ރައްޔިތުންގެ މަޖިލިސް އިދާރާގެ އެންމެ އިސް ތިން މަގާމުކަމަށްވާ އަމީންއާއްމާއި، ކައުންސެލް ޖެނެރަލް އަދި ސާޖެންޓް އެޓް އާމްސްގެ މަގާމުގައި މިހާރުވެސް ތިއްބެވި ބޭފުޅުން އިތުރު ދައުރަކަށް އަލުން އެ މަގާމުތަކަށް މިއަދު އައްޔަނުކުރައްވައިފިއެވެ.
އެ ތިން މަގާމުގައި ތިއްބަވާ ބޭފުޅުންނަކީ:
- އަމީންއާއްމު: ފާތިމަތު ނިއުޝާ
- ކައުންސެލް ޖެނެރަލް: ފާތިމަތު ފިލްޒާ
- ސާޖެންޓް އެޓް އާމްސް: މޭޖާ ޖެނެރަލް ރިޓަޔާޑް ތަލްހަތު ހަސަން
މިދިޔަ މަހުގެ 25 ވަނަ ދުވަހު އޮތް ރައްޔިތުންގެ މަޖިލީހުގެ ޖަލްސާގައި އެ ތިން ބޭފުޅުންގެ މަގާމު ދަމަހައްޓައި އިތުރު ދައުރަކަށް އައްޔަނުކުރުމަށް މެންބަރުންގެ އިއްތިފާގުން ވަނީ ފާސްކޮށްފައެވެ.
އެދުވަހުގެ ޖަލްސާގައި ނެގި ވޯޓުގައި އަމީންއާއްމު، ނިއުޝާގެ މަގާމު ދަމަހައްޓަން 79 މެންބަރުންގެ އިއްތިފާގުން ވަނީ ފާސްކޮށްފައެވެ. އަދި ކައުންސެލް ޖެނެރަލް، ފިލްޒާއާއި ސާޖެންޓް އެޓް އާމްސް، ތޮލްހަތުގެ މަގާމު ދަމަހައްޓަން 80 މެންބަރުންގެ އިއްތިފާގުން ވަނީ ފާސްކޮށްފައެވެ.
އެއަށްފަހު މިއަދު މަޖިލިސް އިދާރާގައި އޮތް ރަސްމިއްޔާތެއްގައި އެ ތިން ބޭފުޅުން ވަނީ އަހުދުގެ ލިޔުމުގައި ސޮއިކުރައްވާފައެވެ.
މަޖިލީހުގެ ގަވާއިދު ބުނާ ގޮތުގައި އެ ގަވާއިދަށް އަމަލުކުރަން ފަށާތާ ދެ ދައުރު ހަމަވުމުގެ ކުރިން މަޖިލީހުން އެހެން ގޮތަކަށް ކަނޑަނާޅާހާ ހިނދަކު ހިނގަމުންދާ މަޖިލީހުގެ އަމީންއާންމާއި މަޖިލީހުގެ ކައުންސެލް ޖެނެރަލް އަދި ސާޖެންޓް އެޓް އާމްސްގެ މަގާމަށް މީހުން އައްޔަންކުރަންވާނެއެވެ.
ފިލްޒާ ކައުންސެލް ޖެނަރަލް ކަމަށް އައްޔަން ކުރީ 17 ވަނަ ރައްޔިތުންގެ މަޖިލީހުގައި 70 މެމްބަރުންގެ އަޣުލަބިއްޔަތުންނެވެ. ފިލްޒާ ވަނީ ބަންޑާރަ ނައިބުގެ އޮފީހުގައި ގާނޫނީ ވަކީލެއްގެ ގޮތުގައި ވެސް މީގެ ކުރިން މަސައްކަތް ކުރައްވާފައެވެ.
މޭޖާ ރިޓަޔާޑް ތަލްހަތަކީ އެމްއެންޑީއެފްގައި 21 އަހަރު ޚިދުމަތް ކުރައްވާފައިވާ ބޭފުޅެކެވެ. އެ ޚިދުމަތުން އޭނާ ރިޓަޔާ ކުރެއްވީ 15 ޖެނުއަރީ 2020 ގައެވެ.