ފަސްޓް ނޭޝަނަލް ފައިނޭންސް ކޯޕަރޭޝަނުން، އިންވެސްޓް ކުރުމުގެ ފުރުސަތާއެކު ރިއަލް އެސްޓޭޓް އެންޑް ހޮސްޕިޓާލިޓީ ފަންޑު ލޯންޗުކޮށްފިއެވެ.
އެ ފަންޑަކީ ރާއްޖޭގެ ކެޕިޓަލް މާކެޓް ރެގިއުލޭޓް ކުރާ ބޮޑީ، ކެޕިޓަލް މާކެޓް ޑިވެލޮޕްމަންޓް އޮތޯރިޓީ (ސީއެމްޑީއޭ)އިން ލައިސެންސް ދީފައިވާ އިންވެސްޓްމަންޓް ފަންޑެކެވެ.
ފަސްޓް ނޭޝަނަލް ފައިނޭންސް ކޯޕަރޭޝަންގެ ސީއީއޯ އަދި ކުރީގެ އޮޑިޓާ ޖެނެރަލް ޙަސަން ޒިޔަތު ވިދާޅުވީ މިއީ ގިނަ ބަޔަކަށް އިންވެސްޓް ކުރުމުގެ ފުރުސަތު މަގުފަހި ވާނޭހެން ތައާރަފުކޮށްފައިވާ ފަންޑެއް ކަމަށެވެ.
"މި ފަންޑުގައި އިންވެސްޓް ކުރުމަކީ އިންވެސްޓަރުންނަށް ލިބިގެންދާނޭ ވަރަށް ރަނގަޅު ފުރުސަތެއް. 10،000 ރުފިޔާ އިންވެސްޓް ކުރަން ބޭނުންފުޅުވާ ބޭފުޅުންނަށް ވެސް މި ފަންޑުގައި އިންވެސްޓް ކުރެވޭނެ،" އޭނާ ވިދާޅުވިއެވެ.
ފަސްޓް ނޭޝަނަލް ފައިނޭންސް ކޯޕަރޭޝަންގެ ސީއީއޯ އަދި ކުރީގެ އޮޑިޓާ ޖެނެރަލް ޙަސަން ޒިޔަތު: މި ފަންޑުގައި 10،000 ރުފިޔާއިން ފެށިގެން އިންވެސްޓްކުރެވޭނެ --
އެ ފަންޑަކީ، ރާއްޖޭގައި ރިއަލް އެސްޓޭޓްއާއި ހޮސްޕިޓާލިޓީއަށް އިންވެސްޓުކުރުމުގެ ޚާއްސަ ފުރުސަތެއް ލިބިދޭ ފުރަތަމަ ފަންޑެވެ. މި ފަންޑު ފަރުމާކޮށްފައިވަނީ އިކުއިޓީގައި އިންވެސްޓް ކުރަން ބޭނުންވާ މީހުންނަށާއި ޑެޓް އިންސްޓްރުމެންޓްސްތަކުގައި އިންވެސްޓް ކުރަން ބޭނުންވާ މީހުންނަށް ވެސް ފުރުސަތު ހުޅުވާލައިގެންނެވެ.
- އިކުއިޓީ އިންވެސްޓްމެންޓް: އިކުއިޓީގައި އިންވެސްޓް ކުރަން ބޭނުންވާ މީހުންނަށް ފަންޑުގެ ހިއްސާ ވިއްކަމުންދާއިރު، ފަންޑުގެ ހިއްސާ ގަންނަ މީހުންނަށް އަންދާޒާ ކުރެވޭ ގޮތުގައި އަހަރަކު 20 ޕަސެންޓް ލިބޭނެ ކަމަށް އެ ކުންފުނިން ބުނޭ. މި ޕޭމަންޓުން އިންވެސްޓަރުންނަށް އަހަރަކު ހަތަރު ފަހަރު ފައިދާ ބެހުމަށް ހަމަޖެހިފައިވޭ.
- ޑެޓް އިންވެސްޓްމެންޓް: ފަންޑުގެ ބޮންޑް ހޯލްޑަރުންނަށް ހަ އަހަރުވަންދެން އަހަރަކު 12 ޕަސެންޓްގެ ރިޓާންއެއް ލިބޭނެ. ރިޓާންސް އަހަރަކު ހަތަރު ފަހަރު އިންވެސްޓަރުންނަށް ލިބޭނެ.
މި ފަންޑުގެ އިތުރު މައުލޫމާތު އެސްޓޭޓް ފަންޑްގެ ވެބްސައިޓުން ލިބޭނެއެވެ.
އެ ފަންޑަށް ސަބްސްކްރައިބް ކުރުމުގެ ފުރުސަތު ވަރަށް އަވަހަށް ހުޅުވާލާނެ ކަމަށް ފަސްޓް ނޭޝަނަލްއިން ބުނެއެވެ.
ފަސްޓް ނޭޝަނަލްއިން މިހާރު ވެސް އަންނަނީ، ބޮންޑާއި ސުކޫކު ވިއްކައިގެން ކުންފުނިތަކަށް ފައިސާ ހޯދުމަށް އެހީތެރިވެދެމުންނެވެ. އެގޮތުން މިދިޔަ މާޗު މަހުގެ ނިޔަލަށް 100 މިލިއަން އަށްވުރެ ގިނަ ރުފިޔާގެ ބޮންޑާއި ސުކޫކު ވިއްކައިގެން މެނޭޖް ކޮށްފައިވެއެވެ.