އިންޑިއާގެ ބޭ އޮފް ބެންގަލްގައި އުފެދިފައިވާ ކޮޅިގަނޑާއެކު ރާއްޖޭގެ ވައި ނުސާފުވެފައިވާ ކަމަށް މޫސުމާބެހޭ އިދާރާ (މެޓް)އިން ބުނެފިއެވެ.
އާންމު ގޮތެއްގައި ކޮންމެ އަހަރަކު ވެސް ނޮވެންބަރުން ފެށިގެން މާޗު މަހުގެ ނިޔަލަށް ރާއްޖޭގެ ވައި ނުސާފުވެއެވެ.
މި ކަމާ ގުޅިގެން މެޓުން "ސަން"އަށް ބުނީ، މި ގޮތަށް ދިމާވަނީ އިންޑިއާގައި އުފެދޭ ހިރަފުހާއި ކުނޑިތައް ވަޔާއެކު ރާއްޖެއަށް އައުމުގެ ސަބަބުން ކަމަށެވެ. އާންމު ގޮތެއްގައި މި ކަމުގެ އަސަރު ކުރަނީ ރާއްޖޭގެ އުތުރާއި މެދު ރާއްޖެ ތެރެއަށެވެ. އެހެން ނަމަވެސް ބޭ އޮފް ބެންގަލްގައި އުފެދިފައިވާ ކޮޅިގަނޑާ އެކު ރާއްޖޭގެ ދެކުނަށް ވެސް ވައިނުސާފުވުމުގެ އަސަރުވަނީ ކޮށްފައި ކަމަށް މެޓުން ބުންޏެވެ.
ރާއްޖޭގެ އެކި ހިސާބުތަކަށް ވައި ތަޣައްޔަރު ވެފައިވާ މިންވަރު މެޓުން މިރޭ ހާއްމަކޮށްފައެއް ނުވެއެވެ. ނަމަވެސް، ވައިގެ ސާފުކަން އައިކިޔުއެއާ އެޕުން ބަލައިލެވޭނެކަން މެޓުން ފާހަގަކޮށްފައި ވެއެވެެ.
އައިކިޔުއެއާއިން ދައްކާ ގޮތުގައި ރާއްޖެއިން އެންމެ ބޮޑަށް ވައި ތަޣައްޔަރުވެފައި ވަނީ ވިލިމާލެއަށެވެ. ވައިގެ ތަޣައްޔަރުކަން ބަލާ މިންގަނޑުން ވިލިމާލެ އުޅެނީ 99ގައެވެ. މާލެ 97ގައި އުޅޭއިރު، ށ. ފުނަދޫ އުޅެނީ 58ގައެވެ.
މި މިންގަނޑަށް ބަލާއިރު، ވައިގެ ނުސާފުކަން ހުރުން ރަނގަޅީ 0-50އާ ދެމެދުގައެވެ. ވައިގެ ނުސާފުކަން މި މިންގަނޑުގެ ތެރޭގައި ހުރިނަމަ، އެއިން އެއްވެސް ނުރައްކަލެެއް ނެތް ކަމަށް ސިއްހީ މާހިރުން ބުނެއެވެ.
އައިކިއު އެއާއިން ދައްކާ ވައި ނުސާފުވާ ރޭންޖުތަކާއި، ސިއްހީ ލަފާ ---ފޮޓޯ/ އެޗްޕީއޭ
ރާއްޖޭގެ ވައި ނުސާފުވެފައި ވާއިރު، މިކަމުގެ ސަބަބުން ކުރިމަތި ވެދާނެ ސިއްހީ މައްސަލަތަކުން ސަލާމަތް ވުމަށް މާސްކު އެޅުމަކީ މުހިންމު ކަމެކެވެ. އަދި ކޮޓަރި ތަކުގައި އެއާ ޕިއުރިފަޔާ ބޭނުންކުރުމުން ވެސް މިކަމުގެ ސަބަބުން ލިބޭ ގެއްލުންތަކުން ސަލާމަތް ވެވޭނެއެވެ.
ރާއްޖޭގެ ވައި އާންމުކޮށް ނުސާފުވަނީ "ހޭޒް"ގެ ސަބަބުންނެވެ.
"ފޮގް ވުން" އަދި "މިސްޓް" އާ ޚިލާފަށް ހޭޒް އަކީ ވައިގެ ތެރޭގައި ހުންނަ ވަރަށް ކުދި ހިކި ޕާޓިކަލް ތަކެކެވެ. އެއީ ދުންފިންޏެއް ނޫނެވެ. ހަމަ ލޮލަށް ނުފެނުނު ކަމުގައި ވީނަމަވެސް، މި ޕާޓިކަލްތަކުގެ ސަބަބުން ޖައްވު ނުސާފުވެ ދުރު ފެންނަ މިންވަރު ދަށްވެއެވެ.