ފަތުރުވެރިންނަށް ޚިދުމަތް ދޭ ފަރާތްތަކުން ދިވެހި ބޭންކަކަށް ޑޮލަރު ޖަމާކުރަން ނުވަތަ މާރުކުރަން ދެކޮޅު ހަދާނަމަ ޖޫރިމަނާކުރާނީ އެ ފަރާތަކުން ދައްކަން ޖެހޭ ފައިސާގެ ނިސްބަތުން ކަމަށް ބޭރު ފައިސާއާ ބެހޭ ބިލުގައި ހިމަނައިފިއެވެ.
މަރުކަޒީ ބޭންކް، އެމްއެމްއޭއިން ވަނީ ބޭރު ފައިސާއާ ބިލެއް އެކުލަވާލައި ޚިޔާލު ހުށަހެޅުމަށް ފުރުސަތު ހުޅުވައިލައިފައެވެ. އެ އޮތޯރިޓީން ވަނީ އެ ބިލު އެކުލަވައިލައިފައި ވަނީ، މިދިޔަ މަހުގެ އެކެއްގައި އަމަލުކުރަން ފެށި ބޭރު ފައިސާއާ ބެހޭ ގަވައިދުގައި ހިމެނޭ ބައެއް ކަންތައްތައް ހަރުދަނާ ކުރުމަށް ފަހު ކަމަށް ބުނެފައެވެ.
ބޭރު ފައިސާއާ ބެހޭ ގަވައިދުގައިވާ ގޮތުން، ޑޮލަރު މާރުކުރަން ދެކޮޅު ހަދާނަމަ، އެ ފަރާތެއް 5،000 ރުފިޔާއާއި އެއް މިލިއަން ރުފިޔާއާ ދެމެދުގެ އަދަދަކުން ޖޫރިމަނާ ކުރާނެ ކަމަށެވެ. އަދި ޖޫރިމަނާ ކުރުމަށްފަހު، އެމްއެމްއޭއަށް ފެނިއްޖެ ހިނދެއްގައި، ގަވައިދަށް އަމަލުކުރަން ދެން ހިނގާ ކޮންމެ ދުވަހަކަށް 5،000 ރުފިޔާ ދައްކަން އެންގޭނެއެވެ.
މިހާރު އެމްއެމްއޭއިން އެކުލަވައިލައިފައިވާ ބިލުގައި ވަނީ، ބޭރު ފައިސާ ދިވެހި ބޭންކަކަށް ޖަމާނުކުރާނަމަ، އެ ފަރާތަކުން އެ މަހަކަށް ޖަމާކުރަން ޖެހޭ ބޭރު ފައިސާގެ 0.05 ޕަސެންޓުން ޖޫރިމަނާ ކުރުމުގެ ބާރު އެމްއެމްއޭއަށް ލިބޭ ކަމަށެވެ. އަދި ގާނޫނާ އެއްގޮތަށް އަމަލުކުރަން ދެން ހިނގާ ކޮންމެ ދުވަހަކަށް، ޖަމާކުރަން ޖެހޭ ބޭރު ފައިސާގެ 0.05 ޕަސެންޓަށްވުރެ އިތުރުނުވާނެހެން ފައިސާ ދައްކަން އެންގޭނެ ކަމަށެވެ.
އެމްއެމްއޭގެ ގަވަރުނަރު އަހުމަދު މުނައްވަރު: ބޭުރު ފައިސާއާ ބެހޭ ބިލް އެކުލަވައިލީ ގަވައިދުގައި ހިމެނޭ ކަންތައްތައް ހަރުދަނާކޮށްފައި ކަމަށް އެމްއެމްއޭއިން ބުނޭ -- ފޮޓޯ/ އެމްއެމްއޭ
މީގެ އިތުރުން ޑޮލަރު މާރުނުކުރާނަމަ، އެ ފަރާތަކުން އެ މަހަކަށް ޖަމާކުރަން ޖެހޭ ފައަިސާގެ 0.1 ޕަސެންޓުން ޖޫރިމަނާ ކުރެވޭނެއެވެ. އަދި ގާނޫނާ އެއްގޮތަށް ޑޮލަރު މާރުކުރަން ދެން ހޭދަވާ ކޮންމެ ދުވަހަކަށް، އެ މަހަކަށް ޖަމާކުރަން ޖެހޭ ބޭރު ފައިސާގެ 0.1 ޕަސެންޓަށް ވުރެ އިތުރުނުވާނެ އަދަދެއް ދައްކަން އެންގުމުގެ ބާރު ވެސް އެމްއެމްއޭއަށް އެ ބިލުން ލިބިދެއެވެ.
އެމްއެމްއޭއިން މި ބަދަލުތަކާއެކު ބިލެއް އެކުލަވައިލީ، ބޮޑު އާމްދަނީއެއް ލިބޭ ލަގްޒަރީ ރިސޯޓުތައް ފަދަ ތަންތަނުން ގަވައިދަށް އަމަލުނުކުރާނަމަ ޖޫރިމަނާ ކުރެވެނީ އެއް މިލިއަން ރުފިޔާއިން ކަމަށްވާނަމަ، އެއީ މާ ކުޑަ އަދަދެއް ކަމަށް ބުނެ ގަވައިދަށް ފާޑު ކިޔުން އަމާޒުވެފައި ވަނިކޮށެވެ.
މި ބިލުގައި ހިމަނައިފައިވާ އިތުރު ބަދަލަކީ، ފަތުރުވެރިކަމާ ގުޅުން ހުރި ޚިދުމަތެއް ނުދިން ނަމަވެސް 20 މިލިއަން ޑޮލަރަށް ވުރެ ބޮޑު އާމްދަނީ ލިބޭ ވިޔަފާރިތަކުން 25 ޕަސެންޓަށް ވުރެ ބޮޑު ނުވާ ގޮތަށް ޑޮލަރު މާރުކުރަން ޖެހުމެވެ.
އެމްއެމްއޭއިން ވަނީ މި ބިލުގެ ޑްރާފްޓެއް ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކަށް ފޮނުވައިފައިވާނެ ކަމަށާއި އާންމުންގެ ޚިޔާލު އަންނަ އާދިއްތަ ދުވަހުގެ ނިޔަލަށް ހުށަހެޅޭނެ ކަމަށް ބުނެފައެވެ.
މިއަދު ބޭއްވި ނޫސްވެރިންގެ ބައްދަލުވުމުގައި އެމްއެމްއޭއިން ބުނީ ބޭރު ފައިސާއާ ބެހޭ ބިލް ފާސްކޮށްފި ނަމަ، އެ ގާނޫނުގައިވާ ގޮތަށް އަމަލުކުރަން ޖެހޭނީ އަންނަ އަހަރުގެ އެއް ވަނަ ދުވަހުން ފެށިގެން އަންނަ ފަތުރުވެރިންގެ އަދަދަށް ކަމަށެވެ.
"ޓްރާންސިޝަން ޕީރިއަޑެއް އަންނާނެ. މިހާރު އަމަލުކުރަމުން މިދަނީ ރެގިއުލޭޝަން އޮން ފޮރިން ކަރަންސީއަށް އޭގެ ހުރިހާ އޮބްލިގޭޝަންސްތަކެއް 31 ޑިސެމްބަރު 2025އާ ހަމައަށް އެޕްލައި ވާނެ ކަމަށް އަޅުގަނޑުމެން ޕްރޮޕޯޒް މިކުރަނީ،" އެ އޮތޯރިޓީން ބުންޏެވެ.
"އަދި މި ގާނޫނުގެ ހުރިހާ އޮބްލިގޭޝަންއެއް ފަށަން މި ޖެހެނީ 1 ޖެނުއަރީ 2025އިން ފަށައިގެން އެހެންވެގެން 1 ޖެނުއަރީ 2025އިން ފަށައިގެން އޭގެ ރިއެލައިޒްޑް ސޭލްސްއާއި 1 ޖެނުއަރީން ފަށައިގެން އަންނަ ޓޫރިސްޓުންނަށް ބިލުގައި ހުރި ގޮތަށް ރޭޓްސްތަކާއި ކޮންވާޝަންސްތައް އެޕްލައިވާނީ."
މިދިޔަ އޮކްޓޯބަރު މަހުގެ އެކެއްގައި އިއުލާންކޮށް އަމަލުކުރަން ފެށި ބޭރު ފައިސާއާ ބެހޭ ގަވައިދާ ގުޅޭ ގޮތުން ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކުން އަންނަނީ ކަންބޮޑުވުން ފާޅުކުރަމުންނެވެ.
ބައެއް ރިސޯޓުތަކާއި ގެސްޓްހައުސްތަކުން ވެސް އެ ގަވައިދުގައިވާ މިންވަރަށް ފައިސާ މާރުކުރުމަކީ ދެކޮޅު ޖެހޭ ކަމެއް ނޫން ކަމަށާއި މިހާރު ވެސް ވިޔަފާރިއަށް ގެއްލުން ވަމުން އަންނަ ކަމަށް ބުނެފައެވެ.
އެ ގަވާއިދުގެ ސަބަބުން ނުލިބޭ ޑޮލަރު މާރު ކުރަން ޖެހޭތީ، ކުރައުން އެންޑް ޗަމްޕާ ރިސޯޓްސްއިން މާލޭގައި ހިންގާ ޗަންޕާ ސެންޓްރަލް ހޮޓެލް ވަނީ މިމަހު ބަންދުކޮށްފައެވެ. އެ ހޮޓެލް ހިމެނުނީ 500 ޑޮލަރު ދައްކަން ޖެހޭ، އޭ ކެޓެގަރީގައެވެ.