މިދިޔަ ސެޕްޓެންބަރު މަހު 11ގައި ހދ. ކުޅުދުށްފުށި ސިޓީގައި މަރުވެފައި އޮއްވާ ފެނުނު އެރަށު ޑޭޒީފެހި، މުޙައްމަދު ހަސަން މަރުވެފައި ވަނީ ގެނބިގެން ކަމަށާއި އެކަމުގައި އެއްވެސް މީހެއްގެ ބައިވެރިވުން އޮތް ކަމަށް ނުބެލެވޭ ކަމަށް ފުލުހުން މިއަދު ބުނެފިއެވެ.
މުޙައްމަދު ހަސަން މަރުވި ސަބަބު ދެނެގަތުމަށް އޭނާގެ ހަށިގަނޑު ޕޯސްޓްމޯޓަމަށް އިންޑިއާއަށް ފޮނުވިއެވެ. އެއަށްފަހު ސެޕްޓެމްބަރު 20ގައި ހަށިގަނޑު އަނބުރާ ގެނައުމަށް ފަހު ވަނީ ވަޅުލާފައެވެ.
ފުލުހުން މިއަދު ބޭއްވި ނޫސްވެރިންގެ ބައްދަލުވުމެއްގައި ޗީފް އިންސްޕެކްޓާ އޮފް ޕޮލިސް މުޙައްމަދު ސާމިހު ވިދާޅުވީ، މިދިޔަ ސެޕްޓެމްބަރު މަހުގެ 11 ވަނަ ދުވަހުގެ ދަންވަރު 1:35 ހާއިރު މުޙައްމަދު ހަސަން ބަނދަރު ސަރަހައްދުގައި އުޅޭ ތަން ސީސިޓީވީ ފުޓޭޖުން ފެނިފައިވާ ކަމަށާއި އެރޭ 2:29 ހާއިރު ފުލުހުންނާ ބައްދަލުވެ ވާހަކަދެއްކި ކަމަށެވެ.
އޭގެފަހުން 2:55 ހާއިރު އެ ރަށު ބަނދަރު މަގުގައި ހުރެފައި އޭގެ އިރުކޮޅެއްފަހުން މަރުވެފައި އޮއްވާ ފެނުނު ދިމާލުން ފެންނަ ކަމަށް ސާމިހު ވިދާޅުވިއެވެ.
"މިދެންނެވުނު ގޮތަށް މުޙައްމަދު ހަސަންގެ ހަރަކާތްތައް ފެނުނު ފަހުން އޭނާގެ ހަށިގަނޑު މޫދުން ފެނުމާ ހަމައަށް އެ ދިމާލުން އިތުރު އެއްވެސް މީހެއްގެ ހަރަކާތެއް ފެނިފައިނުވާކަން ފާހަގަކުރަން. އަދި، ފުޓޭޖުން ފާހަގަކުރެވުނު ކަންކަމަށް ރިއާޔަތްކުރާއިރު، 2:57 ހާއިރު އެ ދިމާލުން މޫދަށް ވެއްޓުނު ކަމަށް ބެލެވޭ," ސާމިހު ވިދާޅުވިއެވެ.
މީގެއިތުރުން، މުޙައްމަދު ހަސަންގެ ހަށިގަނޑުން "ހަން މެށިފައި" ހުރި ކުދި ޒަޚަމްތަކެއް ފެނިފައިވީ ނަމަވެސް، މީހެއްގެ ކިބައިން އަނިޔާއެއް ލިބިފައިވާކަން ފާހަގަނުކުރެވޭ ކަމަށް ސާމިހު ވަނީ ވިދާޅުވެފައެވެ.
މިހާތަނަށް ކުރެވުނު ތަހުގީގުތަކުން މުޙައްމަދު ހަސަން ނިޔާވުމުގައި އިތުރު ފަރާތެއްގެ ބައިވެރިވުމެއް އޮތް ކަމަށް ތަހުގީގަކަށް ނުބެލެވޭ
ޗީފް އިންސްޕެކްޓާ އޮފް ޕޮލިސް މުޙައްމަދު ސާމިހު
އޭނާ މަރުވި ސަބަބު ދެނެގަތުމަށް ހެދި އޮޓޯޕްސީގެ ވަގުތީ ނަތީޖާގައި އޭނާ މަރުވީ ގެނބިގެން ކަމަށް ބަޔާންކޮށްފައިވާ ކަމަށް ސާމިހު ވިދާޅުވިއެވެ. އަދި، މައްސަލައިގެ ތަހުގީގު ފުރިހަމަ ކުރެވޭނީ އޮޓޮފްސީގެ ދާއިމީ ނަތީޖާ ލިބިގެން ކަމަށްވާއިރު، މިހާތަނަށް އެ ނަތީޖާ ލިބިފައިނުވާ ކަމަށް އޭނާ ވިދާޅުވިއެވެ.