ވެރިކަން ކުރާ މައި ޕާޓީ ޕީއެންސީގެ މެމްބަޝިޕް އިތުރުކުރުމަށް ކުރިއަށް ގެންދާ ހަރަކާތުގެ ތެރެއިން، އެ ޕާޓީގެ ޗެއާޕާސަން އަދި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އަމިއްލަފުޅަށް 3،200 މެންބަރުން ޕާޓީއަށް ހޯއްދަވައިދެއްވައިފިއެވެ.
ޕީއެންސީއަށް މެންބަޝިޕް އިތުރުކުރުމަށްޓަކައި ކޮންމެ ހަފުތާ ބަންދެއްގައި ވެސް މާލެ ސަރަޙައްދުގައާއި އަތޮޅެތެރޭގައި ވެސް ފޯމު ފުރުމުގެ ކަންކަން ޕާޓީގެ މެންބަރުން އިސްނަގައިގެން ކުރިއަށް ގެންދެއެވެ.
އެކަން ކުރަމުންދަނީ މިއަދު މި ސަރުކާރަށް އަހަރެއް ފުރޭއިރު ޕާޓީއަށް 75،000 މެމްބަރުން ހަމަކުރުމަށް ޕީއެންސީގެ ރައީސް، ރައީސުލްޖުމްޙޫރިއްޔާ ޑރ. މުހައްމަދު މުއިއްޒުގެ އެދިވަޑައިގަތުން ހާސިލްކުރުމަށްޓަކައެވެ.
އެކަމާ ގުޅިގެން "ސަން" އާ ވާހަކަދައްކަވަމުން ޕީއެންސީ ޕާލިމެންޓްރީ ގްރޫޕްގެ ލީޑަރު އަދި އިނގުރައިދޫ ދާއިރާގެ މެންބަރު އިބްރާހީމް ފަލާހު ވިދާޅުވީ، މިއަދު ސަރުކާރަށް އަހަރެއް ފުރުނު އިރު އެ އަމާޒަށް ވާސިލުވެވިފައިވާ ކަމަށެވެ. އެގޮތުން މިހާތަނަށް 82،000 ހަށްވުރެ ގިނަ ފޯމު ހަމަކޮށް، އެ އަދަދަށް ޕާޓީއަށް މެންބަރުން އިތުރުވެއްޖެ ކަމަށް ފަލާހު ވިދާޅުވިއެވެ.
ނަމަވެސް އަދި އެ ފޯމްތައް ޕްރޮސެސް ނުވާތީ އިލެކްޝަންސް ކޮމިޝަންގެ ދަފުތަރުން އެ އަދަދު ހަމަވި ކަމަކަށް ނުދައްކައެވެ.
އޭގެތެރޭގައި މިއަދު، ޕާޓީގެ ޗެއާޕާސަން އަބްދުއްރަހީމް އަމިއްލަފުޅަށް ފުރުއްވާ 3,200 ފޯމު ހަވާލުކޮށްދެއްވާފައިވާ ކަމަށް ފަލާހު ވިދާޅުވިއެވެ.
ޕީއެންސީ އޮފީހުގައި އަބްދުއްރަހީމް ފޯމުތައް ހަވާލުކޮށްފައި ވަނީ މެންބަރު ފަލާހުއާއެވެ. އަރިހުގައި ޕީއެންސީގެ މަޖިލިސް ބައެއް މެންބަރުން ވެސް ތިއްބެވިއެވެ.
މިމަހުގެ ނުވަ ވަނަ ދުވަހު ޕީއެންސީއަށް މެންބަރުން އިތުރުކުރުމަށް ބޭއްވި ހަރަކާތުގައި ޕީއެންސީގެ މެމްބަޝިޕް 100،000އަށް އިތުރުކުރުމަށް، ޕާޓީއަށް ތާއީދުކުރާ ރައްޔިތުންގެ ވިސްނުން އެބަހުރި ކަމަށާއި ލީޑަޝިޕްގެ އަމާޒަކީ އެންމެ މަދުވެގެން ވެސް 90،000 ވުރެ އިތުރުކުރުން ކަމަށް ލޯކަލް ގަވަނަންސް މިނިސްޓަރު އާދަމް ޝަރީފް އުމަރު ވިދާޅުވެފައިވެއެވެ.
ޕީއެންސީއަށް 82،000 މެންބަރުން ހަމަވެގެން ދިޔުމާއެކު، 50،851 މެންބަރުންނާއެކު އެންމެ ބޮޑު ޕާޓީގެ ގޮތުގައި އޮތް މިހާތަނަށް އޮތް އެމްޑީޕީއަށް ވުރެ ޕީއެންސީގެ މެންބަރުން އިތުރުވާނެއެވެ.
ޕީއެންސީން އެއް އަހަރު ތެރޭ އެހާ ގިނަ އަދަދަކަށް މެންބަރުން އިތުރުކޮށްފައިވާއިރު، މިދިޔަ އަހަރު ރައީސް ވެރިކަމަށް ވަޑައިގެންނެވިއިރު އެ ޕާޓީގައި ތިބީ ގާތްގަނޑަކަށް 3،000 މެންބަރުންނެވެ.