ބޭންކްތަކަށް ޑޮލަރު މާރުކުރަން މަޖުބޫރުކުރުވައި، މަރުކަޒީ ބޭންކް، އެމްއެމްއޭއިން އެކުލަވައިލި ގަވާއިދާ އެކު ބޭންކްތަކަށް މާރުކުރާ ޑޮލަރު އިތުރުވި ނަމަވެސް އާންމުންނަށް އެ ގަންނަން ނުލިބޭނެ ކަމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމް ރޭ ވިދާޅުވެއްޖެއެވެ.
އެމްއެމްއޭއިން ވަނީ ރިސޯޓުތަކާއި ގެސްޓްހައުސްތަކުން އެ ތަންތަނަށް އަންނަ ފަތުރުވެރިންގެ ބޮލަކަށް ވަކި އަދަދަކަށް ޑޮލަރު މާރުކުރަން ޖެހޭ ގޮތަށް ގަވާއިދެއް އެކުލަވައިލާފައެވެ. އެ ގާނޫނަކަށް ހެދުމުގެ މަސައްކަތް އަންނަނީ ކުރަމުންނެވެ.
އެ ގަވާއިދު ބުނާ ގޮތުން، ފަތުރުވެރިކަމުގެ ޚިދުމަތްދޭ މަތީ ފަންތީގެ ވިޔަފާރިތަކުން، ކޮންމެ ފަތުރުވެރިއަކަށް 500 ޑޮލަރު މާރުކުރަންޖެހެއެވެ. ގެސްޓްހައުސްތަކަށް އަންނަ ކޮންމެ ފަތުރުވެރިއަކަށް 25 ޑޮލަރު މާރުކުރަންޖެހެއެވެ.
އެ ގަވާއިދާއި ޖުމުލަ ގޮތެއްގައި ރިޒާވްގެ ދަތިކަމަށް އަލިއަޅުއްވައިލައްވާ ޕީޕަލްސް ނެޝަނަލް ފްރަންޓް (ޕީއެންއެފް)އިން ބޭއްވި ޖަލްސާއެއްގައި ވާހަކަދައްކަވަމުން ޔާމީން ވިދާޅުވީ، ބޭންކްތަކުގައި ޑޮލަރު ތިޔާގިވި ނަމަވެސް އެންމެންނަށް އެ ތަންތަނުން ޑޮލަރު ގަންނަން ނުލިބޭނެ ކަމަށެވެ. އެއީ، އެ މަނިކުފާނު ވިދާޅުވި ގޮތުގައި ބޭންކްތަކުން ޑޮލަރު ވިއްކާނީ އެ މީހުންނަށް އެންމެ ފައިދާވާ ގޮތަށެވެ.
ޔާމީން: އެ މަނިކުފާނު ވިދާޅުވީ، ޑޮލަރު ނުހުންނަނީ ބޭކާރު ޚަރަދު ގިނަކަމުން ކަމަށް -- ސަން ފޮޓޯ/ އަމަން ލަތީފް
"ބޭންކުން ޑޮލަރު ދޫކުރާނީ ބޭންކަށް އެންމެ ފައިދާވާ ގޮތަށް ޑޮލަރު ގަންނަ ފަރާތްތަކަށް. އެއީ، ބޮޑެތި އިންވެސްޓަރުންނަށް، ރިސޯޓު ހަދަން ބޭނުންވާ ބޮޑެތި ލޯނު ނަގައި މީހުންނަށް. އެއަކުންނެއް ނުލިބޭނެ އާންމު މީހުން ޑޮލަރު ގަންނަން ދިޔައީމާ،" ޔާމީން ވިދާޅުވިއެވެ.
އެ މަނިކުފާނު ވިދާޅުވީ، ބޭންކްތަކުގައި ޑޮލަރު ހުރި ނަމަވެސް އާންމުން ޑޮލަރު ހޯދަން އުޅެންޖެހޭނީ މި ހާލުގައި ކަމަށެވެ.
މީގެ އިތުރުން، ރިޒާވް ދަށްވުމާ ގުޅޭ ގޮތުން ޖުމުލަ ގޮތެއްގައި ވާހަކަދައްކަވަމުން އެ މަނިކުފާނު ވިދާޅުވީ، ރިޒާވް އިތުރުނުވާ ސަބަބު ކުރީގެ ގަވަރުންނަށާއި އަދި މިހާރު ގަވަރުނަރަކަށް ހުންނެވި އަހުމަދު މުނައްވަރަށް އެނގިވަޑައިގަންނަވާނެ ކަމަށެވެ. އެއީ، ބޭކާރު ޚަރަދު އިތުރުވުން ކަމަށް ޔާމީން ގަބޫލުކުރައްވައެވެ.
"ދައުލަތުގެ ޚަރަދު ކުޑަކުރުމާއި ބޭކާރު ޚަރަދު ނުކުރުމާއި އަމުދުން ޑޮލަރުން ބޭކާރު ޚަރަދު ނުކުރުމަށް މަސައްކަތް ނުކުރައްވާތީ މި ތަނަށް ވަންނަ ޑޮލަރު، ސަރުކާރަށް ލިބޭ ޑޮލަރު ހުސްވެގެން މި އުޅެނީ،" އެ މަނިކުފާނު ވިދާޅުވިއެވެ.
ޔާމީން ވަނީ ރާއްޖޭގައި އިންވެސްޓްކުރާ ބޭރުގެ އިންވެސްޓަރުންނަށް ދެން ޑޮލަރު އެކައުންޓް ވެސް ނުހުޅުވޭނެތޯ ސުވާލު އުފައްދަވާފައެވެ.
ސަރުކާރުގެ ތެޔޮ ބިލުތައް ބޮޑުވަމުން އަންނާތީ އެ ކަމަށް ވެސް ޔާމީން ފާޑުވިދާޅުވިއެވެ. އެ މަނިކުފާނު ވިދާޅުވި ގޮތުގައި މި ސަރުކާރުން ވިޔަފާރި ކުންފުނި، އެސްޓީއޯގެ ތެޔޮ ބިލުތަކަށް 600 މިލިއަން ޚަރަދުވާ ކަމަށް ވިދާޅުވިއެވެ. އެކަމަކު، ދުނިޔޭގެ ބާޒާރުގައި ތެލުގެ އަގު އަންނަނީ ދަށްވަމުން ކަމަށް އެ މަނިކުފާނު ވިދާޅުވިއެވެ.
"ދުނިޔޭގެ ބާޒާރުގައި ތެލުގެ އަގު ދަނީ އިންތިހާއަށް ދަށަށް މިހާރު،" އެ މަނިކުފާނު ވިދާޅުވިއެވެ.
"ތެޔޮ ބިލުތަކަށް އަގުބޮޑުވެގެން އުޅެނީ، އިންތިހާއަށް ކޮރަޕްޓް ބައެއް ވިޓޯލް އެއީ. އެ މީހުންނާ ސަރުކާރުން ބައި އެޅިގެން، އެ މީހުން ބުނި އަގެއްގައި ތެޔޮ ގަންނާތީ އެކަން ވެގެން އެ އުޅެނީ.. މުނައްވަރުމެންނަކަށް މި ކަހަލަ މައްސަލަ ބަލާކަށް ނުކެރޭނެ. ރައްޔިތުންގެ ފައިސާއޭ އެ ހޭދަކުރަނީ އެކަމަކު،"
ބޭރު ފައިސާ މާރުކުރުމާ ގުޅޭ ގޮތުން ބައެއް ރިސޯޓުތަކުން ވަނީ ކަންބޮޑުވުން ފާޅުކޮށްފައެވެ. އެއީ، އެންމެ ރަނގަޅު އަދަދުތައް ނޫން ކަމަށް ބައެއް ބޭފުޅުން ވިދާޅުވެއެވެ.
އެކަމަކު، ރައީސް ޑރ. މުހައްމަދު މުއިއްޒު ވަނީ އެ ގަވާއިދަށް އެއްވެސް ބަދަލެއް ނުގެންނަވާނެ ކަމަށް ވިދާޅުވެފައެވެ. އެއީ، ކުރެވޭނެ ކަމެއް ނޫން ކަމަށާއި ބޮޑެތި ރިސޯޓުތަކުން ކޮންމެ ފަތުރުވެރިއެއްގެ ބޮލަކަށް 500 ޑޮލަރު މާރުކުރަން ޖެހިވަޑައިގަންނަވާނެ ކަމަށް އެ މަނިކުފާނު ވިދާޅުވިއެވެ.
މި ބަދަލާ އެކު ރާއްޖެއިން ރިޒާވްގެ ހާލަތު ރަނގަޅުކުރެވި، ބޭރަށް ފުރާ ދިވެހީންނަށް ވެސް މިހާރު އެމްއެމްއޭއިން ދޭ 500 ޑޮލަރު، 1،000 ޑޮލަރަށް އިތުރުކުރެވޭނެ ކަމަށް ސަރުކާރުން ވަނީ ބުނެފައެވެ.
ރާއްޖޭގެ މާލީ ހާލަތު ގޯސްވެ، ބައިނަލްއަގުވާމީ އެންމެ ބޮޑު ދެ ރޭޓިން އެޖެންސީން ވަނީ ރާއްޖޭގެ ކްރެޑިޓް ރޭޓިން ދަށްކޮށްފައެވެ. އެ ގޮތުން، މޫޑީސްއިން ވަނީ ރާއްޖޭގެ ރޭޓިން 'ސީއޭއޭ2'އަށް ދަށްކޮށްފައެވެ. އޭގެ ކުރިން އޮގަސްޓު މަހުގެ 29 ގައި ފިޗުން ވެސް ވަނީ ރާއްޖޭގެ ރޭޓިން 'ސީސީ'އަށް ދަށްކޮށްފައެވެ.
ފާހަގަކޮށްލެވޭ ގޮތުގައި އަވައްޓެރި އިންޑިއާއާ އެކު ހެދި ކަރަންސީ ސްވޮޕް އެއްބަސްވުމާ އެކު ލިބުނު 400 މިލިއަން ޑޮލަރާ އެކު ރަސްމީ ރިޒާވް 614 މިލިއަން ޑޮލަރަށް ވަނީ އަރާފައެވެ. އެކަމަކު، ބޭނުންކުރެވޭ ރިޒާވް ހުރީ 31.5 މިލިއަން ޑޮލަރުގައެވެ.