މާލޭގެ މާވެޔޮމަގުގައި ހުރި ގުދަނެއްގައި މިދިޔަ ހޯމަ ދުވަހު ރޯވި އަލިފާންގަނޑުން ލިބުނު ގެއްލުމުގެ އަގު ތިން މިލިއަން ރުފިޔާއަށް ވުރެ އިތުރުވާނެ ކަމަށް، ގުދަނުގެ ވެރިފަރާތުން ބުނެފިއެވެ.
އެމްއެންޑީއެފުން ބުނެފައިވާ ގޮތުގައި ނިޔަދުރުމާ ގޭގެ 10ވަނަ ފަންގިފިލާގައި ހުރި ގުދަނެއްގައި ރޯވެގެން ރިޕޯޓުކޮށްފައި ވަނީ އިރުއޮއްސި 6:30ހާއިރެވެ. އޭގެ ފަހުން ފަޔާ އެންޑް ރެސްކިއު ސާވިސެސްއިން ހަރަކާތްތެރިވެ ގަޑިއިރެއް ތެރޭ އަލިފާންގަނޑު ވަނީ ނިއްވާލައިފައެވެ.
ސޮލައިޓް އާއި އޯޓީޕީ ބައި ސޮލައިޓް ހިންގުމުގައި އިސްކޮށް އުޅުއްވާ އަހުމަދު ޝިޔާމް "ސަން"އަށް ވިދާޅުވީ އެ ގުދަނަކީ ކައިވެނި ޕާޓީ ފަދަ ހަފުލާތައް ބޭއްވުމަށް ތައްޔާރުކުރަމުން ދިޔަ ތަނެއް ކަމަށެވެ. ނަމަވެސް އެ ތަނުގައި ވަގުތީ ގޮތުން އަގުބޮޑު ސާމާނުުތަކެއް ގުދަންކޮށްފައި ހުރި ކަމަށް އޭނާ ބުންޏެވެ.
ގުދަނުގައި ރޯވެ ލިބުނު ގެއްލުންތައް: އެ ތަނުގައި ހަފުލާތަަކަށް ބޭނުންކުރަން ބަހައްޓާފައި ހުރި ބައެއް ތަކެތި ހުރި -- ފޮޓޯ/ އަހުމަދު ޝިޔާމް
"ރެސްޓޯރެންޓުތަކުގެ ކިޗަން ސެޓަޕްތަކަށް ބޭނުންކުރާ ޑީޕް ފްރީޒާތަކާއި އެކަހަލަ ވަރަށް ގިނަ، އަގުބޮޑު ސާމާނު ހުންނާނެ. އިވެންޓުތަކުގައި އަޅުގަނޑުމެން ބޭނުންކުރަން ހޯދައިފައި ހުރި ގޮނޑިތަކާއި ސާމާނުތައް ވެސް ހުންނާނެ،" ޝިޔާމް ބުންޏެވެ.
އަލިފާނުގެ ސަބަބުން ގުދަނަށް ވެސް ގެއްލުންތައް ލިބުނުކަން ފާހަގަކޮށް އޭނާ ބުނީ، އެތަނުގެ ތެރޭގައި ހުރި ތަކެތީގެ އަގު ލަފާކުރާއިރު 3.86 މިލިއަނާއި 4.63 މިލިއަން ރުފިޔާއާ ދެމެދުގެ އަގަކަށް އަރާނެ ކަމަށެވެ.
"އެއީ އަޅުގަނޑުމެން އެކި ފަހަރު މަތިން 250،000 ނުވަތަ ތިން ލައްކަ ޑޮލަރުގެ ސާމާނުތައް ހުންނާނެ، ހިއެއްނުވޭ ބޭނުންކުރެވޭ ހާލަތެއްގައި އެއްވެސް އެއްޗެއް ހުރިހެނެއް،" ޝިޔާމް ބުންޏެވެ.
ގުދަނުގައި ރޯވެ ލިބުނު ގެއްލުންތައް: ގެއްލުންތަކުގެ އަގު 250،000 ޑޮލަރަށް ވުރެ އިތުރުވާނެ ކަމަށް ވެރިފަރާތުން ބުނޭ -- ފޮޓޯ/ އަހުމަދު ޝިޔާމް
އެ މައްސަލައިގައި ފޮރެންސިކް ފުލުހުން ގޮސް ބަލަން ޖެހޭ ކަންތައްތައް ބަލައިފައިވާކަން ފާހަަގަކޮށް އޭނާ ބުނީ ރޯވާން މެދުވެރިވި ސަބަބެއް މިހާތަނަށް އެނގިފައިނުވާ ކަމަށެވެ.
"މިތަނަކީ އާންމުކޮށް ބޭނުންކުރާ ތަނެއްނޫން، ކަރަންޓު ގުޅާފައެއް ވެސް ނުހުންނާނެ އެއްވެސް އެއްޗެއްގައެއް،" ޝިޔާމް ބުންޏެވެ.
އެހެންވެ، ރޯވާން މެދުވެރިވި ސަބަބެއް ޔަގީންކުރެވޭނީ ފުލުހުންގެ ތަހުގީގަށް ފަހު ކަމަށް އޭނާ ބުންޏެވެ.