ދިވެހިރާއްޖޭގެ ސްކޫލުތަކުގައި ކުޅިވަރުގެ ހަރަކާތްތަކާއި އެކިއެކި އެސޯސިއޭޝަންތައް ހިންގުމުގައި ޓީޗަރުން ގުރުބާންކުރަމުންދާ ކަމަށް ބުނެ، އެކަމުގެ ކަންބޮޑުވުން ރާއްޖޭގެ ޓީޗަރުންގެ ޖަމިއްޔާ (ޓީއޭއެމް) އިން ފާޅުކޮށްފިއެވެ.
ސޯޝަލް މީޑިއާގައި އެ ޖަމިއްޔާއިން އާންމުކުރި ޕޯސްޓެއްގައި ފާހަގަކޮށްފައިވާ ގޮތުގައި، ރުހުނަސް އަދި ނުރުހުނަސް ކުޅިވަރު އެސޯސިއޭޝަންތައް ހިންގުމުގެ އެންމެހާ ބުރައެއް އުފުލަން މަޖުބޫރުވެފައިވަނީ ޓީޗަރުންނަށެވެ. މިއީ ތަޢުލީމީ ދާއިރާގައި މަސައްކަތްކުރާ ފަރާތްތަކުގެ އަސާސީ މަސްއޫލިޔަތުން ބޭރުން، އެ ފަރާތްތަކުގެ ވަގުތާއި ހަކަތަ ނަހަމަ ގޮތުގައި ބޭނުންކުރުން ކަމުގައި އެ ޖަމިއްޔާއިން ސިފަކުރެއެވެ.
ޚާއްޞަކޮށް ބޮޑެތި މުބާރާތްތައް ކައިރިވުމުން ޓީޗަރުންނަށް އޮންނަ ޕްރެޝަރު އިންތިހާއަށް ބޮޑުވެގެންދާކަން ވަނީ ފާހަގަކުރެވިފައެވެ.
އިންޓަ ސްކޫލް 16 އަހަރުން ދަށުގެ ފައިނަލް މެޗުގެ ތެރެއިން: އެ މެޗު 2-1 ގެ ނަތީޖާއަކުން ކާމިޔާބުކުރީ އިމާދުއްދީން --- ފޮޓޯ/ އެފްއޭއެމް
ސްކޫލުތަކުގައި ހިންގާ އިތުރު ހަރަކާތްތަކާއި ކުޅިވަރު މުބާރާތްތަކުގެ ސަބަބުން ޓީޗަރުންނަށް އުފުލަންޖެހިފައިވާ ބުރަ ވަރަށް ބޮޑެވެ. ޓީޗަރުންގެ ޖަމިއްޔާއިން ހާމަކޮށްފައިވާ ގޮތުގައި، ދަރިވަރުން ޕްރެކްޓިސްތަކަށް ގޮވައިގެން ދިއުމާއި، ކުޅިވަރު ކުޅޭ ދަނޑުތަކަށް ކުދިން ގެންދިއުމުގެ ޒިންމާ ނަގަންޖެހެނީ ޓީޗަރުންނަށެވެ.
މީގެ އިތުރުން، އިންޓަސްކޫލް މުބާރާތްތަކަށް ތައްޔާރުވުމުގެ ގޮތުން ކުރަންޖެހޭ މުޅި ހުރިހާ ކަމެއްވެސް ކުރަނީ ޓީޗަރުންނެވެ. މީގެ ތެރޭގައި ކުދިންނަށް ކޯޗުކޮށްދިނުމާއި، މުބާރާތުގެ އިންތިޒާމުތައް ބެލެހެއްޓުމާއި، ދަރިވަރުންގެ ސަލާމަތާއި ރައްކާތެރިކަން ކަށަވަރުކުރުން ފަދަ އެތައް ކަމެއް ހިމެނެއެވެ. މާލެ އާއި އަތޮޅުތެރޭގެ ސްކޫލުތަކުގައިވެސް މިކަން އޮތީ މިފަދައިންނެވެ. އެތުލެޓިކްސް، ފުޓުބޯޅަ އަދި ނެޓްބޯޅަ ފަދަ މުބާރާތްތަކަށް ކުދިން ތައްޔާރުކުރުމަށްޓަކައި، ޓީޗަރުން އެ މީހުންގެ ރަސްމީ މަސައްކަތުގެ ގަޑީގެ އިތުރުން، ހަވީރުގެ ވަގުތުތަކާއި ރޭގަނޑުގެ ވަގުތުތައްވެސް ހޭދަކުރަން މަޖުބޫރުވެއެވެ.
މިއީ ގިނަ ފަހަރަށް އެއްވެސް އިތުރު އުޖޫރައަކާ ނުލައި، ސްކޫލުގެ ނަން ހިފެހެއްޓުމުގެ ނިޔަތުގައި ޓީޗަރުން ލައްވާ ކުރުވާ މަސައްކަތްތަކެއް ކަމަށް ގިނަ ޓީޗަރުންވެސް ދަނީ ބުނަމުންނެވެ. މިކަމުގެ ސަބަބުން ޓީޗަރުންގެ އަމިއްލަ ދިރިއުޅުމަށާއި އާއިލާއަށް ދޭންޖެހޭ ވަގުތުވެސް ގެއްލިގެންދާ ކަމުގެ ކަންބޮޑުވުން ޓީޗަރުން ފާހަގަ ކުރެއެވެ.
މިފަދަ އިތުރު ޒިންމާތަކުގެ ސަބަބުން ޓީޗަރުންގެ އަސާސީ މަސައްކަތް ކަމަށްވާ ކިޔަވައިދިނުމަށް ނޭދެވޭ އަސަރުތަކެއް ކުރަމުންދާކަން ޓީޗަރުންގެ ޖަމިއްޔާއިން ވަނީ ފާހަގަކޮށްފައެވެ. ކުޅިވަރު މުބާރާތްތަކަށާއި އެސޯސިއޭޝަންތައް ހިންގުމަށް ޓީޗަރުން ނަގާ ވަގުތަކީ، ފިލާވަޅުތައް ތައްޔާރުކުރުމަށާއި ދަރިވަރުންގެ ފެންވަރު ވަޒަންކުރުމަށް ބޭނުންކުރެވިދާނެ އަގުހުރި ވަގުތެވެ. އެ ޖަމިއްޔާއިން ބުނެފައިވަނީ، ކުޅިވަރުގެ ކަންކަމަށް ހޭދަކުރާ ވަގުތު، "ކިޔަވައިދިނުމުގެ ކަންކަން ޓީޗަރުން ލައްވާ ކުރުވަން ދެވިއްޖެނަމަ، ދަރިވަރުންނަށާއި މުޅި ޤައުމަށް ލިބޭ މަންފާ ބޮޑުވާނެ" ކަމަށެވެ.
ޓީޗަރުންނަކީ ތަޢުލީމު އުނގަންނައިދިނުމަށް ޚާއްޞަ ތަމްރީނު ލިބިފައިވާ ބަޔަކަށްވާއިރު، އެ ފަރާތްތަކުގެ ހުނަރާއި ޤާބިލުކަން އެންމެ ފުރިހަމަ ގޮތުގައި ބޭނުންކުރެވެން އޮތީ ކްލާސްރޫމުގެ ތެރޭގައެވެ. ނަމަވެސް މިހާރު ކަންކަން އޮތް ގޮތުން، ޓީޗަރުންގެ ސަމާލުކަން ބެހި، ކިޔަވައިދިނުމުގެ ފެންވަރަށް އޭގެ ނުރަނގަޅު އަސަރު ފޯރުމުގެ ބިރު އެބައޮތެވެ. މީގެ އިތުރުން، މެދުކެނޑުމެއްނެތި މަސައްކަތްކުރަން ޖެހުމުގެ ސަބަބުން ޓީޗަރުންނަށް ނަފްސާނީ އަދި ޖިސްމާނީ ވަރުބަލިކަން ކުރިމަތިވެ، ވަޒީފާ މަތިން ފޫހިވުމުގެ މައްސަލަތައްވެސް ރާއްޖޭގެ ތަޢުލީމީ ދާއިރާގައި ދަނީ އިތުރުވަމުންނެވެ. ކިޔަވައިދިނުމުގެ ފެންވަރު ދަށްވުމަކީ ސީދާ ދަރިވަރުންގެ މުސްތަޤުބަލާ ގުޅިފައިވާ ކަމަކަށްވާއިރު، މިއީ ކަމާބެހޭ ފަރާތްތަކުން ވަރަށް ސީރިއަސްކޮށް ވިސްނަންޖެހިފައިވާ މައްސަލައެކެވެ.
މި މައްސަލައަށް ހައްލެއް ހޯދުމުގެ ގޮތުން ޓީޗަރުންގެ ޖަމިއްޔާއިން ވަނީ މުހިންމު ހުށަހެޅުމެއް ހުށަހަޅާފައެވެ. އެގޮތުން، ސްކޫލުތަކުގެ މެދުގައި ބޭއްވޭ އިންޓަސްކޫލް މުބާރާތްތައް ސްކޫލުގެ ހަތަރުފާރުން ބޭރަށް ނެރުމަށް އެ ޖަމިއްޔާއިން ވަނީ ގޮވާލާފައެވެ. މީގެ މާނައަކީ، ކުޅިވަރު މުބާރާތްތައް ހިންގުމާއި އިންތިޒާމުކުރުމުގެ ޒިންމާ ސްކޫލުތަކާއި ޓީޗަރުންގެ ކޮނޑުން ނަގައި، ކަމާބެހޭ ކުޅިވަރު އެސޯސިއޭޝަންތަކާއި ކްލަބްތަކާ ހަވާލުކުރުމެވެ.
މި ބަދަލު ގެނެވިއްޖެނަމަ، ޓީޗަރުންނަށް އެ ފަރާތްތަކުގެ އަސްލު މަސައްކަތަށް ފުރިހަމައަށް ސަމާލުކަން ދިނުމުގެ ފުރުޞަތު ލިބި، ދަރިވަރުންގެ ތަޢުލީމީ ފެންވަރު މަތިކުރުމަށް އިތުރު ބާރަކަށް ވެގެންދާނެއެވެ.
ޤައުމީ ފެންވަރުގައި ކުޅިވަރު ކުރިއެރުވުމަށްޓަކައި، ކުދިން ތަމްރީނުކުރުމުގެ މަސައްކަތް ޕްރޮފެޝަނަލް ކޯޗުންނާއި ކްލަބްތަކުން އަމިއްލައަށް އިސްނަގައިގެން ކުރުމަކީ ބައިނަލްއަޤުވާމީ މައިދާނުގައިވެސް ކަންކުރަމުން އަންނަ ގޮތެވެ. މިކަމާ ގުޅޭގޮތުން އެޑިއުކޭޝަން މިނިސްޓްރީން އަދި ވަކި އެއްޗެއް ހާމަކޮށްފައި ނުވާއިރު، ޓީޗަރުން ތިބީ މިކަމަށް އަމަލީ ސިފައެއް އަންނާނެ ދުވަހެއްގެ އިންތިޒާރުގައެވެ.