ބޮލީވުޑްގެ ކުރީގެ ބައެއް ފިލްމުތަކުން ފެނިފައިވާ އެކްޓަރު ޝަރަދު ކަޕޫރުގެ މައްޗަށް ޖިންސީ ގޯނާ ކުރިކަމުގެ ތުހުމަތުކޮށް، އެ މައްސަލަ ފުލުހުން ބަލަން ފަށައިފިއެވެ.
ފިލްމު "ޖޯޝް" އަދި "ދަސްތަކު"އިން މުހިންމު ރޯލަކުން ފެނުނު އެކްޓަރުގެ މައްޗަށް ޖިންސީ ގޯނާގެ ތުހުމަތުކޮށްފައިވަނީ އުމުރުން 32 އަހަރުގެ އަންހެނެކެވެ.
މުމްބާއީގެ އައްސޭރި ފަށުގައި އޮންނަ ހާރު ނަމަކަށް ކިޔާ އަވަށުގައި ދިރިއުޅޭ މި އަންހެން މީހާ މިހާރު ވަނީ ހާރު ފުލުސް އޮފީހަށް މި މައްސަލަ ހުށަހަޅާފައި ކަމަށް ރިޕޯޓުތައް ބުނެއެވެ.
މި އަންހެން މީހާ ފުލުހުންނަށް ދިން ބަޔާނުގައި ބުނެފައިވަނީ، ޕްރޮފެޝަނަލް މަސައްކަތަކާ ގުޅޭގޮތުން މަޝްވަރާކުރުމަށް އެދި ޝަރަދު ދިރިއުޅޭ ގެއަށް ދާން ދައުވަތު ލިބުނު ކަމަށެވެ.
ޝަރަދު ވިލެންއެއްގެ ރޯލް ކުޅުނު ފިލްމު "ދަސްތަކު"ގެ މަންޒަރެއްގައި ބަތަލާ ސުޝްމިތާ ސެންއާ އެކު--ފޮޓޯ/އެކްސް
އެގެއަށް ދިއުމުގެ ކުރިން އޭނާއަށް ހީކުރީ އެއީ ޝަރަދު މަސައްކަތް ކުރާ އޮފީސް ހިންގާ އިމާރާތް ކަމަށާއި ނަމަވެސް އެ ގެއަށް ވަދެވުމުން އެއީ އެކްޓަރު ދިރިއުޅޭ ގެ ކަމަށް ވިސްނުނު ކަމަށާއި ޝަރަދު ދައުވަތު ދިނީ ވެސް އޭނާ ނިދާ ކޮޓަރިއަށް ދިއުމަށް ކަމަށް މި އަންހެން މީހާ ވަނީ ފުލުހުން ގާތު ބުނެފައެވެ.
މި ކަމާ ގުޅޭގޮތުން ޝަރަދުގެ ފަރާތުން ރަސްމީގޮތުން ވަކި އެއްޗެއް ބުނެފައިނުވާއިރު ފުލުހުން އަންނަނީ ވަރަށް ސީރިއަސް މައްސަލައެއްގެ ގޮތުގައި މި މައްސަލަ ބަލަމުން ކަމަށް ބޮލީވުޑްހަންގާމާގައި ވަނީ ބުނެފައެވެ.
ޝަރަދަކީ ފިލްމުތަކުގައި އެކްޓަރެއްގެ ގޮތުގައި މަސައްކަތްކުރުމުގެ އިތުރުން ފިލްމު ޕްރޮޑިއުސް ވެސް ކުރާ މީހެކެވެ. ޝަރަދުގެ ފިލްމެއް އެންމެ ފަހުން ރިލީޒްކުރީ 2022 ވަނަ އަހަރެވެ.