އިންޑިއާގެ ވަރަށް ނުފޫޒުގަދަ މީހެއްގެ އަންބަކަށް ވަރުން ދަވަންގެ ނަމުގައި ބަޔަކު ގުޅުމުން، ބޮޑު ކަންތައްގަނޑެއް ހިނގި ކަމަށް އޭނާ ބުނެފިއެވެ.
މަޝްހޫރު ޕޮޑްކާސްޓަ ރަންވީރު އައްލާހުބާދިއާގެ ޕޮޑްކާސްޓު ޝޯގައި ވާހަކަދައްކަމުން ވަރުން ބުނެފައިވަނީ, ފިލްމީ ތަރިއަކަށްވެ އާއްމުންގެ މެދުގައި މަޝްހޫރުކަން ލިބެން ފެށުމުން ވަރަށް އާދަޔާޚިލާފު ކަންކަމާ ބައެއް ފަހަރު ކުރިމަތިލާން ޖެހޭ ކަމަށެވެ.
އެގޮތުން, އިންޑިއާގެ ނުފޫޒުގަދަ މީހެއްގެ އަންބެއް ވަރުން ދިރިއުޅޭ ގެއަށް ސިއްރުން ވަން ކަމަށާއި އެއީ ދުވަހަކު ވެސް ހަނދާން ނައްތައިނުލެވޭނެ ބިރުވެރި ދުވަހެއް ކަމަށް ވަރުން ވަނީ ބުނެފައެވެ.
އެ އަންހެންމީހާ ވަރުންގެ ގެއަށް ވަނީ ވަރަށް ގިނަ ދުވަސްވަންދެން ވަރުންގެ ހަރަކާތްތައް މޮނީޓާ ކުރުމަށް ފަހު ކަމަށާއި އެއް ރޭ އެ ގެއަށް އެ މީހާ ވަދެގަތީ ގޭގެ ދޮރު ވެސް ހަލާކުކޮށްލުމަށް ފަހު ކަމަށް އެކްޓަރު ވަނީ ބުނެފައެވެ.
ވަރުން ދަވަން އެކްޓަރުގެ ބައެއް އަންހެން ސަޕޯޓަރުންނާ އެކު--ފޮޓޯ/އިންޑިއަންއެކްސްޕްރެސް
މި ހާދިސާ ހިނގިގޮތް ކިޔައިދެމުން ވަރުން ބުނީ، ހަގީގަތުގައި ކޮންމެ ވެސް އެހެން މީހަކު ވަރުންގެ ނަމުގައި އެ އަންހެން މީހާއަށް މެދުނުކެނޑި ގުޅާ ވާހަކަދައްކަމުން ދިޔަކަން ފަހުން އެނގުނު ކަމަށާއި އެ މީހާ ވަރުންގެ ގެއަށް ދިޔައީ އެހެންވެ ކަމަށެވެ.
ފަހުން އެނގުނު ގޮތުގައި އެ މީހާ އުންމީދުކޮށްގެން ހުރީ ވަރުން އޭނާގެ ލޯބީގައި ދީވާނާވެ، ވަރުންގެ އަމިއްލަ އާއިލާ ވެސް ދޫކޮށް ގޮސްދާނެ ކަމަށް ކަމަށާއި އެ މައްސަލަ ހައްލުކުރުމަށް ފުލުހުންގެ އެހީތެރިކަން ކޮންމެ ވެސް މިންވަރަކަށް ހޯދި ކަމަށް އެކްޓަރު ވަނީ ބުނެފައެވެ.
ވަރުން ބޭރު ތެރޭގައި މީހުން އެއްވެ އުޅޭ ތަނެއްގައި ހުންނައިރު ވަރަށް އާދަޔާޚިލާފު ކަންކަން ތަޖުރިބާ ކުރާ ކަމަށާއި އޭގެ ތެރޭގައި ބައެއް މީހުންގެ ފަރާތުން ހީވެސް ނުކުރާ ކަހަލަ ގޯނާތައް އެހެން މީހުންނަށް ނޭނގޭ ގޮތަށް އެއް ބަޔަކު ކުރާ ކަމަށް އެކްޓަރު ވަނީ މި ޝޯގައި ބުނެފައެވެ.
އެފަދަ ހާލަތްތަކުގައި އިންޑަސްޓްރީގައި އުޅޭ ބަތަލާއިންނަށް ކުރިމަތިވާ އެފަދަ ގޯނާތަކާ މެދު ވަރަށް ބޮޑަށް ވިސްނޭ ކަމަށާއި އެއީ ފިލްމީ ބަތަލާއިންނަށް ވަރަށް އުނދަގޫ ދަނޑިވަޅުތަކަށް ވާނެ ކަމަށް އިހުސާސްކުރެވޭ ކަމަށް ދާދި ފަހުން ބައްޕައަކަށްވި އެކްޓަރު ވަނީ ބުނެފައެވެ.
ކާމިޔާބު ފިލްމުތަކެއް ބެލުންތެރިންނަށް ގެނެސްދީފައިވާ ވަރުންގެ އެންމެ ފަހުން ރިލީޒްކުރި ފިލްމަކީ އިއްޔެ ސިނަމާތަކުގައި ރިލީޒްކުރި އެކްޝަން ތުރިލާ "ބޭބީ ޖޯން"އެވެ.