ބޭންކް އޮފް މޯލްޑިވްސް (ބީއެމްއެލް)ގެ ޑެޕިއުޓީ ސީއީއޯ އަދި ޗީފް އޮޕަރޭޝަންސް އޮފިސަރު (ސީއޯއޯ)ގެ މަގާމަށް 18 އަހަރު ބޭންކުގައި ޚިދުމަތް ކުރެއްވި ސަހާ ވަހީދު މިއަދު އައްޔަންކޮށްފިއެވެ.
ބީއެމްއެލްއިން ބުނީ، މިއީ އެ ބޭންކުގެ ލީޑަޝިޕުގެ އޮނިގަނޑަށް ގެނައި މުހިންމު ބަދަލުތަކުގެ ތެރެއިން ހިމެނޭ ކަމެއް ކަމަށެވެ.
މި މަގާމުގެ މަސްއޫލިއްޔަތާއެކު ބޭންކިން އޮޕަރޭޝަންސް، ލީގަލް އެންޑް ކޯޕަރޭޓް އެފެއާޒް, ހިއުމަން ރިސޯސަސް، އެޑްމިނިސްޓްރޭޝަން އެންޑް ޕްރޮޕަޓީސްގެ އިތުރުން، ބޭންކުގެ ޕްރޮކިއުމަންޓް ވެސް ބަލަހައްޓަވާނީ ސަހާއެވެ.
ބޭންކިން ދާއިރާގައި 18 އަހަރަށްވުރެ ގިނަ ދުވަހުގެ ތަޖުރިބާ އޭނާ ހޯއްދަވާފައިވާއިރު، ބޭންކުގެ މުހިންމު މަގާމުތަކެއް އަދާކުރައްވާފައިވެއެވެ. އޭގެ ތެރޭގައި ހެޑް އޮފް ސްޓްރެޓީޖިކް ޕްލޭނިން އެންޑް ޗޭންޖް މެނޭޖްމަންޓު ހިމެނެއެވެ. ޑެޕިއުޓީ ސީއީއޯ ކަމަށް އައްޔަން ކުރުމުގެ ކުރިން އޭނާ އަދާކުރައްވަމުން ގެންދެވީ ޕީޕަލް އެންޑް ޗޭންޖް ޑިރެކްޓަރުގެ މަގާމެވެ.
އެ މަގާމަށް އޭނާ އައްޔަނު ކުރީ މީގެ 10 އަހަރު ކުރިން 2014ވަނަ އަހަރުއެވެ.
އޭނާ ވަނީ ލަންޑަން ސްކޫލް އޮފް އިކޮނޮމިކްސް އެންޑް ޕޮލިޓިކަލް ސައިންސްއިން އިކޮނޮމިކްސް އެންޑް އިކޮނޮމިކް ހިސްޓްރީގެ ދާއިރާއިން ބެޗްލާ އޮފް ސައިންސް ޑިގްރީ ހާސިލް ކުރައްވައިފައެވެ. މީގެ އިތުރުން ސަހާ ވަނީ އޭޝިއަން އިންސްޓިޓިއުޓް އޮފް ޗާޓަޑް ބޭންކާސްއިން ޗާޓަޑް ބޭންކާ ޕްރޮފެޝަނަލް ކޮލިފިކޭޝަން ވެސް ހާސިލް ކުރައްވައިފައެވެ.
ބީއެމްއެލްގެ ދިގު މުއްދަތުގެ ސްޓްރެޓަޖިކް ލަނޑުދަނޑިތަކާ އެއްގޮތަށް ބޭންކުގެ ހިންގުމުގެ އޮނިގަނޑު ބައްޓަންކުރުމަށް ޓަކައި، އެ ބޭންކުން މިއަދުވަނީ އައު އެގްޒެކެޓިވް މެނޭޖްމަންޓު ޓީމެއް ވެސް އިއުލާންކޮށްފައެވެ. އެއީ:
- ޗީފް ފައިނޭންޝަލް އޮފިސަރު - ނަންދަނަ ސެނެވިރަތުނެ
- ޗީފް ރިސްކް އޮފިސަރު - ގެރީ ލޯޓަން
- ޗީފް ޓެކްނޮލޮޖީ އޮފިސަރު - އަދުލީ އަހުމަދު ދީދީ
- ޗީފް ބިޒްނަސް އޮފިސަރު - މޫސާ ނިމާލް
- ޗީފް ކްރެޑިޓް އޮފިސަރު - ރަޝްފާ ޖައުފަރު
- ޗީފް މާކެޓިން އޮފިސަރު - އައިޝަތު ޒަމްރާ ޒާހިރު
- ޗީފް އިސްލާމިކް ބޭންކިން އޮފިސަރު - ހަސަން ކަލާމް
މި ކަމާ ގުޅޭ ގޮތުން ބީއެމްއެލްގެ ސީއީއޯ އަދި މެނޭޖިން ޑިރެކްޓަރު މުހައްމަދު ޝަރީފް ވިދާޅުވީ މި މަގާމުތަކަށް އައްޔަނު ކުރެވުނު ކޮންމެ ބޭފުޅަކީ ވެސް އެ ބޭފުޅެއްގެ ދާއިރާގެ ނަމޫނާ ތަޖުރިބާކާރެއް ކަމަށެވެ. އަދި އެ ބޭފުޅުން ސާބިތުކޮށްދެއްވާފައިވާ ގާބިލުކަމާއި ބޭންކިން ދާއިރާއާބެހޭ ގޮތުން ހޯއްދަވާފައިވާ މައުލޫމާތާއެކު، ބީއެމްއެލުން ކަނޑައަޅާފައިވާ ތަސައްވުރަށް ވާސިލްވުމަށް މަގުފަހިވެގެންދާނެ ކަމަށް ޝަރީފް ވިދާޅުވިއެވެ.
ބީއެމްއެލްގެ ޑެޕިއުޓީ ސީއީއޯގެ މަގާމުގައި މީގެ ކުރިން ހުންނެވީ 42 އަހަރަށްވުރެ ގިނަ ދުވަހު ބޭންކުގައި ޚިދުމަތް ކުރެއްވި އައިޝަތު ނޫރައްދީނެވެ. އޭނާ ބީއެމްއެލްގެ ބޯޑުން ވަކިކުރި ކަމަށް ސިޓީ ފޮނުވީ މިދިޔަ އޮގަސްޓުމަހުގެ ތެރޭގައެވެ. އެއާއެކު ބޯޑުން އިސްތިއުފާ ދެއްވުމަށް ފަހު ވެސް އޭނާ ހުންނެވީ ޑެޕިއުޓީ ސީއީއޯގެ މަގާމުގައެވެ.
އޭނާ ބޯޑުން އިސްތިއުފާ ދެއްވީ، ބީއެމްއެލްއިން ރުފިޔާ ކާޑަށް ޑޮލަރު ދިނުން ހުއްޓާލުމަށް ކުއްލި ގޮތަކަށް ނިންމުމާ ގުޅިގެން ސަރުކާރުގެ ނުރުހުން ބޭންކަށް އަމާޒުވި ދަނޑިވަޅެއްގައެވެ.
އެއަށްފަހު ބޭންކުގެ ޚިދުމަތުން އޭނާ ވަކިވެ ވަޑައިގެންނެވީ މިދިޔަ އޮކްޓޫބަރު ފަހުކޮޅުގައެވެ.