ބޭންކް އޮފް މޯލްޑިވްސް (ބީއެމްއެލް)ގެ ޑެޕިއުޓީ ސީއީއޯ، އައިޝަތު ނޫރައްދީން ބޭންކުގެ ޚިދުމަތުން ވަކިވެ ވަޑައިގަންނަވަން ނިންމަވައިފިއެވެ.
ބީއެމްއެލްގެ މެނޭޖްމަންޓުން އެ ބޭންކުގެ މުވައްޒަފުންނަށް ފޮނުވި މެސެޖެއްގައިވަނީ، 42 އަހަރުގެ ޚިދުމަތަށްފަހު އައިޝަތު ނޫރައްދީން މަގާމުން ވަކިވެ ވަޑައިގަންނަވާކަން ހިއްސާކޮށްފައެވެ.
އެ މެސެޖުގައިވާ ގޮތުން އައިޝަތުއަކީ ބީއެމްއެލްގެ އެންމެ ކާމިޔާބު ދުވަސްތަކުގައިއާއި އެންމެ ގޮންޖެހުންތައް ބޮޑު ދުވަސްތަކުގައި ވެސް އެ ބޭންކަށް ކާމިޔާބު ހޯއްދަވައިދެއްވުމަށް ހިކުމަތްތެރިކަމާއި ވިސްނުންތެރިކަމާއެކު ސްޓްރެޓެޖީތައް އެކުލަވާލެއްވި ހުޝިޔާރު ލީޑަރެކެވެ.
އައިޝަތު ވަނީ ބޯޑާއި މެނޭޖްމަންޓްގައި ބުރަ މަސައްކަތްތަކެއް ވެސް ކުރައްވާފައެވެ. އަދި ބޭންކަށް އެވޯޑު ލިބިފައިވާ އިންޓަނޭޝަނަލް ބޭންކިން ވިޔަފާރީގެ ފަހަތުގައިވާ ބާނީއަކީ ވެސް ހަމަ އައިޝަތު ކަމަށް އެ މެސެޖުގައިވެއެވެ.
"އައިޝަތަކީ އަޅުގަނޑުމެން އެންމެހާ މުވައްޒަފުންނަށާއި ހަމައެހެންމެ އަޅުގަނޑަށްވެސް އަގުހުރި އިރުޝާދާއި ހެޔޮ ނަސޭހަތްދެއްވި އަޅުގަނޑު ވަރަށް އިހުތިރާމްކުރާ މުދައްރިބެއް. އެކި ކަންކަމުގައި އަޅުގަނޑުމެންނަށް ވަރަށް ބޮޑަށް އެހީތެރިވެދެއްވި ބޭކަނބަލެއް. އައިޝަތާއެކު މަސައްކަތްކުރުމުގެ ފުރުޞަތު ލިބުނީތީ އަޅުގަނޑު ވަރަށް ފަޚުރުވެރިވަން. އަޅުގަނޑަށް ޔަގީން ހުރިހާ މުވައްޒަފުންގެ ހިތުގައިވެސް އައިޝަތުއަށް އަބަދުމެ ޚާއްސަ މަގާމެއް އޮންނާނެކަން،" އެ މެސުޖުގައި ބުނެފައިވެއެވެ.
މިހާރު ބީއެމްއެލްގެ ޑެޕިއުޓީ ސީއީއޯގެ މަގާމުގައި ހުންނެވި އައިޝަތު ނޫރައްދީން ބޭންކުގައި މަސައްކަތް ކުރައްވާނެ އެންމެ ފަހު ދުވަހަކީ އަންނަ މަހުގެ ހަތްވަނަ ދުވަހެވެ.
ބީއެމްއެލްގެ ބޯޑުގައި ވެސް ދިގު މުއްދަތެއް ވަންދެން ޚިދުމަތް ކުރައްވާފައިވާ އައިޝަތު ވަނީ މިދިޔަ އޮގަސްޓު މަހުގެ 25ގައި ބޯޑުން އިސްތިއުފާ ދެއްވައިފައެވެ.
އޭނާ ބޯޑުން އިސްތިއުފާ ދެއްވީ، ބީއެމްއެލްއިން ރުފިޔާ ކާޑަށް ޑޮލަރު ދިނުން ހުއްޓާލުމަށް ކުއްލި ގޮތަކަށް ނިންމުމާ ގުޅިގެން ސަރުކާރުގެ ނުރުހުން ބޭންކަށް އަމާޒުވި ދަނޑިވަޅެއްގައެވެ.
އެ ނިންމުން ސަރުކާރުން ސިފަކުރީ ބަޣާވާތެއް ކުރަން އުޅުމުގެ ގޮތުގައެވެ.