ލޯބިވެރިޔާއަށް ބިރުދައްކައި ބްލެކްމެއިލްކުރި މައްސަލައިގެ ތުހުމަތުގައި މިދިޔަ މަހުގެ 13ވަނަ ދުވަހު ހައްޔަރުކުރި ފުލުސް މީހާގެ މައްޗަށް, ލޯބިވެރިޔާގެ ހިތުގައި ބިރުވެރިކަން އުފެދޭ ގޮތަށް ޖިސްމާނީ އަނިޔާ ކުރާނެކަމަށް ބުނެ ފައިސާ ދިނުމަށް ޑިމާންޑް ކޮށްފައިވާ ކަމުގެ ތުހުމަތުކޮށްފިއެވެ.
މި މައްސަލާގައި ހައްޔަރުކޮށްފައި ވަނީ އުމުރުން 19 އަހަރުގެ ޒައިދާން މުޙައްމަދު, ފަޒާ، އއ. މަތިވެރި، އެވެ.
ތުހުމަތު ކުރެވޭ މައްސަލައަކީ އޭނާ ލޯބީގެ ގޮތުން ގުޅިގެން އުޅުނު ފަރާތުގެ އޮރިޔާން މަންޒަރު ދައްކުވައިދޭ ފޮޓޯ ލީކުކޮށްލާނެ ކަމަށް ބުނެ ބިރުދެއްކި މައްސަލައެކެވެ.
މީގެ ކުރިން ކޯޓު އަމުރެއްގެ ދަށުން އޭނާ ހައްޔަރުކުރުމަށްފަހު ދެ ފަހަރު ވަނީ ބަންދުގެ މުއްދަތު ޖަހާފައެވެ. އެއީ:
- މިދިޔަ މަހުގެ 14ވަނަ ދުވަހު މަތިވެރި މެޖިސްޓްރޭޓް ކޯޓުން ތިން ދުވަހުގެ މުއްދަތަކަށް އޭނާ ބަންދުކުރުމަށް އަމުރުކުރި.
- އޭގެފަހުން މިދިޔަ މަހުގެ 24ވަނަ ދުވަހު ކްރިމިނަލް ކޯޓުން އޭނާގެ މައްޗަށް 10 ދުވަހަށް ބަންދުގެ މުއްދަތު ޖެހި.
އެއަށްފަހު އިއްޔެ ކްރިމިނަލް ކޯޓުން ވަނީ އޭނާގެ މައްޗަށް އިތުރު 10 ދުވަހަށް ބަންދުގެ މުއްދަތު ޖަހާފައެވެ. އެއީ އިއްޔެއިން ފެށިގެން މިމަހުގެ 14 ވަނަ ދުވަހުގެ ނިޔަލަށެވެ.
ހާދިސާ ހިނގާފައިވާ ގޮތަށް ބަލާއިރު އޭނާ އަތުގައި ހުރި ފޮޓޯތައް ލީކުކޮށްލައި، ބިރު ދެއްކުމުގެ ކަންކަން ހިންގާފައިވާކަން އެނގޭނެ ހެކި ހުށަހަޅާފައިވާ ކަމަށް ކޯޓު އަމުރުގައިވެއެވެ. އަދި އެ މައްސަލާގައި އޭނާގެ ފޯނު ނައްތާލައި، ހެކި ނައްތާލާފައިވާކަމަށް ފުލުހުން ތުހުމަތުކުރާ ކަމަށާއި އެކަމަށް ބާރުދޭ ކޮންމެވެސް މިންވަރެއްގެ ހެކި ހުށަހަޅާފައިވާ ކަމަށް އެ އަމުރުގައިވެއެވެ.
އަދި އަންހެން ކުއްޖާގެ ހިތުގައި ބިރުވެރިކަން އުފެދޭ ގޮތަށް ޖިސްމާނީ އަނިޔާ ކުރާނެކަމަށް ބުނެ ފައިސާ ދިނުމަށް ޑިމާންޑް ކޮށްފައިވާ ކަމަށް ވަނީ ތުހުމަތު ކޮށްފައެވެ. އަދި އޮރިޔާން މަންޒަރު ހުރި ފޮޓޯ ލީކުކުރާނެ ކަމަށާއި އަންހެން ކުއްޖާގެ ބައްޕައަށް ވެސް ފޮޓޯ ފޮނުވާނެ ކަމަށް ބުނެފައިވާކަމަށް ތުހުމަތު ކުރެއެވެ.
އަދި އޭނާ ބަންދުގައި ބަހައްޓަން ޖެހެނީ މުޖުތަމައުގެ ސަލާމަތަށް ނުރައްކަލެއް ކުރިމަތިވެދާކަމަށް ފެންނާތީ ކަމަށް ކޯޓު އަމުރުގައި ބުނެފައިވެއެވެ.