ރާއްޖޭގެ ސަރައްދުގައި އެންމެ ވައި ނުސާފީ ވިލިމާލެއަށް ކަމަށްވާއިރު، ވައި ނުފާސުވާ ވަގުތުތަކުގައި ރައްކާތެރިވާން, ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިއަދު އިލްތިމާސްކޮށްފިއެވެ.
އިންޑިއާގެ ބޭ އޮފް ބެންގަލްގައި އުފެދިފައިވާ ކޮޅިގަނޑާ އެއްކޮށް ރާއްޖޭގެ ވައި ވަނީ ނުސާފުވެފައެވެ.
މިގޮތުން، އައިކިޔުއެއާ އެޕުން ދައްކާ ގޮތުގައި، އެންމެ ބޮޑަށް ވައި ތަޣައްޔަރުވެފައި ވަނީ ވިލިމާލެއަށެވެ. ވައިގެ ތަޣައްޔަރުކަން ބަލާ މިންގަނޑުން އެ ރަށުގައި އުޅެނީ 94ގައެވެ. މާލެއަށް 82ގައި އުޅޭއިރު، ށ.ފުނަދޫއަށް އުޅެނީ 55ގައެވެ.
މި މިންގަނޑުތަކަށް ބަލާއިރު، ވައިގެ ނުސާފުކަން ހުރުން ރަނގަޅީ 0-50 އާ ދެމެދުގައި ކަމަށް އެޗްޕީއޭގެ ވައި ނުސާފުވާ ރޭންޖުތަކުން ދައްކައެވެ. އަދި، އެ މިންގަނޑުގެ ތެރޭގައި ވައިގެ ނުސާފުކަން ހުރިނަމަ، އެއިން އެއްވެސް ނުރައްކަލެއް ނެތް ކަމަށް ސިއްހީ މާހިރުން ބުނެފައިވެއެވެ.
ވައި ނުސާފުވާ މިންގަނޑުތަކާއި، ސިއްހީ މާހިރުންގެ ލަފާ ---- ފޮޓޯ/ އެޗްޕީއޭ
އެކަމާ ގުޅިގެން އެޗްޕީއޭއިން ވަނީ ވައި ނުސާފުވާ ގަޑިތަކުގައި ރައްކާތެރިކަމުގެ ފިޔަވަޅުތައް އަޅަން އެދިފައެވެ. މިގޮތުން، އެޅިދާނެ ފިޔަވަޅުތަކުގެ ތެރޭގައި:
- ފުއްޕާމޭގެ ބަލިތަކާ ހިތުގެ ބަލިތަކާއި އެލާޖީ މައްސަލަތައް ހުންނަ މީހުން ގެއިން ބޭރުގައި ގިނަ ވަގުތު ހޭދަނުކުރުން
- ބޭރަށް ނިކުންނަން ޖެހޭ ހާލަތުގައި މާސްކު އެޅުން
- ކުޑަކުދިންނާއި ދޮށީ އުމުރުގެ މީހުންނާއި މާބަނޑު މީހުން ގިނަ ވަގުތު ބޭރުގައި ނޫޅުން
- ތުއްތު ކުދިން ބޭރަށް ނުނެރުން
- ގޭގެ ދޮރުތައް ލައްޕާފައި ބެހެއްޓުން
- ބޭރުގައި ކުޅިވަރު ކުޅުމާއި ކަސްރަތު ކުރުން ފަދަ ކަންކަން މަޑު ޖައްސާލުން
މީގެއިތުރުން، މުސުމާ ބެހޭ ގައުމީ އިދާރާއިން އިއްޔެ "ސަން"އަށް ބުނި ގޮތުގައި، ވައި ނުފާސުވަނީ އިންޑިއާގައި އުފެދޭ ހިރަފުހާއި ކުނޑިތައް ވަޔާއެކު ރާއްޖެއަށް އައުމުގެ ސަބަބުން ކަމަށެވެ. އާންމު ގޮތެއްގައި މި ކަމުގެ އަސަރު ކުރަނީ ރާއްޖޭގެ އުތުރާއި މެދު ރާއްޖެ ތެރެއަށެވެ. ބޭ އޮފް ބެންގަލްގައި އުފެދިފައިވާ ކޮޅިގަނޑާ އެކު ރާއްޖޭގެ ދެކުނަށް ވެސް ވައިނުސާފުވުމުގެ އަސަރުވަނީ ކޮށްފައި ކަމަށް މެޓުން ބުންޏެވެ.
ރާއްޖޭގެ ވައި އާންމުކޮށް ނުސާފުވަނީ "ހޭޒް"ގެ ސަބަބުންނެވެ.
"ފޮގް ވުން" އަދި "މިސްޓް" އާ ޚިލާފަށް ހޭޒް އަކީ ވައިގެ ތެރޭގައި ހުންނަ ވަރަށް ކުދި ހިކި ޕާޓިކަލް ތަކެކެވެ. އެއީ ދުންފިންޏެއް ނޫނެވެ. ހަމަ ލޮލަށް ނުފެނުނު ކަމުގައި ވީނަމަވެސް، މި ޕާޓިކަލްތަކުގެ ސަބަބުން ޖައްވު ނުސާފުވެ ދުރު ފެންނަ މިންވަރު ދަށްވެއެވެ.