މަޝްހޫރު މެސެޖިންގ އެޕްލިކޭޝަން ޕްލެޓްފޯމުން ދުވަސްވީ އައިފޯނުތަކަށް ދޭ ސަޕޯޓް ހުއްޓާލަން ނިންމައިފިއެވެ.
ވަޓްސްއެޕުން ބުނީ، 2025 މެއި ފަހަކުން ފެށިގެން ކުރީގެ ބައެއް އައިފޯނު މޮޑެލްތަކުގައި އެ އެޕްލިކޭޝަން މަސައްކަތް ނުކުރާނެ ކަމަށެވެ. މި ބަދަލު އަންނަނީ iOS 15.1 އަށް ނުވަތަ އެއަށްވުރެ މަތީ ވަރޝަނަކަށް އަޕްޑޭޓް ނުކުރެވޭ ޑިވައިސްތަކަށެވެ.
މި ބަދަލުގެ ސަބަބުން އައިފޯން 5އެސް، އައިފޯން 6 އަދި އައިފޯން 6 ޕްލަސް ފަދަ މޮޑެލްތަކަށް އަސަރުކުރާނެއެވެ. 2013 އަދި 2014 ގައި ނެރުނު މި ފޯނުތަކަށް ސަޕޯޓްކުރާ އެންމެ ފަހުގެ ވާޝަން އަކީ iOS 12.5.7 ކަމުން، އެޕްލިކޭޝަންގެ ކުރިމަގުގެ ބޭނުންތަކަށް މި ފޯނުތައް ނުފުދެއެވެ.
ވަޓްސްއެޕްގެ ފަހުގެ އަޕްޑޭޓްތަކާބެހޭ މައުލޫމާތުތައް ގެނެސްދޭ ވަބެޓާއިންފޯ ގެ މަޢުލޫމާތުތަކުން ދޭހަވާގޮތުގައި، ކުރީގެ ފޯނުތަކަށް ބަރޯސާވަނީ މިހާރު މަދުބަޔަކު ކަމަށްވާތީ ވަޓްސްއެޕްގެ އަމާޒަކީ ޒަމާނީ އޮޕަރޭޓިންގ ސިސްޓަމްތަކާއެކު މަސައްކަތްކުރުމަށް އިސްކަންދިނުމެވެ.
މިގޮތުން، ފުރިހަމަ ފީޗަރތަކާއި ރައްކާތެރިކަން އިތުރުކުރުމަށް އެ އެޕްލިކޭޝަނަށް ފަހުގެ އޯއެސް މުހިންމުވަނީ ކަމަށް އެ ވެބްސައިޓްގައި ބުނެފައިވެއެވެ.
އާ މޮޑެލްތަކުގެ އައިފޯނުގެ ވެރިންނަށް ވަޓްސްއެޕް އަޕްޑޭޓްކުރުމުގެ ފުރުޞަތު އޮތްނަމަވެސް، ކުރީގެ އައިފޯނުތަކުގެ ވެރިންނަށް ވަޓްސްއެޕްއިން ތިން ހައްލެއް ހުށަހަޅައިފައިވެއެވެ. އެއީ:
1. iOS 15.1 ނުވަތަ އެއަށްވުރެ މަތީ ވަރޝަނެއް ހިންގޭ އާ އައިފޯނަކަށް ބަދަލުވުން
2. އެންޑްރޮއިޑް ފޯނަކަށް ބަދަލުވުން
3. އެހެން ޗެޓް އެޕްލިކޭޝަނެއް ބޭނުންކުރަން ފެށުން
މި ބަދަލާ ގުޅިގެން ވަޓްސްއެޕްއިން ވަނީ ޗެޓް ހިސްޓްރީ އެއް ޑިވައިސްއިން އަނެއް ޑިވައިސްއަށް ބަދަލުކުރުމުގެ ވަސީލަތްތައް ތަޢާރަފުކޮށްފައެވެ. މިގޮތުން އައިފޯނުން އައިފޯނަށް އަދި އައިފޯނުން އެންޑްރޮއިޑަށްވެސް ބަދަލުކުރެވޭނެއެވެ.
އެންމެ ފަހުގެ އިޢުލާނާއެކު، ކުރީގެ މޮޑެލްތަކުގެ ބޭނުންކުރާ ފަރާތްތަކަށް ވަނީ އެންމެ ހަ މަސްދުވަހުގެ މުއްދަތެއް ދީފައެވެ. ނަމަވެސް، ގިނަ ފަރާތްތަކުން ކުރީގެ އައިފޯނުތައް ބޭނުންކުރަނީ މާލީ ދަތިކަމުގެ ސަބަބުން ކަމަށްވާތީ، މި ހަ މަސްދުވަހުގެ މުއްދަތު އެފަރާތްތަކަށް އެކަށީގެންވާ ވަރަށްވުރެ ކުރު ކަމަށް ބެލެވެއެވެ.
މި ނިންމުމަކީ ޓެކްނޮލޮޖީ ކުރިއަރަމުންދާ ގޮތާއި ގުޅިގެން އަންނަ ބަދަލެކެވެ. އެޕްލިކޭޝަންތައް ތަރައްޤީވަމުންދާއިރު، އާ ފީޗަރތަކާއި މަސައްކަތްތައް ކުރުމަށް ވަރުގަދަ ސިސްޓަމްތަކެއް ބޭނުންވެއެވެ.
ކުރީގެ ފޯނުތަކުގެ ޔޫޒަރުންނަށް މިއީ ކުއްލި ބަދަލެއް ކަމުގައި ވިޔަސް، މިއީ އެޕްލިކޭޝަން އިތުބާރުހުރި އަދި ރައްކާތެރި ގޮތެއްގައި ދެމެހެއްޓުމަށް ކުރެވޭ ކަމެކެވެ.
މި ޑިވައިސްތަކަށް އެތައް އަހަރެއްގެ މުއްދަތަކަށް ވަޓްސްއެޕްގެ ސަޕޯޓް ލިބިފައިވާތީ، އެ ސަޕޯޓް ނިމުމަކަށް އައުމަކީ އެކަށީގެންވާ ކަމެކެވެ. މިބަދަލާއެކު ކުރީގެ އައިފޯންތަކުގެ ވެރިންޖެހޭނީ އާ ފޯނަކަށް ބަދަލުވާނީތޯ ނުވަތަ އެހެން ޕްލެޓްފޯމަކަށް ބަދަލުވާނީތޯ ނުވަތަ އެހެން އެޕްލިކޭޝަނެއް ބޭނުންކުރާނީތޯ ގޮތެއް ކަނޑައަޅާށެވެ.