ސުލޫކީ މައްސަލަތަކުގައި މި އަހަރު 20 ފުލުހަކު ވަޒީފާއިން ވަކިކޮށްފައިވާ ކަމަށް ޕޮލިސް ކޮމިޝަނަރު ޢަލީ ޝުޖާއު ވިދާޅުވެއްޖެއެވެ.
މި ސަރުކާރަށް އަހަރެއް ފުރުމާ ގުޅޭ ގޮތުން ޕީއެސްއެމްއަށް ދެއްވި ބަސްދީގަތުމެއްގައި ސީޕީ ވިދާޅުވީ ފުލުހުންގެ ގާނޫނާއި އުސޫލުތަކާއި ގަވައިދުތައް އޮންނަ ގޮތުން އެއީ އެއްވެސް ނުފޫޒެއްގެ ދަށު ނުވެ މަސައްކަތް ކުރާ ގޮތަށް ފަރުމާކޮށްފައިވާ މުއައްސަސާއެއް ކަމަށެވެ.
އެހެންވެ، އެ ޚިދުމަތާ ގުޅޭ ކޮންމެ ފުލުހަކީ ވެސް ފުލުހުންގެ ގާނޫނާއި އުސޫލަތަކާ އެއްގޮތަށް ތަރުތީބުވެގެން ޚިދުމަތްދޭ މީހަކަށް ހެދުމަށް މަސައްކަތް ކުރަމުން އަންނަ ކަމަށް އޭނާ ވިދާޅުވިއެވެ.
"އެހެންނަމަވެސް އަޅުގަނޑުމެން ހަގީގަތަށް ވާހަކަދައްކާނަމަ އަޅުގަނޑުމެންނާ ދިމާލަށް އެބަހުރި އެކި ކަހަލަ ނުފޫޒުތަކުން، އެކި ކަހަލަ ކަންތައްތައް ކުރި ކަމުގެ އިނގިލި ދިއްކޮށްފައި،" ސީޕީ ވިދާޅުވިއެވެ.
އެފަދަ ޝަކުވާތަކާ ގުޅިގެން މައްސަލަތައް ބަލައި، އެކަން ކުރާ ފަރާތްތަކަށް ނިޒާމުގެ ތެރެއިން ފިޔަވަޅު އަޅަމުން އަންނަ ކަމަށް އޭނާ ވިދާޅުވިއެވެ.
"މިއަހަރު އަޅުގަނޑުމެން އޭގެ ތަފާސްހިސާބަކަށް ދާނަމަ ފުލުހުންގެ އެކިއެކި މިސްކޮންޑަކްޓް އަދި މުޖުތަމައުގެ ތެރެއިން ވެސް އަދި ސޯޝަލް މީޑިއާގައި ވެސް ފުލުހުންނާ ގުޅޭ ގޮތުން ހުށަހެޅިފައިވާ ޝަކުވާތައް ބަލައި 50އަށް ވުރެ ގިނަ ފުލުހުންނަށް ފިޔަވަޅު އަޅައިފައިވޭ. އޭގެ ތެރެއިން ވެސް 20 ފުލުހަކު ވާނެ މޯލްޑިވްސް ޕޮލިސް ސާވިސްއިން ވަކިކުރެވިފައި،" ސީޕީ ވިދާޅުވިއެވެ.
އެ މައްސަލަތަކާ ގުޅޭ އިތުރު ތަފުސީލެއް އޭނާ ނުދެއްވައެވެ. ނަމަވެސް، ފުލުހުންގެ މަސައްކަތްތަކަށް ފާރަވެރިވާ މުއައްސަސާތަކުން ހިންގާ ތަހުގީގުތަކަށް ފުރިހަމައަށް އެއްބާރުލުން ދެމުން އަންނަ ކަމަށް އޭނާ ވިދާޅުވިއެވެ.
ފުލުހުންނަށް ތަފާތު މައްސަލަތަކުގައި ތުހުމަތުތައްކޮށް، ސޯޝަލް މީޑިއާގައި ޕޯސްޓުތައް ދައުރުކުރެއެވެ. އެގޮތުން މީހެއްގެ ވައިބާ އެކައުންޓް ހެކްކޮށް، އެ މީހާގެ ދަންނަ މީހުންނަށް މެސެޖުކޮށް އޮޅުވާލައިގެން ފައިސާ ހޯދާފައިވާ މައްސަލައެއްގައި ފުލުހެއް ޝާމިލްވާ ކަމަށް ބުނެ މިފަހުން ޕޯސްޓުތަކެއް ފަތުރައިފައިވެއެވެ.
އެ ތުހުމަތުތަކާ ގުޅޭ ގޮތުން ފުލުހުން ބުރާސްފަތި ދުވަހުގެރޭ ނެރުނު ބަޔާނެއްގައި ވަނީ، އެ މައްސަލައާއި އެ މައްސަލައާ ގުޅުންހުރި އިތުރު ތިން މައްސަލައެއް މިހާރު ތަހުގީގުކުރަމުންދާ ކަމަށެވެ. ނަމަވެސް އެ މައްސަލަތަކުގައި ފުލުހެއްގެ ބައިވެރިވުމެއް ނެތް ކަމަށް ބަޔާނުގައިވެއެވެ.