އަންނަ މާޗު މަހު ރާއްޖޭގައި ހެލިކޮޕްޓަރުގެ ޚިދުމަތް ފެށޭނެ ކަމަށް ޓްރާންސްޕޯޓު މިނިސްޓަރު މުޙައްމަދު އަމީން ވިދާޅުވެއްޖެއެވެ.
ޓްރާންސްޕޯޓް މިނިސްޓްރީން ރާއްޖޭގައި ފަތުރުވެރިން އުފުލުން ހިމެނޭ ގޮތަށް، ހެލިކަޕްޓަރު ޚިދުމަތް ދޭން ފަށަން ފުރުސަތު ހުޅުވާލީ މިދިޔަ އޮގަސްޓު މަހުގެ ފަސް ވަނަ ދުވަހެވެ.
އެކަމާ ގުޅުވައި ޕީއެސްއެމްގެ ޕްރޮގްރާމެއްގައި ވާހަކަދައްކަވަމުން މިނިސްޓަރު އަމީން ވިދާޅުވީ، ކުރިއަށް އޮތް 10 ވަރަކަށް ދުވަސް ތެރޭ ހެލިކޮޕްޓަރު އޮޕަރޭޓު ކުރާ ފަރާތަކާ އެއްކޮށް އެއްބަސްވުމެއްގައި ސޮއިކުރާނެ ކަމަށެވެ.
"މި އަންނަ އަހަރުގެ މާޗު ހިސާބަށް ދާއިރުގައި ރާއްޖޭގައި ހެލިކޮޕްޓަރު އޮޕަރޭޓު ކުރަން ފެށޭނެ،" އޭނާ ވިދާޅުވިއެވެ.
ހެލިކަޕްޓަރެއްގައި ބަލި މީހުން އުފުލަނީ: މިހާރު ބޭނުންކުރަނީ އިންޑިއާއިން ހަދިޔާކޮށްފައިވާ ހެލިކަޕްޓަރު -- ފޮޓޯ: އެމްއެންޑީއެފް
އަމީން ވިދާޅުވީ ރާއްޖޭގައި އެ ޚިދުމަތް ފަށަން ތަހުލީލުތައް ހެދީ އިނގިރޭސިވިލާތުގެ ސިވިލް އޭވިއޭޝަން އޮތޯރިޓީ (ސީއެއޭ)ގެ ލަފާގެ މަތިން ކަމަށާއި ޚިދުމަތުގައި ބޭނުން ކުރާނީ ސަލާމަތީ ގޮތުން އޮޕަރޭޓު ކުރަން އެންމެ ރަނގަޅު ހެލިކޮޕްޓަރު ކަމަށެވެ.
އޭނާ ވިދާޅުވި ގޮތުގައި، އެ ޚިދުމަތް ފަށާނީ އެއް ރަށުން އަނެއް ރަށަށް ނުވަތަ ރަށަކުން މާލެއަށް ބަލި މީހުން ގެނައުމުގެ ކަންތައްތަކާއި ރޭގަނޑު ފަތުރުވެރިން އުފުލުމަށް ހުރި ދަތިތަކަށް ވެސް ހައްލެއް ލިބޭ ގޮތަށެވެ.
މިދިޔަ އޮގަސްޓު މަހުގެ 21ގައި ރީޖަނަލް އެއާޕޯޓްސް ކޮންޕެނީ ލިމިޓެޑް (އާރްސީއެލް)އިން ވަނީ، ރާއްޖޭގައި 20 އަހަރަށް ހެލިކޮޕްޓަރުގެ ޚިދުމަތް ދޭ ގޮތަށް ދުބާއީގެ ހެލިކޮޕްޓަރު އޮޕަރޭޓަރެއް ކަމަށްވާ އެއާ ޝާޓޯ ޑީޑަބްލިއުސީއާއި ވިންގް ކެޕިޓަލް މެނޭޖްމަންޓާ އެކު އެއްބަސްވުމެއްގައި ސޮއިކޮށްފައެވެ.
މި އެއްބަސްވުމުގެ ދަށުން ހެލިކޮޕްޓަރާއި ޑްރޯން ޖެއްސޭ ގޮތަށް 100 ހައިބްރިޑް ވާޓި ޕޯޓްސް ގާއިމުކޮށް، ހެލިކޮޕްޓަރުގެ ޚިދުމަތަށް ހުޅުވައިލާނެ ކަމަށް ބޭރުގެ ނޫހެއް ކަމަށްވާ އާބަން އެއާ މޮބިލިޓީން އޭރު ރިޕޯޓުކޮށްފައިވެއެވެ.
މި ޕޯޓުތަކުގެ ތެރޭގައި، ޓަޗް ޑައުން އެންޑް ލިފްޓް އޮފް އޭރިއާތަކާއި، ސަލާމަތީ ޒޯންތަކާއި، ޓާމިނަލް ވެއިޓިން ހޯލްތައް ހިމެނެއެވެ. އަދި، ކާގޯ އޮޕަރޭޝަން ހިމެނޭހެން ތަފާތު ކަންކަމަށް 500 ޑްރޯން ޕޯޓު ވެސް ގާއިމުކުރަން ވަނީ ނިންމާފައެވެ.
ރާއްޖޭގައި މިހާރު ބަލި މީހުން އުފުލަން ބޭނުންކުރަނީ އިންޑިއާއިން ހަދިޔާކޮށްފައިވާ ދެ ހެލިކޮޕްޓަރަކާއި ޑޯނިއާ މަތިންދާބޯޓެކެވެ. އެ ހެލިކޮޕްޓަރުތައް އޮޕަރޭޓުކުރަން ތިބި އިންޑިއާ ސިފައިން، މި ސަރުކާރުގެ ކެމްޕެއިން ވައުދެއްގެ ދަށުން ވަނީ އަނބުރާ ފޮނުވައިލައިފައެވެ.
އެ ހެލިކަޕްޓަރުތައް މިހާރު އޮޕަރޭޓު ކުރަނީ މަދަނީ، ފަންނީ މީހުން ކަމަށް ސަރުކާރުން ވަނީ ބުނެފައެވެ.