މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން އަންގާ ގޮތަށް، ފަތުރުވެރިކަމުގެ ޚިދުމަތްދޭ މަތީ ފަންތީގެ ވިޔަފާރިތަކުން، ކޮންމެ ފަތުރުވެރިއަކަށް 500 ޑޮލަރު މާރުކުރާ ވަރަށް އާމްދަނީ ނުލިބޭ ކަމަށް ބުނެ ކުރަމުންދާ ޝަކުވާތަކަށް ގަވަރުނަރު އަހުމަދު މުނައްވަރު ރައްދު ދެއްވައިފިއެވެ.
މިދިޔަ މަހުގެ އެއް ވަނަ ދުވަހު އެމްއެމްއޭއިން އަމަލުކުރަން ފެށި ބޭރު ފައިސާއާ ބެހޭ ގަވައިދުގައި ވަނީ ރިސޯޓުތަކުން ކޮންމެ މަހަކު އަންނަ ކޮންމެ ފަތުރުވެރިއަކަށް 500 ޑޮލަރު އަދި ގެސްޓްހައުސްތަކަށް އަންނަ ކޮންމެ ފަތުރުވެރިއަކަށް 25 ޑޮލަރު މާރުކުރަން ޖެހޭ ކަމަށް ކަނޑައަޅައިފައެވެ.
ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކުން ވަނީ އެ ގަވައިދު އެކުލަވައިލީ ކަމާ ގުޅުން ހުރި ފަރާތްތަކާ އެކަށީގެންވާ ވަރަށް މަޝްވަރާނުކޮށް ކަމަށާއި، ރިސޯޓުތަކާއި ގެސްޓްހައުސްތަކުން ވެސް ބޮލަކަށް މާރުކުރަން ޖެހޭ އަދަދު ބޮޑު ކަމުގެ ކަންބޮޑުވުން ފާޅުކޮށްފައެވެ.
ރޭ އެމްއެމްއޭއިން ވަނީ އެ ގަވައިދު އިތުރަށް ހަރުދަނާ ކުރުމުގެ މަގުސަދުގައި ކަމަށް ބުނެ، އެކުލަވައިލައިފައިވާ ބިލެއް އާންމުކޮށްފައެވެ. އެ ބިލުގައި ވެސް މާރުކުރަން ޖެހޭ އަދަދުތައް ހުރީ ގަވައިދާ އެއް ވަރަކަށެވެ. ނަމަވެސް މީގެ ކުރިން ރަށްރަށުގައި ހުންނަ، 50އަށް ވުރެ ގިނަ ކޮޓަރި ހުންނަ ހޮޓާތަކުން މާރުކުރަން ޖެހެނީ 500 ޑޮލަރު ނަމަވެސް، އެ ހޮޓާތަކުން ވެސް މާރުކުރަން ޖެހޭނީ 25 ޑޮލަރަށް ކަމަށް ވަނީ ބަދަލުކޮށްފައެވެ.
އެ ބިލާ ގުޅޭ ގޮތުން މައުލޫމާތު ދިނުމަށް މިއަދު ބޭއްވި ނޫސްވެރިންގެ ބައްދަލުވުމެއްގައި މުނައްވަރު ވިދާޅުވީ، ފައިސާ މާރުކުރާނެ އަދަދުތައް ކަނޑައަޅައިފައި ވަނީ އެވަރެޖް ޑެއިލީ ރޭޓް (އޭޑީއާރް) ނުވަތަ ފަތުރުވެރިން ތިބޭ ކޮޓަރިއަކަށް އެވަރެޖުކޮށް ދުވާލަކަށް ލިބޭ އާމްދަނީއަށް ބަލައިގެން ނޫން ކަމަށެވެ. އެގޮތުން ބިލުގައި ފައިސާ މާރުކުރަން ދީފައި އޮންނަ މުއްދަތަކީ، އެ މަހަކަށް ފަހު ހިނގާ ތިންވަނަ މަހުގެ 28ވަނަ ދުވަހުގެ ކުރިންކަން އޭނާ ފާހަގަކުރެއްވިއެވެ.
"ހަތަރު މަސް ނޫނީ ތިން މަސް ތެރޭގައި، 500 އިންޓު ނަމްބަރު އޮފް ޕީޕަލް،" މާރުކުރާ އަދަދުތައް ކަނޑައަޅާ ފޯމިއުލާއާ ގުޅޭ ގޮތުން ވާހަކަދައްކަވަމުން މުނައްވަރު ވިދާޅުވިއެވެ.
"އޭގެ މާނައަކީ އެންމެ މަހަކަށެއް ނޫނޭ ބަލަނީކީއެއް. އެ ތިން މަސް ތެރޭ ނުވަތަ ހަތަރު މަސް ތެރޭގައި އަންނަ އަދަދަކުން އެ ބޭފުޅުން މާރުކުރަން މި ޖެހެނީ."
ފަތުރުވެރިއެއް: ދެ އަހަރުން ދަށުގެ ކުދިންނަށް ޑޮލަރު މާރުކުރަން ނުޖެހޭ ގޮތަށް ވަނީ ބޭރު ފައިސާއާ ބެހޭ ބިލުގައި ހިމަނައިފައި --
މީގެ އިތުރުން ފަތުރުވެރިން ހޭދަކުރާ މިންވަރުގެ ހިސާބުތަކާއި ދިރާސާތަކަށް ބެލުމުން، ކޮންމެ ފަތުރުވެރިއަކު ވެސް 500 ޑޮލަރަށް ވުރެ ގިނައިން ހޭދަކުރާނެކަން އޭނާ ފާހަގަކުރެއްވިއެވެ.
"އެވަރެޖުކޮށް ހުރިހާ އެންމެން ވެސް ހޭދަކުރާނެ ގާތްގަނޑަކަށް މަދުވެގެން ވެސް 1،000 ނުވަ 1،200 ޑޮލަރު، އެއަށްވުރެ މަތިން ގިނަ ފަހަރު ހޭދަކުރާނީ. މިއީ އަޅުގަނޑުމެން ދޭ ނަމްބަރުތަކެއް ނޫން، މިއީ ކުރިން ސާވޭތަކުން ނަމްބަރުތައް ފެންނަން އެހެރީ،" މުނައްވަރު ވިދާޅުވިއެވެ.
އޭނާ ވިދާޅުވީ ބިލް އެކުލަވާލީ ގަވައިދު ބަދަލުކުރަން ނޫން ކަމަށާއި، ބޭނުމަކީ ގަވައިދުގައި ހިމެނޭ ކަންތައްތައް ތަންފީޒު ކުރުމަށް ބާރުތައް ލިބިދިނުން ކަމަށެވެ. އަދި މި ބިލް ގާނޫނަކަށް ވެގެން ތަންފީޒުކޮށް، ރާއްޖޭގެ ހާލަތު މިހާރަށްވުރެ ރަނގަޅުވެއްޖެ ނަމަ މި ބިލުގައި ހިމެނޭ ކަންތައްތައް ލުއިތައް ދެވޭނެ ކަމަށް ވެސް މުނައްވަރު ވިދާޅުވިއެވެ.
"އެހެންނަމަވެސް ކުރިއަށް އޮތް ދެ އަހަރު ތިން އަހަރު ތެރޭގައި ހަގީގަތުގައި އަޅުގަނޑުމެންގެ ފައިނޭންޝަލް ސެކްޓާ ވާރުތަވެފައި ހުރި ދަރަނިތަކާއި އަދި ހަމަ އެގޮތަށް އަޅުގަނޑުމެންގެ ސެކްޓާ އޮތް ގޮތުން މިހާރު މިހިރަ ޗެލެންޖެސްތަކުން އަރައިގަތުމަށް ކޮންމެހެން ކުރަން ޖެހޭ ކަމެއް މިއީ،" އޭނާ ވިދާޅުވިއެވެ.
އެ ބިލަށް މުސްތަގުބަލުގައި ލުއިތައް ދެވޭނެ ނަމަވެސް، މި ވަގުތަށް ލުއިތަކެއް ދޭން ވިސްނާފައި ނެތްކަން މުނައްވަރު ތަކުރާރުކުރެއްވިއެވެ. އަދި އަންނަ އާދިއްތަ ދުވަހާ ހަމައަށް ބިލަށް ޚިޔާލު ހުށަހެޅުމުގެ ފުރުސަތު އޮތްކަން ފާހަގަކުރައްވައި، އެ ޚިޔާލުތައް އަޑުއައްސަވާނެ ކަމަށް އޭނާ ވިދާޅުވިއެވެ.
ޑޮލަރު މާރުކުރަން ޖެހޭ ގަވައިދާ ގުޅޭ ގޮތުން، ރިސޯޓާއި ގެސްޓްހައުސްތައް ހިންގާ ފަރާތްތަކުން ފާހަގަކުރި ކަންބޮޑުވުންތަކުގެ ތެރޭގައި ޚަރަދުތަކަށް ޑޮލަރުން ފައިސާ ދައްކަން ޖެހުމާއި ފަތުރުވެރިން ތިބޭ މުއްދަތާއި އުމުރަށް ބަލައިފައި ނުވުން ހިމެނެއެވެ.
ބޭރު ފައިސާއާ ބެހޭ ބިލުގައި ވަނީ ޑޮލަރު މާރުކުރާއިރު އިސްތިސްނާވާ ފަރާތްތަކާއި ހާލަތްތަކުގެ ތެރޭގައި ގިނަވެގެން 24 ގަޑިއިރު ހޭދަކޮށްފައި ނުވާ ފަތުރުވެރިންނާއި އުމުރުން ދެ އަހަރު ފުރިހަމަނުވާ ކުޑަކުދިން ހިމަނައިފައެވެ.
މާރުކުރާ ވަރަށް ފައިސާ ނުލިބޭ ކަމަށް ބުނެ، މެދުނުކެނޑި ހިންގާތާ 10 ވަރަކަށް އަހަރުވެފައިވާ ޗަންޕާ ސެންޓްރަލް ހޮޓެލް މިމަހުގެ 14ގައި ވަނީ ބަންދުކޮށްފައެވެ.