ރައީސް ޑރ. މުޙައްމަދު މުއިއްޒުގެ އަބުރުފުޅަށް ހުތުރުވާ ގޮތަށް ގައްދޫ ކައުންސިލްގެ ރައީސް މުޙައްމަދު އަހުމަދު ވާހަކަދެއްކެވި ކަމަށް ބުނާ މައްސަލައިގައި މިހާތަނަށް އެއްވެސް ފިޔަވަޅެއް އަޅާފައިނުވާ ކަމަށް އެ ކައުންސިލުން މިއަދު ބުނެފިއެވެ.
ލޯކަލް ގަވަމެންޓް އޮތޯރިޓީ(އެލްޖީއޭ)އިން ވަނީ ރައީސް މުއިއްޒަށް ނިސްބަތްވެވަޑައިގަންނަވާ ގޮތަށް 'ހަޑިހުތުރު' ބަހުން ކައުންސިލްގެ ރައީސް ވަޓްސްއެޕް ގްރޫޕެއްގައި ވާހަކަދެއްކެވި ކަމަށް ބުނެ، އެ މައްސަލައިގައި ފިޔަވަޅު އަޅަން އަންގައި ކައުންސިލަށް ސިޓީއެއް ފޮނުވާފައެވެ.
އެ ކަމާ ގުޅުވައި ސުވާލުކުރުމުން ގައްދޫ ކައުންސިލް މެންބަރު އަލީ ޝަރީފު މިއަދު "ސަން"އަށް ވިދާޅުވީ، އެ މައްސަލަ ބަލަމުން އަންނަނީ އެ އަތޮޅު ކައުންސިލުން ކަމަށާއި އަދި ކައުންސިލްގެ ރައީސަށް ފިޔަވަޅު އަޅާފައިނުވާ ކަމަށެވެ.
ނަމަވެސް، މި މައްސަލައިގައި އަތޮޅު ކައުންސިލްގެ ބަހެއް މިހާތަނަށް ލިބިފައެއް ނުވެއެވެ.
އެ މައްސަލައިގައި މީގެ ކުރިން އަލީ ޝަރީފު ވިދާޅުވީ، އެ މައްސަލަ ފެންމަތިވީ އެ ރަށުގެ ޕްރީ ސުކޫލު ހަދަން ހުއްދައަށް އެދުނުތާ ހަ މަސްވެގެން ދިޔައިރު ވެސް، ސަރުކާރުން ހުއްދަ ދޫކޮށްފައިނުވާތީ ދެކެވުނު ވާހަކައެއްގެ ތެރެއިން ކަމަށެވެ.
ނަމަވެސް، ސަރުކާރުން 'ހަޑިހުތުރު' ބަހުން މުއާމަލާތްކުރުމޭ ބުނަނީ ކޮން މާނައެއްގައިކަން ސާފުނުވާ ކަމަށާއި އެ ކަމުގައި ކައުންސިލް ރައީސަށް ފިޔަވަޅު އަޅުއްވަން ނުޖެހޭ ކަމަށް ކައުންސިލުން ދެކޭ ކަމަށް އޭނާ ވަނީ ވިދާޅުވެފައެވެ.
އެ މައްސަލައިގައި ކައުންސިލްގެ ރައީސަށް ފިޔަވަޅު އަޅަން ޖެހޭ ކަމަށް ކައުންސިލުން ގަބޫލުނުކުރާ ކަމަށާއި ކޮންމެ ބަޔަކަށް ވެސް މުއާމަލާތު ކުރުމުގެ ހައްގު އޮންނާނެ ކަމަށް އޭރު އަލީ ޝަރީފު ވަނީ ވިދާޅުވެފައެވެ.