ތަރުޙީބު ވަރަށް ބޮޑުކަން އުފަލާއި އެކު ފާހަގަ ކުރެއްވިއެވެ. ޒިޔާ ވިދާޅުވީ އޭނާ ބޮޑުވީ އެފަދަ މީހުންނާއި ދޭތެރޭގައި ހޭލުންތެރި ވަރަށް ތަޙުޒީބު މުޖުތަމަޢު އެއްގައި ކަމުގައެވެ.
ޒިޔާގެ މަސައްކަތުގައި ކާމިޔާބީ ތަކެއް ޙާސިލްކުރެވިފައިވާކަން ފާހަގަ ކުރެއްވިއެވެ. އެގޮތުން ލޯފަންމީހުންގެ ޙައްޤުގައި ކުރެވުނު ގިނަ މަސައްކަތްތަކުގެ ތެރެއިން އެފަދަ މީހުންނަށް ވޯޓް ލުމުގެ ޙައްޤު ލިބިގެންދިޔަކަން އެއީ ފާހަގަ ކޮއްލެވޭ ބޮޑު ކާމިޔާބީ އެކެވެ. އޭގެ އިތުރުން އިންޓަނެޓްބޭންކިންނާއި ކޭޝްކާޑު ބޭނުންކުރުމުގެ ފުރުޞަތު ލިބިގެން ދިޔުންވެސް އެއީ ކާމިޔާބެއްކަން ފާހަގަ ކުރެއްވިއެވެ. ޒަމާނީ ވަސީލަތްތަކުން އެންމެންނަށް ލިބިދެވޭ ޚިދުމަތްތަށް ލޯފަން މީހުންނަށްވެސް ލިބިދެވޭ ގޮތަށް އެޕްލިކޭޝަންތަށް ހުރުން އެއީ ޒިޔާ ބޭނުންވާ ގޮތެވެ.
ލޯފަންކުދިންގެ ބެލެނިވެރިންނަށް ޒިޔާ ދޭ ނަސޭޙަތަކީ އެފަދަ ކުދިން ބޭރަށް ނެރެ ކަންކަމުގައި ބައިވެރި ކުރުވުމަށެވެ. މުޖުތަމަޢުއަށް ހޭލުންތެރި ކުރުވާށެވެ. އެކަހެރި ވާ ގޮތަށް ގޭގައި ނުބައިތިއްބާށެވެ. މިފަދަ ފަރާތްތަކަށް އެހީތެރިވާން ބޭނުންވާފަރާތް ތަށް އެބަ ތިބިކަމަށާއި އެފަރާތްތަކާއި ހަމަޔަށް ވާސިލް ކޮއްދެއްވާށެވެ. އެކުދިން އަމިއްލަ ނަފްސައް އިތުބާރު ކުރަން ދަސްވާނީ އެހެންމީހުންހެން ބޭރަށް ނިކުމެވިގެންކަން ޒިޔާ ފާހަގަ ކުރައްވައެވެ. އޭރުން މުޖުތަމަޢުއިން އޭނާ ބަލައިގަންނަ ކަމުގެ އުފާވެރި އިޙުސާސްވާނެއެވެ.
ލޯފަންމީހުންގެ ހިތުގައި އޮންނަ ބިރުވެރިކަމާއި އެހެންމީހުންގެ ހިތުގައި އެމީހުންތާކު ޖެހި ގެއްލުމެއްވެދާނެނީ އޮންނަ ބިރުވެރިކަން ނައްތާލެވޭނީ ކިޔައި ދީގެން އަންގައި ދިނުމަށްވުރެ ބޮޑަށް އެމީހަކު ބައިވެރިކޮއްގެން އިޙްސާސްކޮއްދީ ޢަމަލީ ގޮތުން ތަޖުރިބާ ކުރުމުގެ ފުރުޞަތު ދެވިގެންކަން ޒިޔާގެ ތަޖުރިބާއިން ފާހަގަ ކުރެއްވިއެވެ. ކުޑައިރުންފެށިގެން އެ ފުރުޞަތު ދެވިއްޖެނަމަ އެހެންމީހުނާއި އެކު އުޅެންދަސްވެ ރައްޓެހިން ލިބި ދިރިއުޅުން އެތަށް ތަނެއް ކުރިއަރާނެކަން ޒިޔާ ފާހަގަ ކުރެއްވިއެވެ.