ފައިސާ ނުދިނުމުން، މަންމައާއި ކޮއްކޮއަށް ވަޅިން ހަމަލާ ދޭނެކަމުގެ އިންޒާރު ދިންކަމަށް ތުހުމަތުކޮށް މީހަކު ހައްޔަރުކުރަން ކްރިމިނަލް ކޯޓުން މިއަދު އަމުރުކޮށްފިއެވެ.
މި މައްސަލާގައި ހައްޔަރުކޮށްފައި ވަނީ 32 އަހަރުގެ ވ. ހުވަފެން މުޙައްމަދު ޝަފީގެވެ.
މި މައްސަލާގައި އޭނާ ހަތް ދުވަހަށް ބަންދު ކުރުމަށް ކޯޓުން ވަނީ ނިންމާފައެވެ.
ކޯޓު އަމުރުގައިވަނީ، އޭނާ މަންމައާއި ކޮއްކޮއަށް ވަޅިން ހަމަލާ ދޭނެ ކަމަށް ބުނެ އިންޒާރު ދިން ކަމަށް ތުހުމަތުކުރެވޭ ކަމަށެވެ. މިގޮތުން، އިންޒާރު ދީފައި ވަނީ ޝަފީގު ބުނެގެން ފައިސާ ނުދިނުމުން ކަމަށް އަމުރުގައި ބުނެފައިވެއެވެ. އަދި، ޝަފީގުގެ ކޮޓަރި ތެރެއިން ދެ ވަޅިއެއް ފެނިފައިވެއެއެވެ.
ފާހަގަކޮށްލެވޭ ގޮތުގައި، ފައިސާގެ ބޭނުމުގައި މީގެކުރިން ވެސް މަންމައަށް ހަމަލާ ދޭނެ ކަމަށް ބުނެފައި ހުރި މައްސަލަތައް ފެންމަތިވެފައިވެއެވެ. އެގޮތުން، މިދިޔަ އޮކްޓޫބަރު މަހު 22ގައި މަންމައަށް ވަޅިން ހަމަލާދީ މަރާލާނެކަމުގެ އިންޒާރުދީ، އަނިޔާކުރުމަށް ފަހު، ފޭރުނުކަމުގެ ތުހުމަތުގައި މީހަކު ހައްޔަރުކުރިއެވެ.
އޭގެފަހުން، މިދިޔަ ބުރާސްފަތި ދުވަހު ވަނީ މަންމަ ގައިގައި ތަޅައި އަނިޔާކޮށް، މަންމަ އަތުން ގަދަކަމުން ފައިސާ ހޯދަން އުޅުމުގެ ތުހުމަތުގައި މާލެއިން ހައްޔަރުކޮށްފައެވެ.