މި އަހަރަށް ފާސްކުރި ބަޖެޓުގައި ހިލޭ އެހީއަށް 1.27 ބިލިއަން ރުފިޔާ ލިބޭނެ ކަމަށް އަންދާޒާ ކޮށްފައި އޮތް ނަމަވެސް އޭގެ ތެރެއިން ދެބައިކުޅަ އެއް ބަޔަށްވާ ފައިސާ ވެސް ނުލިބޭ ކަމަށް ފިނޭންސް މިނިސްޓްރީގެ ތަފާސްހިސާބުން ދައްކައިފިއެވެ.
ފިނޭންސް މިނިސްޓްރީން އިއްޔެ ވަނީ، މިދިޔަ މަހުގެ 21 ވަނަ ދުވަހުގެ ނިޔަލަށް ދައުލަތުން ކޮށްފައިވާ ޚަރަދުތަކާއި ލިބިފައިވާ އާމްދަނީގެ ތަފުސީލުތައް އާންމުކޮށްފައެވެ.
އެ ތަފާސްހިސާބުގައިވާ ގޮތުން އެ މުއްދަތުގައި ހިލޭ އެހީގެ ގޮތުގައި ލިބިފައި ވަނީ 569 މިލިއަން ރުފިޔާއެވެ. ނަމަވެސް މިދިޔަ އަހަރު އެ މުއްދަތުގައި ވަނީ 662 މިލިއަން ރުފިޔާ ލިބިފައެވެ.
މި އަހަރަށް ފާސްކޮށްފައިވާ ބަޖެޓުގައި ލަފާކޮށްފައިވަނީ މި އަހަރު ހިލޭ އެހީގެ ގޮތުގައި ދައުލަތަށް ލިބޭނީ 1.3 ބިލިއަން ރުފިޔާ ކަމަށެވެ. ނަމަވެސް ޚަރަދުތައް ފޫބެއްދުމަށް ޓަކައި ސަރުކާރުން ހުށަހަޅައިގެން 5.1 ބިލިއަން ރުފިޔާގެ ސަޕްލިމެންޓަރީ ބަޖެޓެއް ހުށަހަޅައިފައިވާއިރު، އެ ބަޖެޓުގައި ވަނީ ހިލޭ އެހީގެ ގޮތުގައި އިތުރަށް 199.3 މިލިއަން ރުފިޔާ ލިބޭނެ ކަމަށް އަންދާޒާކޮށްފައެވެ.
އެ އިތުރުވުމާއެކު، މި އަހަރުގެ އާމްދަނީއާއި ހިލޭ އެހީ 34.2 ބިލިއަން ރުފިޔާއަށް އަރާނެ ކަމަށް ސަޕްލިމެންޓަރީ ބަޖެޓުގައިވެއެވެ. މި އަހަރަށް ކުރީ ސަރުކާރުގައި ފާސްކުރި ބަޖެޓުގައި އަންދާޒާކޮށްފައި އޮތީ އާމްދަނީއާއި ހިލޭ އެހީއަށް ލިބޭނީ 33.5 ބިލިއަން ރުފިޔާ ކަމަށެވެ.
ކޮންމެ އަހަރަކު ވެސް ބަޖެޓުން ލަފާ ކުރާ ވަރަށް ހިލޭ އެހީ ނުލިބުމުގެ މައްސަލަ ދިމާވެއެވެ.
މިދިޔަ އަހަރުގެ ތަފާސްހިސާބުން ދައްކާ ގޮތުގައި، އެ އަހަރަށް ހިލޭ އެހީގެ ގޮތުގައި 2.52 ބިލިއަން ރުފިޔާ ލިބޭނެ ކަމަށް ބަޖެޓުގައި ޖަހައިފައި އޮތް ނަމަވެސް 28 ޑިސެމްބަރާ ހަމައަށް ލިބުނީ 515 މިލިއަން ރުފިޔާއެވެ. އޭގެ ކުރީ އަހަރު އެ މުއްދަތުގައި ހިލޭ އެހީގެ ގޮތުގައި އެއް ބިލިއަން ރުފިޔާ ލިބުނު ކަމަށް ވެސް ތަފާސްހިސާބުގައިވެއެވެ.
ފާހަގަކޮށްލެވޭ ގޮތުގައި މި ސަރުކާރުން ވަނީ ނިމިދިޔަ ދައުރުގައި ފިނޭންސް މިނިސްޓްރީން އާންމުކޮށްފައިވާ ތަފާސްހިސާބުތަކުގައި އޮޅުވާލުންތަކެއް ހުރި ކަމަށް ތުހުމަތުކޮށްފައެވެ. އޭގެ ސަބަބުން، އެ މިނިސްޓްރީން ކޮންމެ ހަފުތާއަކު އާންމު ކުރާ ޚަރަދާއި އާމްދަނީގެ ތަފުސީލުތައް ޝާއިއުނުކޮށް އޮތުމަށްފަހު، ހިސާބުތައް ހާމަކުރީ އޮކްޓޯބަރު މަހުގެ ފަހުކޮޅެވެ.
ފިނޭންސް މިނިސްޓްރީން ވަނީ މިދިޔަ އަހަރު ރިކޯޑުނުކޮށް ޚަރަދުކުރި ކަމަށް ބެލެވޭ ދެ ބިލިއަނެއްހާ ރުފިޔާގެ ތަފުސީލުތައް ކަށަވަރުކުރުމުގެ މަސައްކަތް އޮޑިޓާ ޖެނެރަލްގެ އޮފީހުން ކުރާ ކަމަށާއި އެހެންވެ، މިދިޔަ އަހަރުގެ ޚަރަދުތަކުގެ އަދަދުތަކަށް ބަދަލު އައުން އެކަށީގެންވާ ކަމަށް ބުނެފައެވެ.
ރައީސް ޑރ. މުޙައްމަދު މުއިއްޒާއި ފޮރިން މިނިސްޓްރީގައި މީގެ ކުރިން ހުންނެވި، މިހާރު ފިނޭންސް މިނިސްޓަރު މޫސާ ޒަމީރު ވެސް މީގެ ކުރިން ވަނީ މި ސަރުކާރަށް ބޭރުގެ ބައެއް ގައުމުތަކުން ހިލޭ އެހީ ލިބޭނެ ކަމުގެ ފެހި ސިގްނަލް ލިބިފައިވާ ކަމަށް ވިދާޅުވެފައެވެ.