މި ދެކެވެނީ ރާއްޖެއަށް ފުރަތަމަ ފަހަރަށް ފެނާއި ނަރުދަމާގެ ޚިދުމަތް ފޯރުކޮށްފިނުމުގެ މަގު ތަނަވަސްކޮށްދިން މާލޭ ވޯޓާ އެންޑް ސުވަރޭޖް ކޮމްޕެނީއަށް 30 އަހަރު ފުރުނު ވާހަކައެވެ.
މީގެ 30 އަހަރު ކުރިން 1995 ވަނަ އަހަރުގެ އޭޕްރީލް މަހުގެ އެއްވަނަ ދުވަހު އުފެދުނު އެ ކުންފުނި އުފެދިގެންދިޔައީ މާލޭގެ ރައްޔިތުންނަށް ސާފު އަދި ބޯން ކަމުދާ ފެން ފޯރުކޮށްދިނުމުގެ އަމާޒުގައެވެ.
އަދި މިއަދާ ހަމައަށްވެސް އެ ކުންފުނިން އަންނަނީ މާލޭގެ ރައްޔިތުންނަށް ސާފު އަދި ބޯން ކަމުދާ ފެން ފޯރުކޮށްދިނުމުގެ އަމާޒު ދަމަހައްޓައި ނަޖިސްފެން މެނޭޖްކުރުމުގައި ދެމެހެއްޓެނިވި އުސޫލުތައް ގެންގުޅެމުންނެވެ. އަދި މިހާރު ކުންފުނިން އަންނަނީ ފަޚުރުވެރިކަމާއެކު ރާއްޖޭގެ އާބާދީގެ 50 ޕަސެންޓަށް ވުރެ ގިނަ މީހުންނަށް ޚިދުމަތް ފޯރުކޮށްދެމުންނެވެ.
ޚިދުމަތް ފެށުން:
ފުރަތަމަ ފެން ހޮޅި ގުޅާލި 500 ގޭގެ ތެރެއިން އެ ދުވަހު ފެން ދޫކުރީ 158 ގެޔަށެވެ. މިއީ ބޮޑު އަދި އެހާމެ މުހިންމު ބޯފެނުގެ ޚިދުމަތް ފެށިގެން ދިޔަ ގޮތެެވެ. އެ ދުވަހުގެ ރެއަކީ އެ އަހަރުގެ މުލަ ރޯދަ ވިލޭރެއެވެ. އެހެންކަމުން ސަރުކާރުގެ މަޤުސަދަކަށް ވީ ރޯދަމަހާ ދިމާކޮށް އެ ތާރީޚުގައި ޚިދުމަތް ފެށުމެވެ.
އޭރުގެ ރައީސަކަށް ހުންނެވި މައުމޫން އަބްދުލް ގައްޔޫމް އިފްތިތާހު ކޮށްދެއްވި އެ ޚިދުމަތުގެ ފުރަތަމަ ކަސްޓަމަރަކަށް ވީ ޖަަމާލުއްދީން ސްކޫލްގެ ގްރޭޑް ހަތަރެއްގައި ކިޔަވަމުން އައި ޝާނީ އާދަމްއެވެ. އެ ދުވަހަށްފަހު މާލޭގެ އެކި ހިސާބުތަކަށް ފެން ދޫކުރަމުން ދިޔައީ މަސައްކަތް ނިމޭ ވަރަކުންވެ.
ފުރަތަމަ ކަސްޓަމަރު:
އުމުރުން އެންމެ ނުވަ އަހަރުގެ ޝާނީ އާދަމް އުފާވެރި ހިތަކާ އެކު ގޭގައި ކެތްތެރިކަން ކުޑަވެފައި ހުރީ އޭގެ ކުރިން ދުވަހަކު ވެސް ހަމަލޮލަށް ފެނިފައިނުވާ ރައީސް މައުމޫނާ ބައްދަލުކޮށްލުމަށެވެ.
އެ ދުވަހު އޭނާގެ ގެ މއ. ދޮންވެލި ޚާއްސަކޮށްފައި އޮތީ އޭރަށް ބެލިނަމަވެސް އަދި މިހާރު ވިސްނާލިޔަސް ރާއްޖޭގެ ތާރީޚުގެ ބޮޑު
ދުވަހަކަށެވެ. މާލެއަށް ސާފު ބޯފެން ފޯރުކޮށްދޭން ސީދާ ގޭގެއަށް ގުޅާލި ހޮޅިތަކުން ފެން ދޫކުރުމުގެ ޚިދުމަތް ފެށުމުގެރަސްމިއްޔާތަށެވެ.
މާލޭ ވޯޓާ އެންޑް ސުވަރޭޖް ކޮމްޕެނީ އެމްޑަބްލިއުއެސްސީއަށް 30 އަހަރު: --- ފޮޓޯ/ އެމްޑަބްލިއުއެސްސީ
ޝާނީ ބުނީ ބިސްމިން ވިދާޅުވެ ރައީސް ޖަގަށް ފެންފޮދެއް އެޅުއްވުމަށް ފަހު އިސްކުރު ބާރުކުރެއްވުމުން މަންމަގެ އެހީއާ އެކު ޝާނ،ީ ސާފު ބިއްލޫރި ތައްޓަކަށް އެ ފެންފޮދު އަޅާލައި ރައީސް މަޢުމޫނަށް އެރުވުމުން އެމަނިކުފާނު ފެން ފޮދެއް ހިއްޕެވުމަށް ފަހު "ވަރަށް މީރު"އޭ ވިދާޅުވި ބަސްކޮޅު ޝާނީ އާއި މަންމަ އާބިދާގެ ހަނދާނުގައި އަދިވެސް އެބަހުރި ކަމަށެވެ.
ޝާނީ އާއި އޭނާގެ މައިންބަފައިން އެ ދުވަހުގެ އަލްބަމް ބަލަނީ: --- ފޮޓޯ/ އެމްޑަބްލިއުއެސްސީ
"ވަރަށް އުފާވި އަސްލު އެހާ ބޮޑު ކަމެއްގައި ބައިވެރިވެވުނީ، އަނެއްކާ އެންމެ ފުރަތަމަ ފެން ދޫކުރީ މިގެއިން ވަރަށް ނުލިބޭނެ
ފުރުސަތެއް އެއީ" ޝާނީ ކިޔައިދިނެވެ.
ބަނޑިޔަލުގައި ފެން އުފުލުން ނިމުމަކަށް:
ޝާނީގެ މަންމަ އާބިދާއަކީ މާލޭގައި ފެނަށް އައި ބަދަލުތައް ތަޖުރިބާ ކުރި މީހެކެވެ. މާލޭގެ ފަޅު ހިއްކައިގެން ބެހި ގޯތިތަކުގެ ތެރޭގައި ހިމެނޭ ދޮންވެލި ގެއަށް، ބަނޑިޔަލުގައި ފެން އުފުލުން ނިމުމަކަށް އައުމުގެ ކުރިން އާބިދާ އުޅުނީ ހެންވޭރުގައި ހުންނަ އޭނާގެ އާއިލީ ގޭގައެެވެ.
ކުޑައިރާއި ޒުވާންއިރު، އެގޭގެ ވަޅުން ވެސް ފެން ނަގައ،ި ކައްކަން
ބޭނުންކުރި ނަމަވެސް ބުއިމަށް ފެން ހޯދަނީ ކައިރި މިސްކިތްތަކުގެ ވަޅުން ފެން ގެނެސްގެންނެވެ. އެހާ ވެސް އޭރު ވަޅު ފެނުގެ
ތާޒާކަން ބޮޑުވެފައި މީރުކަމަށް އޭނާ ބުނެއެވެ.
ކުރީގައި ފެން ބަލައި މީހުން ކިޔޫގައި: މި ދަތިކަން ނިމުމަކަށް އައީ އެމްޑަބްލިޔުއެސްސީއާއެކު: --- ފޮޓޯ/ އެމްޑަބްލިއުއެސްސީ
އެ ހުރިހާ މަންޒަރެއް ތަޖުރިބާކޮށް، އެއްވެސް ތަނަކަށް ނުގޮސް، ސީދާ ގެއިން ސާފު ފެން ލިބޭނެ އިންތިޒާމް ހަމަޖެހުމަކީ
އާބިދާ ސިފަކުރި ގޮތުގައި، "ބޯ މަތީ ބަނޑިޔާ ބަހައްޓައިގެން ފެން އުފުލާ ފަރާތްތަކަށް ލިބުނު ވަރަށް ބޮޑު ލުޔެކެވެ."
އެމްޑަބްލިޔުއެސްސީއަކީ ފެނާއި ނަރުދަމާގެ ޚިދުމަތް ފޯރުކޮށްދިނުމަށް ޚާއްސަ ޔޫޓިލިޓީ ކުންފުންޏެއް ނަމަވެސް، މިއަދު އެ ކުންފުންޏަކީ އިންޖީނިއަރިން، ޓްރޭޑިން އަދި އުފެއްދުންތެރިކަމުގެ ދާއިރާއިންވެސް ފާހަގަކޮށްލެވޭ ކުންފުންޏެކެވެ.
މާލޭ ވޯޓާ އެންޑް ސުވަރޭޖް ކޮމްޕެނީ އެމްޑަބްލިއުއެސްސީއަށް 30 އަހަރު: --- ފޮޓޯ/ އެމްޑަބްލިއުއެސްސީ
ފެނާއި ނަރުދަމާ ނިޒާމު ފަރުމާކުރުމާއި، ޤާއިމްކުރުމާއި، އޮޕަރޭޓް ކުރުމާއި، އަދި ފެން ޕްލާންޓް އަމިއްލައަށް ޑިޒައިންކޮށް ފެބްރިކޭޓް ކުރުމުގެ މަސައްކަތްވެސް މިއަދު އެ ކުންފުނިން އަންނަނީ ކުރަމުންނެވެ.
އަދި އެ ކުންފުނިން ވަނީ އަމިއްލަ އުފެއްދުންތަކުގެ ތެރެއައްވަދެ، ފެނާއި ނަރުދަމާގެ މަސައްކަތްތަކާއި ފެން ވައިރިންއަށް ބޭނުންވާ އެކި ސައިޒްތަކުގެ ހޮޅި އާއި، ކަރަންޓް ވަޔަރިންއަށް ބޭނުންވާ ކޮންޑިއުޓް ހޮޅިއާއި އަދި ފުޅީގައި ބަންދުކޮށްފައިވާ ފެން އުފައްދައި ރާއްޖޭގެ ބާޒާރަށް ނެރެން ފަށައިފައެވެ.