މީހުން ދިރިއުޅޭ ރަށްރަށުގައި ހަދައިފައިވާ، 50އަށް ވުރެ ގިނަ ކޮޓަރީގެ ޓޫރިސްޓު ހޮޓާތަކުން ފަތުރުވެރިއަކަށް މާރުކުރަން ޖެހޭ އަދަދު 500 ޑޮލަރުން، 25 ޑޮލަރަށް ކުޑަ ކުރުމަށް ބޭރު ފައިސާއާ ބެހޭ ބިލުގައި ހިމަނައިފިއެވެ.
މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން ވަނީ ބޭރު ފައިސާއާ ބެހޭ ބިލެއް އެކުލަވާލައި، އެ ބިލާ ގުޅޭ ގޮތުން ޚިޔާލު ހޯދުމަށް ކަމާ ގުޅުންހުރި ފަރާތްތަކާ ހިއްސާކޮށްފައެވެ. އަދި އަންނަ އާދިއްތައިން ފެށިގެން އެ ބިލަށް އާންމުކޮށް ޚިޔާލު ހުށަހެޅުމުގެ ފުރުސަތު ހުޅުވާލަން ވަނީ ނިންމައިފައެވެ.
އެމްއެމްއޭއިން ބުނީ މި ބިލުގެ މަގުސަދަކީ މިދިޔަ މަހުގެ އެއް ވަނަ ދުވަހު އަމަލުކުރަން ފެށި ބޭރު ފައިސާގެ ގަވައިދު ހަރުދަނާކުރުން ކަމަށެވެ. އަދި މި ބިލު ރައްޔިތުންގެ މަޖިލީހަށް ހުށަހަޅައި ފާސްކުރެވެންދެން، މިހާރު އޮތް ގަވައިދަށް އަމަލުކުރަމުންދާނެކަން ފާހަގަކޮށްފައިވެއެވެ.
އެމްއެމްއޭގެ ގަވައިދާއި ބިލުގެ ތަފާތުތަކުގެ ތެރޭގައި، ފަތުރުވެރިކަމުގެ ޚިދުމަތްދޭ ތަންތަން ހިމެނޭ ކެޓެގަރީއަށް ބަދަލެއް ގެނެސްފައިވެއެވެ. އެގޮތުން މީގެ ކުރިން ފަތުރުވެރިއަކަށް 25 ޑޮލަރު މާރުކުރަން ޖެހޭ ކެޓަގަރީ ބީގައި މީގެ ކުރިން ހިމަނައިފައި ވަނީ 50 ކޮޓަރި ނުވަތަ އެއަށްވުރެ މަދު އަދަދެއްގެ ކޮޓަރި ރަޖިސްޓްރީކޮށްފައިވާ ތަންތަނެވެ. އެހެންވުމުން، 50އަށް ވުރެ ގިނަ ކޮޓަރި ހުންނަ ތަންތަން ރިޒޯޓުތައް ހިނެނޭ ކެޓެގަރީ އޭގައި ހިމެނިފައިވުމުން، ގަވައިދުގެ ދަށުން ފަތުރުވެރިއަކަށް 500 ޑޮލަރު ދައްކަން ޖެހެއެވެ.
ނަމަވެސް މިހާރު އެކުލަވައިލައިފައިވާ ބިލުގައި ވަނީ، 50އަށް ވުރެ ކޮޓަރި މަދުވިޔަސް ގިނަވިޔަސް ހިމެނޭނީ ކެޓަގަރީ ބީގައި ކަމަށް ކަނޑައަޅައިފައެވެ. އެއާއެކު، ބިލް ފާސްކޮށްފި ނަމަ، 50އަށް ވުރެ ގިނަ ކޮޓަރި ހުންނަ ހޮޓާތަކުން ވެސް މާރުކުރަން ޖެހޭނީ ގެސްޓްހައުސްތަކުން މާރުކުރާ ވަރަށް، ބޮލަކަށް 25 ޑޮލަރެވެ.
މީގެ އިތުރުން އެ ބިލުގައި ވަނީ ފަތުރުވެރިކަމުގެ ދާއިރާގައި ނުހިމެނޭ، އަހަރަކަށް 20 މިލިއަން ޑޮލަރަށް ވުރެ ބޮޑު އާމްދަނީ ލިބޭ ވިޔަފާރިތަކުން 25 ޕަސެންޓަށް ވުރެ ބޮޑު ނުވާ ގޮތަށް، އެ ގާނޫނުގެ ދަށުން ހަދާ ގަވައިދެއްގައި ކަނޑައަޅައިފައިވާ އަދަދެއް މާރުކުރަން ހިމަނައިފައެވެ.
އެ ބިލުގައި ވަނީ ބޭރު ފައިސާ މާރުކުރުމުން އިސްތިސްނާވާ ފަރާތްތަކާއި ހާލަތްތަކެއް ހިމަނައިފައެވެ. އޭގެ ތެރޭގައި:
1/ ގިނަވެގެން 24 ގަޑިއިރު ހޭދަކޮށްފައި ނުވާ ޓޫރިސްޓުން
2/ އުމުރުން ދެ އަހަރު ފުރިހަމަނުވާ ކުޑަކުދިން
3/ އެ ޓޫރިޒަމް އެސްޓަބްލިޝްމެންޓްގައި ހިލޭ ނުވަތަ ކޮމްޕްލިމެންޓްރީކޮށް ތިބޭ ފަރާތްތައް
އެމްއެމްއޭއިން ބޭރު ފައިސާއާ ގުޅޭ ގަވައިދުގައި ހިމެނޭ ބައެއް ކަންތައްތަކަށް ބަދަލު ގެނެސް، ބިލެއް އެކުލަވައިލީ އެ ގަވައިދާ ގުޅޭ ގޮތުން ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކުން ކަންބޮޑުވުން ފާޅުކުރަމުން އަންނަ ދަނޑިވަޅެއްގައެވެ.
ބައެއް ރިސޯޓުތަކާއި ގެސްޓްހައުސްތަކުން ވެސް އެ ގަވައިދުގައިވާ މިންވަރަށް ފައިސާ މާރުކުރުމަކީ ދެކޮޅު ޖެހޭ ކަމެއް ނޫން ކަމަށާއި މިހާރު ވެސް ވިޔަފާރިއަށް ގެއްލުން ވަމުން އަންނަ ކަމަށް ބުނެފައެވެ.
އެ ގަވާއިދުގެ ސަބަބުން ނުލިބޭ ޑޮލަރު މާރު ކުރަން ޖެހޭތީ، ކުރައުން އެންޑް ޗަމްޕާ ރިސޯޓްސްއިން މާލޭގައި ހިންގާ ޗަންޕާ ސެންޓްރަލް ހޮޓެލް ވަނީ މިމަހު ބަންދުކޮށްފައެވެ. އެ ހޮޓެލް ހިމެނުނީ 500 ޑޮލަރު ދައްކަން ޖެހޭ، އޭ ކެޓެގަރީގައެވެ.