ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ)ގެ އޮފީސް ހިންގުމަށްޓަކައި ކުއްޔަށް ނަގާފައިވާ އިމާރާތުގެ ދެ ފްލޯގައި މޯލްޑިވްސް މީޑިއާ ހައުސް ޕްރައިވެޓް ލިމިޓެޑްއިން "އެމްއެމްޓީވީ" ގެ ނަމުގައި މީޑިއާއެއް ހިންގާތީ އެކަމުގެ ކަންބޮޑުވުން ފާޅުކޮށް، ރައްޔިތުންގެ މަޖިލީހަށް މިއަދު ހުށަހެޅި ކުއްލި މައްސަލަ ޝަރުތު ހަމަނުވާކަމަށް ނިންމައި، ބޭރުކޮށްލައިފިއެވެ.
މި ކުއްލި މައްސަލަ ހުށަހެޅުއްވީ ގަލޮޅު ދެކުނު ދާއިރާގެ އެމްޑީޕީގެ މެންބަރު މީކާއިލް އަހުމަދު ނަސީމެވެ.
މިއަދުގެ ޖަލްސާ ފައްޓަވަމުން ރިޔާސަތުގައި އިންނަވައި މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވީ، ކުއްލި މައްސަލައެއް ލިބިފައިވީ ނަމަވެސް އެ މައްސަލައިގެ ޝަރުތު ހަމަނުވާތީ ބަލައިގަނެވެން ނެތް ކަމަށް ނިންމަވާފައިވާ ކަމަށެވެ.
މީކާއިލް ހުށަހެޅުއްވި ކުއްލި މައްސަލާގައި ބުނެފައިވަނީ އެންސްޕާގެ އޮފީސް ހިންގުމަށްޓަކައި އިމާރާތެއް ކުއްޔަށް ނެގުމަށް 25 ޖޫންގައި ނޭޝަނަލް ޓެންޑާ ބޯޑު މެދުވެރިކޮށް ކޮށްފައިވާ އިއުލާނާ ގުޅިގެން ބިޑު ހުށަހެޅި ފަރާތްތަކުގެ ތެރެއިން، މޯލްޑިވްސް މީޑިއާ ހައުސް ޕްރައިވެޓް ލިމިޓެޑް ކިޔާ ކުންފުންނަކަށް އެ ބިޑު އެވޯޑުކޮށްފައިވާ ކަމަށެވެ.
ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމް: އޭނާ ވަނީ އެންސްޕާގެ މައްސަލަ މަޖިލީހަށް ހުށަހަޅުއްވާފައި -- ފޮޓޯ/ މަޖިލިސް
އެ އިމާރާތުގެ ހަތަރު ފްލޯއަށް ފަސް އަހަރު ދުވަހުގެ ކުލީގެ ގޮތުގައި 34.8 މިލިއަން ރުފިޔާ އެކީ އެއްފަހަރާ ދިނުމަށް ފަހު، އެ ކުންފުނިން ހަތަރު ފްލޯ ކުއްޔަށް ހިފުމަށް ފަހު، އޭގެ ތެރެއިން ދެ ފްލޯ މޯލްޑިވްސް މީޑިއާ ހައުސް އިން ނޮވެމްބަރު 28ގައި ހިންގަން ފަށާފައިވާ އެމްއެމްޓީވީ ހިންގުމަށްޓަކައި، ކުއްޔަކާ ނުލާ އެ ކުންފުންޏަށް ދީފައިވާކަމަށް މީސްމީޑިއާގައާއި، އެކިއެކި މަންސަތަކުގައި ތުހުމަތުކުރެވެމުންދާ ކަމަށް އެ މައްސަލައިގައި ވަނީ ފާހަގަކޮށްފައެވެ.
އެމްއެމްޓީވީގައި މަސައްކަތްކުރުމަށް ވަޒީފާ ދީފައިވާ ނޫސްވެރިންނާއި ޕްރެޒެންޓަރުންގެ ތެރޭގައި ދައުލަތުގެ އެކިއެކި އިދާރާތަކުގައި މަސައްކަތްކުރާ މުވައްޒަފުން ހިމެނޭ ކަމަށް ވަނީ ތުހުމަތުކޮށްފައެވެ. އެ މުވައްޒަފުންނަށް އެމްއެމްޓީވީގައި އަދާކުރާ ވަޒީފާއަށް ދޭންޖެހޭ އުޖޫރަ ދެނީ ދައުލަތުގެ އިދާރާތަކުގެ ބަޖެޓުން ކަމަށް ވެސް ތުހުމަތުކޮށްފައިވެއެވެ.
އެމްއެމްޓީވީ އޮޕަރޭޓްކުރުމަށް އެއާފްރައިޓްކޮށް އިކުއިޕްމަންޓް ގެނެސްފައިވާއިރު، އެ ތަނެތި ކަސްޓަމުން ނެރެފައިވަނީ ގާނޫނާ ޚިލާފަށް އިމްޕޯޓް ޑިއުޓީ މާފުކޮށްގެން، ޑިއުޓީއަށް އެއްވެސް ފައިސާއެއް ނުދައްކާ ކަމަށް ވެސް ކުއްލި މައްސަލައިގައި ވަނީ ތުހުމަތުކޮށްފައިވެއެވެ.
އެ މައްސަލައިގައި އިތުރަށް ފާހަގަކޮށްފައިވަނީ، އެ މުއާމަލާތަކީ ދައުލަތުގެ ޕްރޮކިއުމަންޓް ނިޒާމު ނަހަމަގޮތުގައި ބޭނުންކޮށްގެން ހިންގާފައިވާ ބޮޑު ޚިޔާނާތެއްކަމަށެވެ.
އެ ޓީވީ ހިންގުމަށާއި އެ ތަނުގައި މަސައްކަތްކުރާ މުވައްޒަފުންގެ އުޖޫރަ ދިނުމަށް ދައުލަތުގެ މާލިއްޔަތުން ހޭދަކުރަމުންދާނަމަ އެއީ ދައުލަތުގެ މާލިއްޔާއިން ހިންގޭ ބޮޑު ވައްކަމާއި ކޮރަޕްޝަންގެ އަމަލެއް ކަމަށް ވަނީ ތުހުމަތުކޮށްފައެވެ.
އެންސްޕާގެ ބަޖެޓުން އެފަދައިން ފައިސާ ހޭދަކުރުމަކީ އެ އެޖެންސީއާ ގާނޫނީގޮތުން ލާޒިމުކޮށްފައިވާ މަސްއޫލިއްޔަތު އަދާކުރުމަށް އެޅޭ ހުރަހެއް ކަމަށް ސިފަކޮށްފައިވެއެވެ. އެގޮތުން، ރައްޔިތުންގެ ތެރެއިން އިޖުތިމާއީ ރައްކާތެރިކަމަށް ބޭނުންޖެހިފައިވާ މީހުންނަށް އެހީތެރިކަން ފޯރުކޮށްދިނުމަށް ހުންނަ ފައިސާ ހުސްވެ، ދައުލަތުގެ ފަރާތުން އެފަދަ އެހީތެރިކަން ފޯރުކޮށްނުދެވި ހުއްޓުމަކަށް އަތުވެދާނެ ކަމެއް ކަމަށް ބުނެފައިވެއެވެ.
ފާހަގަކޮށްލެވޭ ގޮތުގައި އެންސްޕާއިން ވަނީ އެ ތުހުމަތުތައް ދޮގުކޮށް، މައްސަލަ ބަލައިދޭން އެންޓި ކޮރަޕްޝަން ކޮމިޝަން (އޭސީސީ)ގައި އެދިފައެވެ.
އޭސީސީން ވަނީ އެ މައްސަލަ ބަލަން ފަށާފައެވެ. އެކަމަކު، އެ މައްސަލައާ ގުޅޭ ގޮތުން އިތުރު އެއްވެސް އެއްޗެއް އޭސީސީން ބުނެފައެއް ނުވެއެވެ.