ގދ. ގައްދޫ ޕްރީސްކޫލްގެ ރެޖިސްޓްރޭޝަނާއި ހުއްދަ އެޑިއުކޭޝަން މިނިސްޓްރީން ނުދޭތާ ފަސް މަސްދުވަސް ވެފައިވާ ކަމަށާއި، އެ މަސައްކަތަށް އެ މިނިސްޓްރީން އެއްވެސް ގޮތަކަށް އެއްބާރުލުން ނުދޭ ކަމަށް އެ ރަށު ގދ. ގައްދޫ ކައުންސިލުން މިއަދު ބުނެފިއެވެ.
ގައްދޫ ކައުންސިލްގެ ރައީސް މުހައްމަދު އަހުމަދު ސޮއި ކުރައްވައި އެޑިއުކޭޝަން މިނިސްޓަރަށް އެޑްރެސް ކުރައްވައި އިއްޔެ ފޮނުއްވި ސިޓީއެއްގައިވަނީ މި ކަމާ ގުޅިގެން ކަންބޮޑުވުން ފާޅު ކުރައްވައިފައެވެ.
އެ ކައުންސިލްގެ ޕްރީސްކޫލް ރެޖިސްޓްރީ ކުރުމަށް ޓަކައި މި އަހަރުގެ ޖުލައި މަހުން ފެށިގެން ކުރަމުންދާ މަސައްކަތަށް އެޑިއުކޭޝަން މިނިސްޓްރީއިން އެއްވެސް ގޮތަކަށް އެއްބާރުލުން ނުދޭ ކަމަށް އެ ސިޓީގައިވެއެވެ. އަދި ޕްރީ ސްކޫލް ރެޖިސްޓްރީނުކޮށްދީ، މިނިސްޓްރީން އެ ގެންދަނީ ގައްދޫގެ ދަރިންގެ ޅަފަތުގެ ތައުލީމަށް ގަސްދުގައި އަދި ފާޅުގައި ހުރަސްއަޅުއްވަމުން ކަމަށް ބުނެފައިވެއެވެ.
ސިޔާސީ ގޮތުން ޚިޔާލު ތަފާތުވުމަކީ، ރައްޔިތުންގެ ހައްގަށް އަރައިގަނެވެންޖެހޭ ސަބަބެއް ނޫންކަން އެ ސިޓީގައި ފާހަގަކޮށްފައިވެއެވެ.
"ސިޔާސީ ގޮތުން މަނިކުފާނާއި އަދި ސަރުކާރާއި ގައްދޫ ކައުންސިލްގެ ޕޮލިޓިކަލް އެފިލިއޭޝަން ދިމާނުވުމަކީ ގައްދޫ ރައްޔިތުންގެ ހައްގަށް އަރައިގެނެވިގެންވާނެ ކަމެއް ނޫނެވެ. އަދި ލާމަރުކަޒީ ގާނޫނުގެ ދަށުން މި ކައުންސިލަށް އަދާކުރުމަށް މަތިކޮށްފައިވާ ރަށްވެހިކަމުގެ ޚިދުމަތްތައް ގައްދޫގެ ރައްޔިތުންނަށް ފޯރުކޮށްދިނުމަށް ހުރަސްއަލައިގެންވާނެ ކަމެއް ނޫނެވެ،" އެ ސިޓީގައިވެއެވެ.
ގައްދޫ ކައުންސިލުން ބުނީ ޕްރީސްކޫލްގެ ރެޖިސްޓްރީނުކޮށް، ހުއްދަނުދީ އިތުރަށް ދިގުދަންމަމުން ގެންދާނަމަ، މި ކަމަށް ބޭނުންވާ ހުއްދަ ލިބުނީ ކަމަށް ބަލައި، ގައްދޫ ކައުންސިލްގެ ޕްރީސްކޫލްގެ ޚިދުމަތް ފަށާނެ ކަމަށެވެ.
ލޯކަލް ގަވަމެންޓް އޮތޯރިޓީ(އެލްޖީއޭ)އިން ވަނީ ރައީސް ޑރ. މުހައްމަދު މުއިއްޒަށް ނިސްބަތްވެވަޑައިގަންނަވާ ގޮތަށް 'ހަޑިހުތުރު' ބަހުން ގައްދޫ ކައުންސިލްގެ ރައީސް، ވަޓްސްއެޕް ގްރޫޕެއްގައި ވާހަކަދެއްކެވި ކަމަށް ބުނެ، އެ މައްސަލައިގައި ފިޔަވަޅު އަޅަން އަންގައި ކައުންސިލަށް ސިޓީއެއް ވެސް ފޮނުވައިފައެވެ.
މި މައްސަލައިގައި 'ހަޑިހުތުރު' ބަހުން މުއާމަލާތްކުރުމޭ ބުނަނީ ކޮން މާނައެއްގައިކަން ސާފުނުވާ ކަމަށާއި އެ ކަމުގައި ކައުންސިލް ރައީސާމެދު ފިޔަވަޅު އަޅަން ނުޖެހޭ ގައްދޫ ކައުންސިލުން ދެކެއެވެ.
ފިޔަވަޅު އަޅަން އަންގައި ސިޓީ ފޮނުވި ނަމަވެސް، އަދި މިހާތަނަށް އެ މައްސަލައިގައި އެއްވެސް ފިޔަވަޅެއް އަޅާފައެއް ނުވެއެވެ.