މާލޭގެ ގުލާބީ މަގުގައި ހުރި ގެއެއް ތެރޭގައި ދިވެއްސަކު މަރުވެފައި އޮއްވައި މިއަދު ފެނިއްޖެއެވެ.
މަރުވެފައި އޮއްވާ ފެނުނީ މއ. ހުދުއަކިރި، އަބްދުﷲ ހަސަން (53އ) އެވެ.
ފުލުހުން ބުނީ، ގުލާބީ މަގުގައި ހުރި ގެއެއްގެ ތެރެއިން މީހަކު ޚަބަރު ހުސްވެފައި އޮތް ކަމުގެ ރިޕޯޓު ލިބިގެން ފުލުހުން އެ ސަރަހައްދަށް ދިޔަ ކަމަށެވެ. އެ ގެއިން ފެނުނު މީހާ އައިޖީއެމްއެޗަށް ގެންދިޔަ ކަމަށް ފުލުހުން ވަނީ ބުނެފައެވެ.
ހޮސްޕިޓަލަށް ގެންދިޔައިރު ވެސް އެ މީހާ މަރުވެފައިވާ ކަމަށާއި ހަށިގަނޑުގެ ބޭރު ފުށުން އެއްވެސް އަނިޔާއެއް ފެންނަން ނެތް ކަމަށް އައިޖީއެމްއެޗާ ހަވާލާދީ ފުލުހުން ވަނީ ބުނެފައެވެ.
މި މައްސަލަ ފުލުހުން އަންނަނީ ތަހުގީގުކުރަމުންނެވެ. އެކަމަކު، މައްސަލައާ ގުޅޭ އިތުރު އެއްވެސް ތަފުސީލެއް ފުލުހުން ހިއްސާކޮށްފައެއް ނުވެއެވެ.
ފާހަގަކޮށްލެވޭ ގޮތުގައި، އިއްޔެ ހުޅުމާލޭ ފުރަތަމަ ފިޔަވަހީގެ ފަޅުތެރެއިން ވެސް ވަނީ މަރުވެފައި އޮތް މީހަކު ފެނިފައެވެ. ފަޅުތެރެއިން ފެނުނީ، އިބްރާހިމް ޖިނާހް އަލީ (36އ)، ކޮކްނެޓްވިލާ، މ. މަޑުއްވަރީއެވެ.