ރާއްޖޭގައި 20 އަހަރަށް ހެލިކޮޕްޓަރުގެ ޚިދުމަތް ދޭ ގޮތަށް ރީޖަނަލް އެއާޕޯޓްސް ކޮންޕެނީ ލިމިޓެޑް (އާރްސީއެލް)އިން ދުބާއީގެ ހެލިކޮޕްޓަރު އޮޕަރޭޓަރެއް ކަމަށްވާ އެއާ ޝާޓޯ ޑީޑަބްލިއުސީއާއި ވިންގް ކެޕިޓަލް މެނޭޖްމަންޓާ އެކު އެއްބަސްވުމެއްގައި ސޮއިކޮށްފިއެވެ.
އެކަން އިއުލާނުކޮށްފައިވަނީ ބޭރުގެ ނޫހެއް ކަމަށްވާ އާބަން އެއާ މޮބިލިޓީންނެވެ. އެ ނޫހުން ރިޕޯޓްކޮށްފައިވާ ގޮތުގައި، "ޕްރޮޖެކްޓް އެލެވޭޓް މޯލްޑިވްސް"ގެ ނަމުން ނަން ދީފައިވާ މި އެއްބަސްވުމުގެ ދަށުން ހެލިކޮޕްޓަރާއި ޑްރޯން ޖެއްސޭ ގޮތަށް 100 ހައިބްރިޑް ވާޓި ޕޯޓްސް ގާއިމުކޮށް، ހެލިކޮޕްޓަރުގެ ޚިދުމަތަށް ހުޅުވައިލާނެއެވެ.
މި ޕޯޓުތަކުގެ ތެރޭގައި، ޓަޗް ޑައުން އެންޑް ލިފްޓް އޮފް އޭރިއާތަކާއި، ސަލާމަތީ ޒޯންތަކާއި، ޓާމިނަލް ވެއިޓިން ހޯލްތައް ހިމެނެއެވެ. އަދި، ކާގޯ އޮޕަރޭޝަން ހިމެނޭހެން ތަފާތު ކަންކަމަށް 500 ޑްރޯން ޕޯޓު ވެސް ގާއިމުކުރަން ވަނީ ނިންމާފައެވެ.
ދުނިޔޭގެ ފެންވަރުގައި ފާހަގަކޮށްލެވޭ ކުންފުނިތަކާ އެކު މަސައްކަތް ކުރަން ލިބުމަކީ ވަރަށް ބޮޑު އުފަލެއް ކަމަށް މި އެއްބަސްވުމާ ގުޅުވައި އާރްއޭސީއެލްގެ މެނޭޖިން ޑިރެކްޓަރު އަހުމަދު މުބީން ވިދާޅުވެފައިވާ ކަމަށް އެ ނޫހުން ބުނެފައިވެއެވެ.
މީގެ އިތުރުން، ސަރުކާރުން މިހާރު ކުރިއަށްދާ ޕްލޭނާ އެއްގޮތަށް އަމާޒަކީ ރާއްޖޭގައި މިހާރު ހިންގާ އަށް އެއާޕޯޓުގެ އަދަދު 15އަށް އިތުރުކުރުން ކަމަށް މުބީން ވިދާޅުވެފައިވާ ކަމަށް އެ ނޫހުން ބުނެއެވެ.
މި އެއްބަސްވުމާ ގުޅިގެން އެއާ ޝާޓޯ ކުންފުނީގެ ޗެއާމަން ޑރ. ސާމިރު މުހައްމަދު ވިދާޅުވީ، މިއީ އެ ކުންފުންޏަށް ލިބުނު ތަފާތު ފުރުސަތެއް ކަމަށެވެ.
ފަހާގަކޮށްލެވޭ ގޮތުގައި، މި މަހުގެ ފަހެއްގައި ޓްރާންސްޕޯޓް މިނިސްޓްރީން ވަނީ ރާއްޖޭގައި އެއް ތަނުން އަނެއް ތަނަށް ފަތުރުވެރިން އުފުލުން ހިމެނޭ ގޮތަށް، ހެލިކަޕްޓަރު ޚިދުމަތް ދޭން ފަށަން ފުރުސަތު ހުޅުވާލާފައެވެ.
އެ މިނިސްޓްރީގެ މަގުސަދަކީ ހެލިކަޕްޓަރު މެދުވެރިކޮށް އެއާ އެމްބިއުލާންސް ޚިދުމަތާއި މީހުން ހޯދައި ސަލާމަތް ކުރުމުގެ އޮޕަރޭޝަން ހިންގުމުގެ އިތުރުން ފަތުރުވެރިކަމުގެ ދާއިރާ ކުރިއެރުވުމަށް ފަތުރުވެރިން އުފުލުން ކަމަށް އެ އިއުލާނުގައިވެއެވެ.