ސްރީ ލަންކާއަށް ބޯކޮށް ވާރޭވެހި، ފެންބޮޑުވުމުގެ ސަބަބުން ގާތްގަޑަކަށް ފަސް މީހުން މަރުވެއްޖެއެވެ.
އޭގެ ތެރޭގައި ކުޑަކުދިން ވެސް ހިމެނޭ ކަމަށާއި، ފެންބޮޑުވުމުގެ ސަބަބުން ވީނުވީއެއް ނޭނގި ފަސް މީހަކު ގެއްލިފައިވާ ކަމަށް ވެސް މީޑިއާތަކުން ރިޕޯޓުކުރެއެވެ.
ފާއިތުވި ދެ ދުވަހު ލަންކާއަށް ބޯކޮށް ވާރޭވެހި ވައި ގަދަވުމުގެ ސަބަބުން ގެދޮރާއި ދަނޑުބިންތަކާއި މަގުތައް ފެންބޮޑުވެ، ސައިފަތް ހައްދާ ފަރުބަދަ ސަރަހައްދުތަކުގައި ރޭލު ދަތުރުތައް ހުއްޓާލަން ޖެހިފައިވާ ކަމަށް ކަމާބެހޭ ފަރާތްތަކަށް ހާމަކުރެއެވެ.
އެ ހާދިސާގައި އަންގާރަ ދުވަހުގެ ހަވީރު ސްކޫލުން އެނބުރި ގެއަށް ދިއުމަށް ދަތުރުކުރި ހަ ކުދިން ހިމެނޭ ގޮތަށް އަށް މީހަކު ގެއްލިގެން ރިޕޯޓްކޮށްފައިވަނީ އެ މީހުން ދަތުރުކުރި ޓްރެކްޓަރު ފެންބޮޑުވުމުގެ ސަބަބުން އޮޔާ ދަމައިގަނެފައިވާތީ ކަމަށް ފުލުހުން ހާމަކުރެއެވެ.
ބުދަ ދުވަހު ތިން ކުދިންގެ ހަށިގަނޑު ފެނިފައިވާއިރު، އެ ހާދިސާ ހިނގިއިރު ޓްރެކްޓަރުގައި 11 ކުއްޖަކު ދަތުރުކޮށްފައިވެއެވެ. އޭގެ ތެރެއިން ފަސް ކުދިން ވަނީ ސަލާމަތްކޮށްފައެވެ.
އޭގެ އިތުރުން ފާރެއް ވެއްޓިގެން މަރުވި އަންހެނަކާއި، ފެންބޮޑުވުމުގެ ސަބަބުން މަރުވި އެކަކު ވެސް ހިމެނޭ ކަމަށް ބޭރުގެ މީޑިއާތަކުން ރިޕޯޓުކުރެއެވެ.
ލަންކާގެ ޓީވީ ޗެނަލް ޑެރާނާއިން ރިޕޯޓުކޮށްފައިވާ ގޮތުގައި އެއާފޯސް ހެލިކޮޕްޓަރުތަކުގެ އެހީތެރިކަމާ އެކު ގެއްލުނު މީހުން ހޯދުމުގެ މަސައްކަތް ސިފައިން އަންނަނީ ކުރަމުންނެވެ.
ބޯކޮށް ވާރޭވެހި ފެންބޮޑުވުމުގެ ސަބަބުން ބުދަ ދުވަހުގެ ނިޔަލަށް 3،000 އަށް ވުރެ ގިނަ މީހުން ވަގުތީ ހިޔާތަކަށް ބަދަލުކޮށްފައިވާއިރު ގާތްގަނޑަކަށް 600 ގެއަކަށް ވަނީ ގެއްލުން ލިބިފައެވެ.
ލަންކާގެ މޫސުމާ ބެހޭ އިދާރާއިން ބުނީ ވިއްސާރަވެފައިވަނީ ބޭ އޮފް ބެންގާލްގައި އުފެދިފައިވާ ކޮޅިގަނޑަކުން ކަމަށާއި މިއަދުގެ ވަގުތެއްގައި ލަންކާއާ ކައިރިއަށް ކޮޅިގަނޑު ދަތުރުކޮށް ތޫފާނަކަށް ބަދަލުވުން އެކަށީގެންވާ ކަމަށެވެ.
މެއި މަހުން ފެށިގެން ލަންކާއަށް މޫސުން ގޯސްވެފައިވާއިރު، ބޯކޮށް ވާރޭ ވެހިފައިވެއެވެ.